Navbatdan tashqari umumiy yig'ilish
O'zbekiston Jurnalistlari ijodiy uyushmasining Andijon viloyat bo'limiga rais saylandi
Mamlakatimiz taraqqiyotining yangi bosqichida yanada yuksak ijtimoiy–iqtisodiy salohiyatga ega bo'lib borayotgan Andijon viloyatida barcha sohalardagi keng ko'lamli islohotlar qatori, ommaviy axborot vositalarining ijtimoiy hayotdagi rolini oshirishga ham alohida e'tibor qaratilmoqda.
Yaqinda Andijon shahrida o'tkazilgan O'zbekiston Jurnalistlari ijodiy uyushmasi viloyat bo'limining navbatdan tashqari umumiy yig'ilishida uyushma a'zolari, viloyat hokimligi, ommaviy axborot vositalari vakillari ishtirok etdi. Tadbirda Prezidentimizning 2017 yil 10 avgustdagi “O'zbekiston Jurnalistlari ijodiy uyushmasi faoliyatini yanada takomillashtirish chora-tadbirlari to'g'risida”gi qarori Uyushma faoliyatida dasturilamal bo'lib xizmat qilayotgani, uning milliy media muhitdagi o'rnini kuchaytirish uchun zarur shart-sharoitlar yaratgani, bugungi kunda jamiyat ijtimoiy-siyosiy hayotida jurnalistlarning ishtiroki, o'rni va roli muhim ahamiyat kasb etayotgani xususida so'z yuritildi.
Uyushmaning Andijon viloyat bo'limiga ko'p yillar davomida rahbarlik qilib kelgan, ustoz jurnalist Nazirjon Saidovning samarali faoliyati alohida e'tirof etilib, unga O'zbekiston Jurnalistlari ijodiy uyushmasining tashakkurnoma va esdalik sovg'alari topshirildi.
Taniqli jurnalist N.Saidovning hayot yo'liga nazar tashlasak, 1970-1980 yillarda Andijon va Oltinko'l tuman gazetalarining bosh muharriri lavozimida ishlab, so'ng Oltinko'l tuman ijroiya qo'mitasi raisi o'rinbosari, 1990-1993 yillarda esa Oltinko'l tumani hokimi vazifasida faoliyat olib borgan. Keyingi 14 yil mobaynida esa O'zbekiston Jurnalistlari ijodiy uyushmasining Andijon viloyat bo'limiga rahbarlik qilgan.
Yig'ilishda tashkiliy masala ko'rib chiqilib, to'rt nomzod orasidan “Andijon tongi” gazetasi muharriri vazifasida ishlab kelayotgan Maxpuraxon Artiqova uyushmaning viloyat bo'limiga rais etib saylandi. Ma'lumot uchun: M.Artiqova 1992 yili M.V.Lomonosov nomidagi Moskva davlat universitetini jurnalistika yo'nalishi bo'yicha tamomlagani, “7x7”, “Hissador”, “Iqbol”, “Tibbiyot gulshani”, “Himoya”, “Huquq saboqlari”, “Adolat mezoni” kabi gazetalarda faoliyat olib borgani va o'zining dolzarb mavzudagi maqolalari bilan e'tirofga sazovor bo'lganini ta'kidlash joiz.
Yig'ilishda so'z olgan O'zbekiston Jurnalistlari ijodiy uyushmasi raisi Olimjon O'sarov andijonlik jurnalistlar oldida turgan qator vazifalarga to'xtalib, viloyatda faoliyat olib borayotgan jurnalistlar hamkorligini mustahkamlash, ularni qo'llab-quvvatlash, faol jurnalistlarni ham moddiy, ham ma'naviy rag'batlantirish, faxriy jurnalistlar holidan xabar olish, umuman, barcha OAV vakillarini ezgu maqsad yo'lida jipslashtirish zarurligi haqida gapirdi.
Viloyat hokimligi kotibiyat mudiri Elyorbek Xolmirzayev, O'zbekistonda xizmat ko'rsatgan madaniyat xodimi Abdumutal Abdullayev, O'zbekistonda xizmat ko'rsatgan jurnalist Mukarrama Xolmatova tomonidan Andijonda matbuot, jurnalistika sohasini yanada rivojlantirish yuzasidan qator taklif, fikr va mulohazalar bildirildi.
Tadbir doirasida uyushma a'zoligiga qabul qilingan bir guruh jurnalistlarga a'zolik guvohnomasi va ko'krak nishonlari topshirildi. Viloyatdagi bir nechta bosma nashrlarga “Yurida-Orfo” dasturi sertifikatlari uyushma tomonidan beg'araz yordam sifatida taqdim etildi.
Yig'ilishdan so'ng O'zbekiston Jurnalistlari ijodiy uyushmasi raisi O.O'sarov rahbarligida jurnalistlar tomonidan “Yashil makon” loyihasi doirasida Andijon shahridagi “Ekobog'” hududiga manzarali daraxt ko'chatlari ekildi.
– Yurtimizda yashil maydonlarni barpo etishdek xayrli harakatda faol qatnashish har birimizning insoniylik burchimiz, – dedi O.O'sarov. – Ekilgan har bir nihol eng avvalo, salomatligimizga, yurtimizni yanada go'zal, ona tabiatimizni musaffo bo'lishiga xizmat qiladi.
Muxtasar aytganda, O'zbekiston Jurnalistlari ijodiy uyushmasi Andijon viloyati bo'limining navbatdan tashqari umumiy yig'ilishi davomida tashkil etilgan tadbirlar samarali va mazmunga boy tarzda kechdi.
O'zbekiston Jurnalistlari
ijodiy uyushmasi axborot xizmati