Vahimaga o'rin yo'q, lekin…

Ming afsuski, bir yildan ko'proq vaqt o'tsa ham, hamon butun dunyo nigohi soat sayin o'sib borayotgan kasallik aniqlanganlar ko'rsatkichida bo'lib qolmoqda. Odamning eslagisi ham kelmaydi. Qancha kulfat, tashvish keltirdi bu ofat. Koronavirus balosidan qachon butkul xalos bo'lar ekanmiz? Hozircha hech kim bir nimarsa deb aytolmas…

2020 yil yakunida yurtimizdagi vaziyat biroz yengillashganday bo'ldi, nazarimizda. Oqibatda yangi yilga o'tar-o'tmas himoya niqoblaridan deyarli voz kechdik, karantin qoidalari ham esdan chiqdi. Ommaviy tadbirlar, to'yu ma'rakalar avjiga chiqib, an'anaviy hayot tarziga endi qayta boshlagandik hamki, na iloj, “kuy avjida uzildi tor” — joriy yilning 15 mart sanasidan boshlab koronavirusga chalinish holatlari yana orta boshladi…

Ma'lumotlarga qaraganda, 2021 yilning mart holatiga ko'ra, Toshkent shahrining 10 tumanidagi 77ta umumta'lim maktabida jami 150 nafar o'quvchiga koronavirusdan zararlanish tash­­xisi qo'yilgan. Bundan tashqari, 24ta maktabning 31 nafar o'qituvchisida; 13 ta maktabgacha ta'lim muassasalarining 15 nafar tarbiyalanuvchisi va 8 ta MTMning 8 nafar tarbiyachisida; 9 ta oliy ta'lim muassasasining 25 nafar talabasi va 5 ta oliy ta'lim muassasasining 7 nafar o'qituvchisida; 6 ta litseyning 7 nafar o'quvchisi va 4 ta litseyning 4 nafar ustoz-o'qituvchilarida koronavirus infeksiyasi aniqlangan.

Tan olish kerak, markaz joylarda jarima to'lamaslik uchungina niqob taqib, o'zimiz va atrofdagilar sog'lig'iga mutlaqo befarq bo'lib qolgandik. So'nggi paytlarda televideniedagi ko'rsatuvlarda ham (masalan, “Bolajon” telekanalining bir loyihasida topishmoq aytiladi, jamoaga bo'lingan bolalar esa o'z guruhdoshlari bilan quchoqlashib, masofa saqlamasdan savolga javob qidiradilar va hokazo) karantin qoidalari deyarli buzilib, targ'ibot ishlari amalga oshirilmay qo'ymoqda. Jamoat transportlari, bozor va boshqa shu kabi odam gavjum joylarda ham antiseptik vosita, himoya niqoblaridan foydalanmayapmiz, hisob. Tumanlarimizdagi ahvolni esa aytsang til, aytmasang dil kuyadi. Viloyatlarga borib ko'rgan biladi, odamlar xuddi karantin tartib-qoidalari ularga aloqasi yo'qdek bemalol yurishibdi…

Kasallikning “isi” chiqqan ilk kunlari kuzatilgan tanqisliklar yodingizdami? Bozor va do'konlarda kartoshka va boshqa mahsulotlar tanqis bo'lib, “yo'qolib” qolgani-chi?

Dorixonalarda tanqis dorilarning topilmay qolganlari-chi?

… Joriy yilning 15 mart kuni Toshkent shahri hokimi Jahongir Ortiqxo'jayev boshchiligida maxsus komissiya yig'ilishi o'tkazildi. Shu kundan boshlab poytaxtda karantin talablariga rioya qilinishi qat'iy nazoratga olina boshladi. Respublika bo'yicha ham bu kabi tadbirlar o'tkazish va targ'ibot ishlarini ko'paytirib, nazoratni kuchaytirish yo'lga qo'yilmoqda…

Birinchi navbatda o'zimiz qanday davrda yashayotganimizni chin dildan his qilmay, oila a'zolarimiz va yaqinlarimizni nazoratga olmasak, ko'rilayotgan choralar zarracha natija bermaydi.

Dunyoni o'zgartirish niyati bor odam ishni o'rnini tartibga keltirishdan boshlaydi. Shunday ekan, eng avvalo, o'zimiz o'zimizni nazorat qilsakkina, hammasi yaxshi bo'ladi.

Abdulaziz ABDUVALI o'g'li

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

twenty − 4 =