Betimsol baxt ko'lami

Onajon – Vatan, hur O'zbekiston, keyingi davrda yillarga “Xalq bilan muloqot va inson manfaatlari yili”, “Faol tadbirkorlik, innovatsion g'oyalar va texnologiyalarni qo'llab-quvvatlash yili”, ortidan esa “Faol investitsiyalar va ijtimoiy rivojlanish yili” nomlari berilib, shu asno yukdor Davlat dasturlari qabul qilindi. Besh yilning rivoju fayzu barokotini reja qilgan Harakatlar strategiyasi harakatga tushib, ularning berayotgan ne'matlari har qadamda namoyon bo'layotir. Shu asno navqiron viloyatimizda ham bu fayzli evrilishlar izchilligini har kentu tumanda kuzatish mumkin.

Navoiy viloyatining Qiziltepa tumani misolida so'z yuritadigan bo'lsak, bu hudud — azal-azaldan piri komil dehqonlar, tadbirkorlar, hunarmandlar, ishbilarmonlar, mirishkorlar yurti. Ushbu hudud ahlining yuqoridagiday fazilatlarini Istiqlol davri chandon yuzaga chiqardi. Aslini olganda, keyingi 4-5 yil ichida bu yuksalish keskin burilishlar tarzida namoyon bo'lmoqda. Qator-qator supermarketlar, to'yxonalar, servis va xizmat ko'rsatish majmualari, savdo nuqtalari, butunlay zamonaviy qiyofa kasb etgan bozorlari, ishlab chiqarishning ming bir turini tashkil etib, shunga muvofiq chet el investitsiyasini olib kirib, yurtning fayzu barakasini ziyoda etayotgan ishbilarmonlari bilan e'tirof qilishga arziydigan go'shaga aylanayapti. Un zavodi deysizmi, yog' zavodini xohlaysizmi, chinni yoki adras ishlab chiqaruvchi tadbirkoru hunarmandlar qiziqtiradimi, barini bizning hududdan topish mumkin.

“Obod qishloq”, “Obod mahalla”, “Obod markaz” dasturlari doirasida bugun har go'sha, har qaysi hududda juda katta bunyodkorlik ishlari amalga oshmoqda. Birgina Karmana tumanida, xususan, Shibzon, Olchin, Urganji qishloqlarida ibratli ishlar amalga oshirildi. 8,3 kilometr­dagi elektr tarmog'i yangilandi (viloyat miqyosida bu raqam 474 kilometr), 14,5 kilometr yo'lga asfalt yotqizildi (viloyat miqyosida 779 kilometr), 22 kilometrga toza ichimlik suvi (viloyat miqyosida 267 kilometr), 7,5 kilometrga tabiiy gaz ulandi. 3ta MTM, 2 ta maktab, QVP va MFY binolari kapital ta'mirlandi.

Ne baxtki, ayni shu tuman markazini “Obod markaz” dasturi doirasida obodonlashtirish ishlari ham bugun davom etyapti. “Yangi Karmana” loyihasi bo'yicha Alisher Navoiy,  Mirsaid Bahrom nomli hamda “Dehqon” kabi mahallalarida qurilish, ta'mirlash va obodonlashtirish ishlari izchil davom etmoqda. Jarayon butun markazni qamrab olishi ko'zda tutilgan. Shu asno hududda 8 ta ko'p qavatli turar-joy binosi, qator savdo va ko'ngilochar maskanlar majmuasi, birinchi qavatida savdo va maishiy xizmat ko'rsatish shahobchalari bo'lgan 10 ta 7 qavatli turar-joy binosi, 1 ta mehmonxona qurilishi amalga oshiriladi. 2023 yilgacha 57 kilometrli kanalizatsiya tarmog'i o'tkazilishi ham rejalashtirilgan bo'lib, bu ham das­tur doirasidagi ishlardandir.

Xullas, bugun bag'ringda yashovchi har qaysi Hazrati Insonning senga va viloyatimizdagi har bir go'shaga qaraganda, tilu dilida shunday jumlalar jaranglab sado beradi:

Onajon-Vatan, hur O'zbekiston, mahobatli tog'laring, shaffof-zilol buloqlaring, jazirama cho'l-sahrolaring, hamma-hammasi bilan barchamizga suyuksan! Har giyoh-yaprog'ing, har zarra tuprog'ing ardog'i yuragimizda, ruhimiz-jonimizda yana. Bag'ringda otgan tong, o'tgan kun baxtning iforini taratadi.

Yaqindagina ozod-hurligingning 28 yilligi nishonlangan ulug' to'y kunlarida bag'ringdagi ne-ne ko'rkam bunyodkorliklarning guvohi bo'ldik. Aytaylik, Navbahor tumanida muhtaram Yurtboshimiz Shavkat Mirziyoyev tomonidan ilgari surilgan 5  muhim tashabbus doirasida qiymati 5 milliard so'mlik “Tashabbuslar xiyoboni”, Navoiy shahrida ham 6 milliard so'mlik “Yoshlar xiyoboni”, “Ma'rifat bog'i”, “Tashabbuslar sayilgohi” bunyod bo'ldiki, ular viloyatimiz yoshlariga chinakamiga bayram tuhfasi bo'ldi. Viloyat miqyosida “Obod qishloq”, “Obod mahalla”, “Obod markaz” dasturlari doirasida esa 25 ta qishloqda 352,2 milliard so'mlik bunyodkorlik ishlari davom etayapti. Uning bir qirrasi sifatida barcha hududlarda 1032 ta, xususiy tadbirkorlar tomonidan esa 1123 xonadonli ko'pqavatli uy-joylar qurilayotgani ham fikrimizning yorqin isbotidir. Navoiy va Zarafshon shaharlarining 5 ta mahallasida 45 milliard so'mlikdan ziyod qurilish va obodonchilik ishlari olib borilmoqda. Xatirchi tumanining Tamabahrin, Bog'ishamol, Langar mahalla fuqarolar yig'inlarida esa yigirmalab arzon va bejirim turar-joy binolari, barobariga 50-60 o'rinli MTMlar qad rostlab, maktabu qishloq oilaviy poliklinikalari go'zal bir tarzda ta'mirdan chiqarildi.

Xullas, bu harakatlarning barchasi yurtimiz chiroyiga chiroy, aholining fayzu barokotiga yanada ziyoda fayzu futuh qo'shayapti. Xalqimizga berilgan ana shu ne'matlarning, aniqrog'i, Baxtning ko'lami betimsoldir.

Salima Umarova,

O'zbekiston Yozuvchilar uyushmasi a'zosi.