Tanlovning eng yaxshi inshosi: «Mening prezidentim»
Ma'lumki, O'zbekiston kasaba uyushmalari Federatsiyasi va Xalq ta'limi vazirligi hamkorligida tashkil etilgan “Mening Prezidentim” ijodiy ishlar tanlovi yakunlandi. Yaqinda tanlov g'oliblarini taqdirlash marosimi bo'lib o'tganligidan esa ko'pchilik xabardor bo'lsa kerak.
Yurtimiz umumta'lim maktablarining 10-11-sinf o'quvchilari o'rtasida joriy yilning so'nggi ikki oyi davomida 4 bosqichda o'tkazilgan mazkur tanlovda 9 ming 872 ta umumta'lim maktabida saboq olayotgan 600 ming nafarga yaqin o'quvchi ishtirok etganligi aytildi.
Quyida ushbu tanlovning mutlaq g'olibasi, Parkent tumanidagi 5-ixtisoslashtirilgan davlat umumta'lim maktabi o'quvchisi Ra'no Abduhamidovaning yozgan ijodiy ishi e'lon qilinmoqda.
“Bir o'lkaki, tuprog'ida oltin gullaydi…”.
“Oy bizning qishloqda yerga yaqindir”.
Dilni xushnud etuvchi yangi hayot nafasi.
“Aytgin, do'stim, nima qildik Vatan uchun?!”.
Toki tanda jonimiz, seningdirmiz, seningdirmiz.
Har bir makon-u zamonda mashhur bo'lgan shunday jumla bor: “Dunyoni go'zallik qutqaradi”. Qiziq, go'zallik nima o'zi?! Bahorda qip-qizil lolalar bilan bezangan qirlar go'zalmi yoki shu qirlarni bezab turuvchi, shirmoy yuzli qizlar go'zalmi?! Erta tongda qo'lidan issiq sut isi keladigan ona siymosi chiroylimi yoki onasi tomon talpinayotgan go'dakning ko'zlaridagi beg'ubor tabassum chiroyliroqmi?!
Menimcha, shularning barchasi birdek chiroyli, birdek go'zal! Siz uchun-chi? Siz nimani go'zal, chiroyda tengsiz, deya hisoblaysiz. Agar javob topishga qiynalayotgan bo'lsangiz, qo'lingizni chap ko'ksingizga qo'ying. Xo'sh, u nima deb javob berdi. Mening qalbim: “Senda bir boylik bor. U hamma narsadan betakror, hammasidan aziz. Sening turfa go'zalliklar bilan tovlangan boyliging Vataningdir”, dedi.
Vatan… Vatan tuyg'usi… Vatan muhabbati… Nimadir bular?! Osmondan baland hislarmi? Bular qanday sehrli qudratki, hali voyaga yetmagan, dunyo ko'rmagan, turmushning past-balandlaridan bexabar bir o'smirning yuragiga jo bo'lib, uning butun fikr-u xayolini band qilib turadi. Menimcha, yuragimni musichaday tipirchilashga, qalbimni esa ismsiz tuyg'ular ummoniga aylanishga majbur qilgan kuch Vatan tuyg'usi bo'lsa kerak! Negadir shu so'z qulog'im ostida jaranglashi bilan o'ylarim bahor osmonidagi oppoq bulutlar singari har yonga “sochilib” ketadi. Balki bu tuyg'uni izohlash, tushuntirib berish imkonsiz bo'lgani uchundir. To'g'rimi?! Bu tuyg'uni faqat his qilish mumkin.
Siz Vatan tuyg'usini birinchi marta qachon his qilganingizni xotirlaysizmi? Men esa bilaman. Bu tuyg'uni ilk bor olti yoshimda his qilganman, lekin bu Vatan tuyg'usi ekanligini keyin angladim.
Yodimda… Men olti yosh bo'lgan paytim katta opam shaharda o'qir edi. Yoz kunlarining birida buvijonimga ergashib, birinchi marta Toshkentga keldim. Uch kun opam joylashgan hovlida turadigan bo'ldik. Birinchi kun yaxshi o'tdi. Ikkinchi kun yuragimga hech narsa sig'madi. O'zimni hali u yoqqa, hali bu yoqqa tashlab, o'yinchoqlar o'ynadim. Keyin loy qorib, uycha yasamoqchi bo'ldim. Tuproqqa suv sepib, o'zim yoqtirgan iforni topa olmagach, alamimdan yig'lab yubordim. Buvijonimning “Sen bilan hech qaerga borib bo'lmas ekan”, degan dakkisi bilan safarimiz tez “qaridi”… Bu voqea men uchun juda katta saboq bo'ldi. Men-ku Toshkentga kelsam ham Parkentimni juda sog'inaman. Vatanidan yiroqda yurgan musofirlar nima qilar ekan-a?!!
