Yangiliklar. Xabarlar. Voqealar

Regbi sport turi rivojlanadi

Toshkent. Kuni kecha Prezidentimizning “O'zbekiston Respublikasida regbi sport turini rivojlantirish chora-tadbirlari to'g'risida”gi qarori e'lon qilindi. Unda regbini yanada rivojlantirish, ushbu sport turini respublika aholisining keng qatlamlari o'rtasida faol targ'ib qilish va ommalashtirish haqida so'z boradi. Jumladan, qarorda yuqori sifatli o'quv-mashq jarayonini ta'minlash, regbichilar, trenerlar va hakamlarning mahorat darajasi va malakasini doimiy oshirib borish uchun qulay shart-sharoitlar yaratishga e'tibor qaratilgan.

Mo'ynoqda yangi ob'yektlar

Qoraqalpog'iston. Mo'ynoqda bir kunda 7 ta yangi ob'yekt foydalanishga topshirildi. O'zbekiston Respublikasi Bosh prokuraturasi tashabbusi bilan yangidan qurilgan «Future Muynak» axborot texnologiyalar markazi va «Vookcafe», zamonaviy tipdagi elektr tarmoqlari majmuasi, 70 o'rinli “Surxon quyoshi” bolalar bog'chasi, Bolalar musiqa va san'at maktabi, “Orol dengizi tarixi” muzeyi va boshqa yangi binolar shular jumlasidan.Ushbu ob'yektlar tuman ko'rkiga ko'rk qo'shish barobarida mahalliy aholining turmushini yaxshilash, ularni ish bilan ta'minlash, yoshlarning bilim olishi, hunar o'rganishi, madaniyat va san'atga qiziqishining ortishida muhim ahamiyatga ega.

Go'zal Yakudayeva.

Qulaylik

Buxoro. Prezidentimizning 2018 yil 21 iyundagi 461-sonli qarori asosida yashab turgan uy-joylariga egalik huquqi bo'lmagan Qorako'l tumanining 6352 nafar fuqarosiga egalik huquqi berildi.

— Shuningdek, yaqinda aholiga qulaylik yaratish maqsadida hukumatimiz tomonidan eng so'ngi texnologiyalar bilan jihozlangan shinam ma'muriy bino foydalanishga topshirildi, — deydi viloyat “Yermulkkadastr” DK bosh muhandisi Ma'ruf Atakov.

Shavkat Nosirov.

Salomatlik seminari

Samarqand. O'zbekiston Respublikasi Oliy Majlis Qonunchilik palatasi va Sog'­liqni saqlash vazirligi hamkorligida namunali birlamchi tibbiyot muassasalarini tashkil etish hamda unga qo'yiladigan talablarga doir seminar o'tkazildi. Marosimda viloyat hokimi Erkinjon Turdimov, Oliy Majlis Qonunchilik palatasi Spikeri Nuriddinjon Ismoilovlar so'zga chiqib, tibbiyot sohasini rivojlantirish borasida amalga oshirilayotgan ishlar xususida to'xtaldilar. Tadbir davomida viloyatdagi tez tibbiy yordam shoxobchalariga 20 ta maxsus “Damas” avtomashinalari topshirildi.

Orif Xoliqulov.

“Yosh qutqaruvchi”

Navoiy. Qiziltepa tumanida maktab o'quvchilari o'rtasida “Yosh qutqaruvchi” musobaqasi o'tkazildi. O'zbekiston Mudofaasiga ko'maklashuvchi “Vatanparvar” tashkiloti Qiziltepa tumani O'STK, mudofaa, xalq ta'limi bo'limi hamkorligida tashkil etilgan musobaqada hududdagi 4-, 13-, 22-, 33- va 42-umumta'lim maktabi jamoalari o'zaro bellashdi.

Aholi, ayniqsa, yoshlarni favqulodda vaziyatlarda to'g'ri harakat qilishga tayyorlash, ularning bilim va malakasini oshirish, chaqqonlik, chidamlilik va tezkorligini oshirish maqsadida tashkil etilgan musobaqada ishtirokchilar 5 ta shart asosida kuch sinashdi.

X. Ahmadjonova.

Suv keltirgan elda aziz

Xorazm. Ayni kunlarda hudud ahlining quvonchi cheksiz. Yangi ichimlik suv tarmoqlarini qurish va suv tarqatish inshootlarini rekonstruksiya qilish ishlari yakunlanib, birdaniga 5 ta ob'yekt foydalanishga topshirildi.

Investitsiya hamda Orolbo'yi mintaqasini rivojlantirish dasturlari doirasida Xazorasp tumani, Pitnak shahrida “Obod qishloq” va “Obod mahalla” dasturlariga kiritilgan sutkasiga 4000 m3 ichimlik suvini yetkazib beruvchi suv tarmoqlari qurildi. Umumiy qiymati 1,9 mlrd. so'm hajmdagi qurilish-montaj ishlari bajarilib, foydalanishga topshirildi.

D. O'ralova.