Qobirg'asin sanab qo'ydi shabboda
Munavvara Yusupova
Muallif haqida: Munavvara YuSUPOVA — 1958 yilda tug'ilgan. Toshkent davlat madaniyat institutida tahsil olgan. “Muhabbat yo'li”, “El farzandi”, “Oltin beshik”, “Munis nidolar” she'riy va nasriy to'plamlari chop etilgan.
MEN HAMMAGA do'stman …
Men hammaga do'stman, mening do'stim yo'q
Devona bir umid charchadi, toldi
Xazonrez bog'larning kami, ko'sti yo'q
“Mevalar…” yer bilan bir bo'lib qoldi.
Xazon quchog'ida barq urar xumor,
Ehtiros maysadan gullar tutadi.
Betoqat hayajon ming yildan buyon,
O'zini unutib, kimni kutadi?!
Men hammaga do'stman, mening do'stim yo'q…
* * *
Men o'zimni qolipga soldim,
Bosib, yanchib, chiqmaysan, dedim.
Neki bo'lsa, bo'lar orada
Chegarani yiqmaysan, dedim…
Opam, singlim — kunu tun egiz,
Ular neni bersa olaman.
Ular bilan qolganda yolg'iz…
Men o'zimni tanib qolaman.
* * *
Hayot buncha ko'ylaging go'zal,
O'rik gulin qanday naqsh etding?
Yashillik — bu, hayot deb, avval
Qushlaringga qanot baxsh etding!
Hayot buncha dimog'laring chog',
Gullar hidi sarmast qildimi?
Bir bor kiyib ko'ray deb, shu chog'
Ko'ylagingni…
olganimni, birov bildimi?
HAR ON…
Har tong, har kun, har on
Umid qilib kutaman seni…
Kirib kelar bitta xushxabar,
Beg'uborlik bo'ladi uni…
Har tong, har kun, har on,
Kelishingni kutaveraman…
Sog'inchimdan rangu ro'y somon,
G'arib kulbam, miskin bu chaman…
Har tong, har kun, har on…
Ne'matini berar Xudoyim…
Yuragimni turtkilar hamon,
Sensizlikdan o'tgan bu oyim…
MEHR KETGAN
Mehr ketgan yo'llardan,
Muhabbat yig'lab borar.
Kimga… yetgan yo'llardan,
Muhabbat yig'lab borar.
Ko'z yoshlarini to'kib,
Hayot xamirin qorib,
Kiyimlari so'kilib,
Muhabbat yig'lab borar.
Qaytmadi-ey, qaytmadi,
Mehrjoni qaytmadi.
Aytmadi-ey, aytmadi,
Vidolarin aytmadi.
Mehnatlari qiyin-ey,
Zahmatlari tayin-ey,
Har daqiqa sayin-ey,
Muhabbat yig'lab borar.
Sodda to'ldirar to'rni,
Himoyalar, kim xo'rni,
Berarmi yana qo'rni,
Muhabbat yig'lab borar…
* * *
Qonlarda o'sgan gulim,
Nega kulding?
Dilimni qitiqlagan,
Ko'zimda tonglar otdi…
Jonlarda o'sgan gulim,
Oh, buncha titrayapsan?!
Epkinlardan qo'rqaman,
Kimdir uzmoqchi ekan…
Shonlarda o'sgan gulim,
Qaydan buncha kuch-quvvat?!
Bilasizmi, aslida
Yagona kuch muhabbat, muhabbat…