Ha, aytgancha, o'shanda Parkentga qaytganimizdan keyin tuman markazi ko'zimga qandaydir oddiy bo'lib ko'ringandi. Chunki shahardagi ko'p qavatli uylardan, baland binolardan ko'z uzolmay qolgandim-da! Bugun yangicha go'zallik kasb etayotgan Parkent tumani azal-azaldan ko'plab ijodkorlarni ilhomlantirib kelgan ajib diyor hisoblanadi:
Oy bizning qishloqda yerga yaqindir,
Quyosh ham tog'larni o'pib yuz ochar.
Parkent osmonida yulduz uchsa gar,
Qirlarning ko'zidan uyqular qochar.
Bugun Parkent o'z mahobati va salohiyati jihatdan poytaxt tumanlaridan sira qolishmaydi. Chunki tumandagi ixtisoslashtirilgan davlat umumta'lim maktablari soni oltitaga yetkazildi.
Zamonaviy talablarga javob beradigan bolalar va o'smirlar sport maktabi qurildi.
Bu biz uchun ko'plab imkoniyatlar eshigini ochdi. Toshkent viloyatida 2021 yil O'zbekiston Respublikasining mustaqilligini munosib nishonlash maqsadida yangi “Parkent” ijod uyining ochilish marosimi bo'lib o'tdi. Ilgari shoiru yozuvchilarning dam olishlari, ijod qilishlari uchun faqat “Do'rmon” va “Zomin” ijod uylari mavjud edi. “Parkent” ijod uyining ochilishi adabiyot ahli uchun quvonchli xabar bo'ldi. Qolaversa, Kumushkon hududida O'zbekistonda birinchi “Turizm qishlog'i”ni tashkil etish bo'yicha loyiha ijrosiga kirishilgan edi. Shu bois bir necha yildan buyon bu hududda mehmonxona qurilishi davom etayotgandi. 2020 yilda mazkur mehmonxona o'z mahobati bilan tumanimiz ko'rkiga-ko'rk qo'shdi va mehmonlarni qabul qila boshladi.
Bugun tumanimizga kirib kelayotgan inson borki, keng va ravon yo'llarni, go'zal tabiat manzaralarini ko'rib, dili yayraydi. Parkentning iqtisodiy imkoniyatlarini, bunyodkorlik ishlarini, betakror tabiati tufayli turizm sohasida erishayotgan yutuqlarini, boshqa tomondan parkentlik o'g'il-qizlar qo'lga kiritayotgan g'alabalarni ko'rib, baxt diyorining saodatli insonlariga havas qiladi. Faqat tumanimiz husni emas, unga monand ravishda insonlarning o'y-fikrlari ham kechagidan o'zgacha. Parkent ahli bugun yuksaklarni ko'zlagan parvozga yondosh, hammaslak.
Parkentda tong otar dilbar,
osuda,
Ona farzand ko'rdi. Quyosh jilmayar.
Xudoyim xohlasa, bu go'dak elda,
Balki Amir Temur bo'lib ulg'ayar.
Ha, tumanimiz ahli farzandu nabiralarining o'sib, yetuk inson bo'lishlari uchun bor kuchini sarflayotgan zahmatkash insonlardir. Jumladan, men har kuni maktabimiz yonida qurilgan “Kitob olami” do'konini ko'rib, juda xursand bo'laman. Buvijonim har gal nafaqa pulidan “kitob olgin”, deya “ulushim”ni berardi. Men “ulushim”ni ko'targancha kitob do'koniga borardim… Shu o'rinda muhtaram Yurtboshimizning: “Maktab ta'limini rivojlantirish buyuk umummilliy maqsadga, umumxalq harakatiga aylanishi zarur”, – degan fikrini keltirib o'tmoqchiman. Chunki so'nggi yillarda mamlakatimizda maktablar quvvatini oshirish bo'yicha bir qancha islohotlar amalga oshirildi.
