Yaqinroq borsang, yaxshiroq ko'rinadi…
O'zbekiston “Milliy tiklanish” demokratik partiyasi Markaziy Kengashi, partiyaning Oliy Majlis Qonunchilik palatasidagi fraksiyasi a'zolari hamda partiyaning “Deputat ayollar klubi” tashabbusi bilan Buxoro viloyatida “Ayollar daftari”, “Yoshlar daftari”ga kiritilgan xotin-qizlar va yoshlarning muammolarini o'rganish, ularni imkon qadar joyida hal etish maqsadida yaqinda Buxoro viloyatida “Sayyor qabul” tashkil qilingan edi.
Ishchi guruh a'zolari, tuman ijro hokimiyatlari, prokuraturasi, ichki ishlar, bandlikka ko'maklashish bo'limlari kabi bir qator tashkilot va muassasalarning vakillari ishtirokida o'tkazilgan “Sayyor qabul”da “Ayollar daftari”, “Yoshlar daftari”ga kiritilgan xotin-qizlar, yoshlar tomonidan 2 yoshgacha bo'lgan bola nafaqasi, oromgohlarga yo'llanma olish, bandlik, tadbirkorlik bilan shug'ullanish uchun imtiyozli kredit olish, uy-joy ta'miri, oilaviy munosabatlarni qayta tiklash, shuningdek, subsidiya orqali uy-joy olish kabi bir qancha masalalarda og'zaki va yozma tarzda kelib tushgan 300 ga yaqin murojaatlar o'rganildi, ayrimlari ijobiy hal etildi, qolganlari mas'ullar tomonidan nazoratga olindi.
To'g'ri, bugun barcha muammolarga birdaniga yechim topish, ularni hal etishning iloji bo'lmas. Ammo shunday masalalar borki, arzimagan vaqt evaziga bitadigan ishlar ham ba'zi bir mahalliy mutasaddilarning beparvoligi sabab muallaq holda qolayotgani odamlarni qiynayotgani ayon bo'lmoqda. Quyida taniqli shoira, Oliy Majlis Qonunchilik palatasi deputati Farida Bo'tayevaning ayni shu safar davomidagi kechinmalari, taassurotlari o'rin olgan…
Shukronalik
Men poezdda Toshkentdan Buxoroga qarab yo'l olar ekanman, fikrim kahkashonida “Buxoroi Sharif” degan tovush qayta-qayta jaranglayverdi. Nega bu maqom dunyoning faqat ayrim shaharlarigagina nasib qilganligi haqida o'yladim. Nega, ajdodlarimiz bu qadar “sharif” so'ziga izzat ko'rsatganlar?!… Sharif so'zi arab tilidan olingan bo'lib olijanob, aslzoda ma'nolarini anglatadi. Muhammad (s.a.v) avlodlarining nomiga qo'shiladigan hurmat so'zi. O'rta asrlardan boshlab 7 shahar; Makka, Madina, Quddus, Bag'dod, Damashq, Mozori Sharif va Buxoroi Shariflari diniy markaz sifatida shuhrat qozongani uchun, ularga “Sharif” so'zi qo'shib aytiladigan bo'lgan. Bunday martabaning boisi nima ekan? To'g'rirog'i kim yoki kimlar ekan? Dunyoni zir titratgan ilm ulamolari Yetti Pirlar, Bahouddin Naqshbandmi yo? Arablarga-da Payg'ambarini tanitgan, u Zoti Oliyning har so'zlarini joni evaziga, nafasi evaziga yig'ib, jamlab islom olamiga nur taratgan zot Imom Buxoriydir, balki?..
Bu yurt o'z Pirlarini bilarmikinlar, tanirmikinlar? Tomirlarida oqayotgan qonning, bosayotgan tuproqning qanchalar muqaddas ekanligini anglarmikinlar? Balki, bilganlarida bugun yomg'irday yog'ilayotgan muammolar, nizolar, norizoliklar, sabrsizliklar, xasad va insofsizliklar ro'y bermasmidi?..
