Sirdaryo: Faxr-iftixorga yo'g'rilgan diyor

Yaqinda bir guruh ustoz-jurnalistlar, adabiyot va san'at ahli vakillari bilan birga Sirdaryo viloyatida bo'lib, bu yerda davlatimiz rahbari tashabbusi bilan bunyod etilgan Halima Xudoyberdiyeva nomidagi ona tili va adabiyoti fanini chuqur o'qitishga ixtisoslashtirilgan maktab-internati, rekonstruksiya qilingan viloyat musiqali drama teatri, Yangier shahrida qad rostlagan sihatgoh ishga tushirilishiga bag'ishlangan tadbirlarda ishtirok etdik.

Hududlar ko'rkiga-ko'rk qo'shgan ushbu bir-biridan chiroyli ob'yektlarning tashqi ko'rinishi, ichki me'moriy yechimi, ularda yaratilgan shart-sharoitlarni o'z ko'zim bilan ko'rib, rosti, qalbim faxr-iftixorga to'ldi. Ming marta eshitgandan bir marta ko'rgan afzal ekanini yana bir bor dildan his qildim.

Prezidentimiz tashabbusi bilan Guliston shahrida bunyod etilgan Halima Xudoyberdiyeva nomidagi ijod maktabi qurilish arxi­tektyra­sining o'ziga xosligi, betakror dizayni shunday deyishga turtki beradi.

Ta'lim dargohiga kiraverishda o'rnatilgan H.Xudoyberdiyevaning mahobatli haykalining o'ng va chap tomonlarida milliy va zamonaviy uslubda bunyod etilgan ikkita ajoyib ayvonga ko'zingiz tushadi.

Hamrohlar bilan maktab binosi ichki qismi bilan tanishar ekanmiz, kitobga boy kutubxona, media-markaz, soatiga ming nusxa gazeta, jurnal va kitob chop etishga mo'ljallangan kichik bosmaxona, o'quv va yotoqxonalarining joylashuv va jihozlanishi e'tiborimizni tortdi. Maktab muzeyida sevimli shoiramiz hayoti va ijodiga oid ko'plab eksponatlar, xususan, fotosuratlar, kitob­lar bilan tanishish mumkin. Bu yerdagi uchta katta-kichik faollar zalida har qanday tadbirni yuqori darajada tashkil etish uchun keng imkoniyat va qulayliklar muhayyo etilgan. Shuningdek, yopiq va ochiq sport zali va maydonlari mavjud.

Ijod maktabida yaratilgan shart-sharoitlar bilan tanishish chog'ida bu yerda ta'lim olayotgan o'quvchilar bilan suhbatlashdik. Zul­hayo Mingboyeva ijod maktabining 5-sinfida o'qiydi. Xovos tumanining Qayirma qishlog'ida tug'ilgan. Bolaligidan kitobga, adabiyotga mehri o'zgacha bu qiz tumandagi 23-umumta'lim maktabida boshlang'ich ta'limni olgan, adabiyotga qiziqishi baland, she'rlar mashq qiladi. Uning ayrim ijod namunalari “Sirdaryo haqiqati”, “Ma'rifat ko'zgusi” va “Tong yulduzi” singari gazetalarda e'lon qilingan.

Zulhayoning “Qayirmalik polvonlar” ilk she'riy to'plami chop etilgan. Yurtboshimiz rahbarligida ushbu ijod maktabining qurilib, foydalanishga topshirilishi Zul­hayo singari ko'plab iqtidorli o'g'il-qizlar uchun katta imkoniyat eshiklarini ochdi, boshqacha aytganda, ayni muddao bo'ldi.

Sirdaryo viloyati hokimi G'ofurjon Mirzayev ijtimoiy tarmoqlar orqali berilgan savollarga javob berar ekan, jumladan shunday dedi:

— Jurnalist va blogerlarga munosabatim hamisha do'stona bo'lib kelgan. Do'st achitib gapiradi deganlaridek, jurnalistlarni va blogerlarni hamisha haqiqatgo'yliklari, adolatparvarliklari uchun hurmat qilaman. Jurnalistlar tabiatan to'g'riso'z va samimiy bo'lishadi. Adolatparvar bo'lmagan odam hech qachon jurnalist bo'lolmaydi, so'zning orqasidan non topib yeyaolmaydi, o'z kasbini sharaflay olmaydi. Chunki, jurnalistika yolg'onni yoqtirmaydi.

Maktabda ona tili va adabiyoti fani chuqurlashtirilgan holda o'qitiladi. “Adabiyot”, “She'riyat gulshani”, “Yosh kitobxon”, “Jurnalistlar sabog'i” kabi to'garaklar faoliyati yo'lga qo'yilgan. Doimiy ijodiy muloqot va mashg'ulotlarning tashkil etilishi, ta'lim jarayonida o'quvchilarning ijodiy salohiyatini o'stirib borishga alohida e'tibor qaratilayotgani yaqin kelajakda o'z samarasini berishiga shubha yo'q.

