Yosh jurnalistlar viloyat nashrlarida nega kam?
Jizzax viloyatida jurnalistika sohasiga qiziqqan yoshlarning bilim va malakasini oshirish, iste'dodlarini namoyon etishlariga ko'maklashish, ommaviy axborot vositalarida yosh kadrlar zaxirasini shakllantirish, yosh jurnalistlarning yuksak madaniyat egasi bo'lishga chorlash maqsadida amalga oshirilayotgan loyiha o'z faoliyatini boshladi.
O'zbekiston Respublikasi Oliy Majlisi huzuridagi Nodavlat notijorat tashkilotlarni va fuqarolik jamiyatining boshqa institutlarini qo'llab-quvvatlash Jamoat fondining granti asosida O'zbekiston Jurnalistlari ijodiy uyushmasi Jizzax viloyati bo'limi qoshida “Yosh jurnalistlar” maktabi tashkil etildi. Shuningdek, 8 oyga mo'ljallangan loyiha doirasida uyushma bo'limining “jurnalistika.uz” rasmiy sayti yaratildi.
Shuni ham aytish kerakki, ayrim hollarda yosh jurnalistlar o'z materiallarini qaysi OAVda chop ettirishni bilmaydi. Ularga zamonaviy axborot texnologiyalaridan, markaziy davriy nashrlar saytidan foydalanib ish yuritishni o'rgatish va boshqa ijtimoiy tarmoqlarga joylashtirishlari uchun shart-sharoit yaratish ham muammo bo'lib qolmoqda edi.
Endilikda maktab tinglovchilariga matbuot, televidenie, radio, internet jurnalistika va fotojurnalistika yo'nalishlari bo'yicha yetuk mutaxassislar tomonidan bilim va mahorat darslarini o'tkazish belgilangan bo'lib, dastlabki mashg'ulotlar O'zbekiston jahon tillari universiteti Xalqaro jurnalistika fakulteti dotsenti, O'zbekiston jurnalistlarni qayta tayyorlash markazi treneri Nargis Qosimova tomonidan o'tkazildi.
Shuningdek, mashg'ulotlarni viloyatdagi matbuot tizimida ishlayotgan tajribali jurnalistlar — “O'zbekiston 24” telekanalining viloyat bo'yicha muxbiri Dilmurod Abdurahimov, viloyat teleradiokompaniyasi, radio guruhi bosh muharriri Sayyora To'xtayevalar til va uslublar, axborot va tahliliy materiallar tayyorlash bo'yicha tinglovchilarning bilim va mahoratini oshirmoqdalar.
Mazkur loyihani amalga oshirishda viloyatning shahar va tumanlarida istiqomat qilayotgan, jurnalistika va blogerlik sohasiga qiziqqan yoshlar ma'lumotlar bazasi ham yaratiladi.
Loyiha doirasida yaratilgan “jurnalistika.uz” rasmiy sayti va telegram ijtimoiy tarmog'idagi kanali orqali boshlovchi muxbirlarning barcha yo'nalishdagi materiallari muntazam yoritib borilishi ta'minlanadi.
Bundan tashqari, yosh jurnalistlarning “Eng yaxshi material” yo'nalishida tanlov o'tkazish tartibi ham belgilab olindi. 27 iyun — Matbuot va OAV xodimlari kuni bayrami arafasida barcha yo'nalishlar bo'yicha tanlov g'olib va ishtirokchilari qimmatbaho sovg'alar bilan rag'batlantiriladi.
Bugungi kunda viloyatda 27ta bosma ommaviy axborot vositalari, 1ta viloyat televideniesi, 1ta viloyat radiosi, 1ta nodavlat telekanali, shuningdek, tuman hokimliklari, boshqarmalar tasarrufidagi Axborot va matbuot xizmatlari faoliyat ko'rsatmoqda.
O'tkazilgan tahlil natijasi shuni ko'rsatmoqdaki, bugungi kunda eng muhim sohalardan biri bo'lgan jurnalistika sohasida yosh kadrlar yetarli emas. Viloyatdagi OAVlarda hozirda 25 yoshgacha bo'lgan qalam tebratayotgan yoshlar atigi 6 nafarni tashkil etib, shulardan 1 nafarigina matbuot yo'nalishida, qolgan 5 nafari televidenie va radioda ishlaydi.
Shunday ekan, viloyat OAVlarida asosan yoshi katta avlod jurnalistlari qalam tebratayotganini e'tiborga olganda, yoshlarni bu sohaga ko'proq qiziqtirish hamda bilim va tajriba egallashida, eng muhimi, barcha qulay shart-sharoitlarni yaratishda loyiha doirasida qilinayotgan ishlar beiz ketmaydi, albatta.
Nodira ALIMOVA,
loyiha rahbari