O'zbekiston Milliy Tiklanish DPdan Oliy Majlis Qonunchilik Palatasiga saylangan deputat va markaziy qo'mita ayollari Buxoroi Sharifdagi muammolarni o'rganishga kirishar ekanmiz, arizachilar oldida ko'ndalang bo'lib turgan masalalar ajdodlari qoldirib ketgan buyuk yechimlar oldida nihoyatda mayda va hech gap emasligi ularni biroz sabr, shukur, g'ayrat, e'tibor, intizom, odob va mehr bilan bitadigan yumush ekanligini tushuntirishga harakat qilamiz…
Xatolar jabri
— Men uysizman, erim tashlab ketgan, chunki, uning o'z oilasi va 5 nafar farzandi bor, — deb, so'z boshlaydi Dilbar, ikki yoshlar chamasidagi uxlab qolgan o'g'lini ko'ksiga bosib.
— Ota-onangiz, qarindosh-urug'ingiz yo'qmi?, — deb so'raymiz.
— Bor, ammo ular mendan voz kechishgan. Ota-onam uyga kiritmaydilar. Chunki, men xato qildim, adashdim…
Bu ayolni tinglar ekanmiz, hech qaerda o'qimaganligi, biror-bir hunari ham yo'q ekanligi, endi esa nochor ahvolda, boshi berk ko'chaga kirib qolganligini ko'rib achinasan. Kollejda o'qib yurgan paytidagi aqlsizligi, o'zidan ancha katta kishi bilan noto'g'ri yo'lga kirgani, erta tug'uruq, erta qiyinchiliklar, erta muammolar girdobi…
Bugun esa uysiz, boquvchisiz, mehrsiz, yolg'izlik azobiga mahkumaligi nafaqat uning muammosi emas, balki jamiyat oldiga qo'yilgan og'riqli muammodir.
Nega endi, sening xatoing uchun atrofingdagilar, mahalla, hokimiyat, davlat tovon to'lashi kerak ?! Deputatlar, vazirliklar, turli mutasaddi tashkilotlar sening g'amingni yeyishi kerak?! Shu haqda o'ylaydigan, vijdoni qiynaladigan yoshlar, ayollar, kamayib borayotganligi tashvishga soladi.
Bugungi kundagi shunga o'xshash masalalarning mohiyatiga yechim topmas ekanmiz, ular urchib ketaveradi. Yechimning esa javobi — bilim va faqat bilimdir!
Najot kerak
— Siz bilan alohida gaplashsam maylimi? – deb, jovdirab turgan bir yosh yigitni iltimosiga ko'ra boshqa xonaga kirdik. Uning o'pkasi to'lib, gapirishga qiynalar, ko'zlaridan oqayotgan yoshlarni artib ulgurmas edi. Menga najot kerak, iltimos, meni eshitinglar! – deydi u, chuqur- chuqur nafas olar ekan.
Yonimdagi senator Huseynova Abira Amanovna ikkimiz uni tinchlantirishga harakat qildik.
— Nima bo'ldi? Bir boshidan gapir, bolam, – deymiz.
— Men Mehribonlik uyida tarbiya topganman, u yerdan chiqayotganimda 3 kishiga 1xonadan 3 xonali uy berildi. O'zingiz bilasiz, u uy 5 yilga beriladi. Muddat tugab, u yerdan chiqib ketdim. Ustachilik qilaman. Bir farzandi bor ayolga uylandim. Yana bir bola ko'rdik. Ayolim tug'uruqdan keyin sil kasalligiga duchor bo'lib qoldi. Davolatdim, topgan pulimni hech narsaga yetkaza olmayapman. Ikki farzand, ijarada turamiz, ayolim esa doimo kasalxonada. Hozir 27 kg. bo'lib qolgan, qoq suyak! — deb, ho'ngrab yubordi.
— O'pkasini operatsiya qilsa bo'lar ekan. Bir marotaba qildirdik. Yana bir operatsiya turibdi. Bunga esa hech qaerdan mablag' topolmayapman…
Biz darhol o'sha yerning o'zida Sog'liqni saqlash vazirligiga qo'ng'iroq qildik. Ayoli davolanayotgan shifoxona va bosh shifokor bilan bog'landik. Yordam berishadigan bo'lishdi. Biz esa o'z nazoratimizga oldik.
Mehribonlik uyida tarbiyalanuvchilarning keyingi hayoti, ularning o'qishi, kasb-hunarga ega bo'lishi ham bugungi kundagi eng dolzarb masala ekanligi namoyon bo'ldi.
Farida Bo'tayeva,
Oliy Majlis Qonunchilik palatasi
deputati.