— Zulhayo she'riyatga juda qiziqadi, — deydi adabiyot fani o'qituvchisi, xalq ta'limi a'lochisi Mohidil Ziyayeva. — Bu qizimizning she'rlari dastlab vazn va qofiyaga unchalik tushmasdi. U maktabimizdagi “She'riyat gulshani” to'garagiga qatnashib, bu borada ustozlari sabog'ini olib ana shu kamchiliklarini bartaraf etdi.

Maktab-internat direktori Muham­mad Ismoilovning aytishicha, hozir muassasada 120 nafar o'quvchi ta'lim olmoqda, 25 nafarining birinchi she'riy kitobi chop etilgan, 15 nafari viloyat fan olimpiadalari g'olibi, yana sportning ko'pgina turlari bo'yicha viloyat chempionlari tahsil oladi.

*  *  *

Keyingi yillarda Prezidentimiz tomonidan aholi salomatligini mustahkamlash, tibbiy xizmat sifatini yuksaltirish, yurtdoshlarimizning dam olishi va sog'lig'ini tiklashi uchun qulay shart-sharoitlar yaratish masalalariga jiddiy e'tibor qaratilmoqda. Ana shu ishlar doirasida yangi sihatgohlar qurilib, ishga tushirilayotgani quvonarli.

Endilikda yurtimizdagi sanatoriylar yana bittaga ko'paydi. Sirdaryo viloyatiga safarimiz davomida Yangier shahrida barpo etilgan ajoyib tibbiy va dam olish maskanining foydalanishga topshirilish marosimida ham qatnashdik.

Mazkur viloyatda shu kuni bo'lib o'tgan asosiy tadbirlarda O'zbe­kis­ton Respublikasi Prezidenti maslahatchisi Abdujabbor Abduvohidov, Sirdaryo viloyati hokimi G'ofur Mirzayev, O'zbekiston kasaba uyushmalari Federatsiyasi raisi Qudratilla Rafiqov, Sog'liqni saqlash vaziri Alisher Shodmonov, “Nuroniy” jamg'armasi Respublika boshqaruvi raisi Shuhrat Jalilov, shuningdek, hamkor tashkilot va idoralar vakillari, viloyat faollari ishtirok etdi.

Ochilish marosimida ta'kidlanganidek, mazkur sanatoriyni qurish va uni eng zamonaviy tibbiy diagnostika jihozlari bilan ta'minlashga O'zbekiston kasaba uyushmalari hisobidan 84 milliard so'm sarflangan. Bir vaqtning o'zida 250 nafar kishi dam olib o'z salomatligini tiklashi mumkin bo'lgan “Yangier” sanatoriysi joylashish hududi, tabiati, minerallarga boy shifobaxsh suvi bois, kardiologik, nevrologik, ginekologik, urologik, harakat-tayanch kasalliklarini davolashga ixtisoslashtirilgan.

Ushbu shifo maskani nafaqat sirdaryoliklar, balki mamlakatimizning boshqa hududlarida yashovchi aholiga ham xizmat qiladi.

*  *  *

Sirdaryo viloyat musiqali drama teatrining qayta ta'mirdan chiqqan binosining ochilishiga bag'ishlangan marosimda O'zbekiston xalq artisti Yoqub Ahmedov istiqlolimizni, o'zligimizni namoyish etuvchi, tarixiy buyuk siymolarimiz va zamonamiz qahramonlari obrazini aks ettiruvchi eng sara spektakllar namoyish etilishi, ushbu teatr hamisha muxlislar bilan gavjum bo'lishiga ishonch bildirdi.

Ta'kidlash joiz, teatr san'ati xalqimizning ma'naviyati, madaniyatini yuksaltirishda katta ahamiyatga ega. Shuning uchun ham yurtimizda bunday san'at koshonalari faoliyatini yanada takomillashtirish va rivojlantirishga ustuvor vazifalardan biri sifatida qarab kelinmoqda.

O'zbekiston xalq artistlari Elyor Nosirov, Mirza Azizov, O'zbekistonda xizmat ko'rsatgan artistlar Fatxulla Ma'sudov, Gulchehra Ibrohimbekova, Mahfuza Bobotillayeva kabi taniqli akt­yor va aktirisalarimiz ishtirok etgan mazkur tadbir doirasida teatrda tomoshabinlar va ijodiy jamoa uchun yaratilgan shart-sharoitlar, uning hududida tashkil etilgan xalq amaliy san'ati hamda milliy hunarmandchilik buyumlari ko'rgazmasi bilan tanishdik.

Kun sayin chiroy ochayotgan Gulis­ton shahrida yangi bino va inshootlarning qurilishi barobarida mavjudlarining zamon talabi darajasida ta'mirlash ishlariga ham alohida e'tibor qaratilayotganiga guvoh bo'ldik.

Xolmurod Salimov,

O'zbekiston Jurnalistlari

ijodiy uyushmasi raisi o'rinbosari.