O'lim duosini kim daf qila oladi?

Hayotda ba'zan yetti uxlab tushingga kirmaydigan g'alati hodisalar ham uchrab turar ekan. Bo'lmasa… odam odamga o'lim tilashini qanday tushunish mumkin? Aslida bu voqea shunday bo'lgan edi.

— Ha, ishonavering sizga va oila a'zolaringizga o'lim duosi yog'ilgan, — dedi Xiva tuman Soyot qishlog'i Oq ko'l MFYda yashovchi uyga kirib kelgan opa-singil G. va Z.Abdullayeva (ism-sharifi o'zgartirilgan)lar. Bundan xonadon sohibasining esxonasi chiqib ketdi.

— Voy o'lmasam, endi nima bo'ladi?

— Hech narsa bo'lmaydi, biz buning chorasini topamiz.

Ular es-hushidan ayrilayozgan ayolning sotilish bahosi 2.700.000 so'm “kardinal” tilla zanjiri, bir juft sotilish bahosi 1.620.000 so'mlik “jemchug” tilla ziraklari, sotilish bahosi 1.080.000 so'mlik tilla uzugi, sotilish bahosi 13.000 so'mlik “Yantar” kungaboqar moyi, sotilish bahosi 25.000 so'mlik “Clear” shampuni va sotilish bahosi 3000 so'mlik kir yuvish sovunini qo'lga kiritishib, uning jami 5.441.000 so'mlik mol-mulkini firibgarlik yo'li bilan o'zlashtirishadi.

Opa-singillar tilla taqinchoqlarni olib, ro'molga o'raganini, o'lim duosini ochish uchun duo qilishganini aytib, ro'molni uyning yotoqxonasidagi shkaf ustiga tashlaydilar. Ro'­molga o'ralgan taqinchoqlarni uch kungacha ochmaslikni, yetti kun bu haqda hech kimga aytmaslikni tayinlashadi. Ayollar uydan chiqib ketganidan keyin jabr­lanuvchi ro'molni ochib qarasa, ichidan qotgan non bo'lagi chiqqan xolos. Bu haqda darhol IIBga murojaat qiladi…

Sud tomonidan jinoyat ishidagi mavjud dalillar va guvohlar ko'rsatmalari har taraflama, sinchiklab  tekshirilib, sudlanuvchilarning ayolligi, oilaviy ahvoli, yetkazilgan zararlar qoplangani inobatga olinib, ularga nisbatan O'zbekiston Respublikasi JKning 168-moddasi 2-qismi “b” bandi bilan ayb­lov hukmi chiqarildi.

Xonadon egasi keyin bilsa, bu opa-singillar baklashka yig'uvchi niqobidagi firibgarlarning o'zginasi ekan. Attang, odam shu darajada ishonuvchan, laqma bo'ladimi, axir?!

Birovlarning mol-mulkini “tuya” qiladigan bunday firibgarlarning tuzog'iga ilinmang, azizlar.

M.Hasanov,

jinoyat ishlari bo'yicha Xiva tuman sudi raisi.

Sherjon Masharipov,

“Xiva tongi” gazetasi bosh muharriri.