Men nima uchun “Hurriyat”ni o'qiyman?
“Ismda xosiyat bor”, deyishadi. Shuning uchun bo'lsa kerak, odamlar dunyoga yangi kelgan chaqaloqdan tortib nom qo'yish talab qilinadigan barcha narsalarga ma'noliroq ism qo'yishga harakat qilishadi. Ammo har doim ham ism jismga mos kelavermaydi. Deylik, “Baxt” deb atalgan joyda baxtiyorlardan ko'ra baxt kutganlar ko'p yoki “Samo” degan makon bir juft oyoq sig'adigan darajada tor.
“Hurriyat”ni erkni chinakam istagan kishilarning yurak zarblarini berayotgani uchun yaxshi ko'rib o'qiyman. Nashrning jo'g'rofiyasida ham, chertib-chertib berayotgan mavzularida ham, odamlarning til uchiga kelib turgan muammolarni maydonga tashlab, o'quvchilarni uyg'oqlikka chorlayotganida ham, bir so'z bilan aytganda, barcha sahifalaridan o'sha “Hurriyat” degan faqat bizga emas, millatimizning ozod yashashini istagan barcha zamonlardagi maslakdoshlarimizga aziz bo'lgan so'zning nafasi kelib turadi. Har gal gazetani o'qiganimda o'sha nafasga nafasim tutashadi, o'zimni kengayib, balandlab borayotganday sezaman.
Aziz yurtdoshlar, 2021 yil uchun obuna davom etmoqda. “O'zbekiston pochtasi” AJ va “Matbuot tarqatuvchi” AK hamda sohaga daxldor korxonalar orqali obunani rasmiylashtirishingiz mumkin.
Nashr indeksi: 233