Masalan, men tahsil oladigan maktabning uzoq yillar davomida sport zali bo'lmagan. Shu maktabni bitirgan opalarim: “Biz jismoniy tarbiya darsini qishda sinf xonasida o'tardik”, – deya ko'p eslashadi. Opalarimning aytishicha, maktabimizda azaldan sport zali bo'lmagan ekan. Buni qarangki, uzoq yillar davom etgan “an'ana” 2020 yil o'z nihoyasiga yetdi. Endi men ham boshqa hududdagi tengdoshlarim singari maktabimiz sport zali haqida bemalol gapira olaman. Ayniqsa, joriy yilda ta'mirdan chiqarilgan, tumanimizdagi eng katta ilm dargohlaridan biri bo'lgan 1-sonli maktab ko'zni quvontiradigan darajada o'zgarib ketgan. “Mening Prezidentim” ijodiy ishlar tanlovining tuman bosqichi shu maktabda bo'lib o'tdi.
Maktabdagi sharoitlarni, u yerdagi o'quvchilarning ko'zidagi kuch, g'ayrat, quvonchni ko'rib, Prezidentimiz amalga oshirayotgan islohotlarning faqat va faqat biz uchun, bizning yorqin kelajagimiz uchun qaratilganligiga yana bir bor guvoh bo'ldim. Bilasizmi, tumanimiz 1926 yilda tashkil topgan. O'sha vaqtda kimdir mamlakat mustaqilligidan gap ochib, Parkentning bugungi yutuqlari bashoratini bersa, turgan gapki, aqlga sig'maydigan ro'yo aytilgandek bo'lardi. Odamlar hatto tushida ham ko'rmagan o'zgarishlar bugun tumanimiz aholisi hayotini yangilab va yaxshilab bormoqda.
Joriy yilning boshidan shu kunga qadar tumanimizga 412 ming nafar sayyoh tashrif buyurgan. Bulardan 1,2 ming nafari xorijlik sayyohlarni, 410 ming nafari mahalliy turistlarni tashkil etadi. Tumanimiz markazida “Majnuna med” nomli tibbiyot klinikasi ham ish boshladi. Bu klinikaga Toshkent shahridagi yuksak bilim malakaga ega bo'lgan shifokorlar jalb qilindi. Tumanimiz aholisi shu yerning o'zida dardlariga davo topishi mumkin.
Men uzoq paytdan buyon o'ylab kelayotgan fikrlarimni bayon qilish uchun imkon yaratgan taqdirdan va shu tanlov tashkilotchilaridan juda minnatdorman. Ayni damda: “Bu qiz tanlovda yutish uchun toza maqtab yozibdi-ku!”, – degan fikr xayolingizdan o'tmasligini iltimos qilgan bo'lardim. Zero, yozayotgan tuyg'ularimning, yoza olmayotgan kechinmalarimning naqadar samimiy va chin dildan ekanligi yolg'iz Allohga hamda menga ayon.
Menimcha, “Parilar shahri” deya nom olgan tumanimiz yilning istalgan paytida mehmonlarni qabul qilib olishga tayyor. Erta tongda issiq non isi taraladigan uylarda buvijonu buvajonlarimiz yurtga tinchlik, fayz-baraka so'rab, duoda bo'lishadi. Bahor faslida ismaloq, mador singari kishi taniga quvvat, ruhiga yengillik bag'ishlaydigan ko'katlardan yopilgan issiqqina somsalarni yeyish uchun, albatta, keling.
Shunda parkentlik qizning inshosidagi gaplar qanchalik to'g'ri ekanligiga o'zingiz guvoh bo'lasiz. Men hozir tumanimiz chiroyini, unda olib borilayotgan islohotlarni yozish bilan bandman. Siz esa o'qish bilan mashg'ulsiz. Ayni damda ikkimizning ham ko'z oldimizga Zarkent uzumiyu So'qoq kabobining surati kelgan bo'lsa ne ajab!
Hozir bularni yozayapman, lekin yuragimda: “bu o'zgarishlarning barchasini yozish uchun vaqtim yetarmikan?”, degan xavotir bor. Menimcha, yetmasa kerak. Nachora, buyuk bobolarimiz so'nggi damda ham jang maydonini tashlab ketmaganidek, men ham qo'limdagi qalam bilan oq maydon chegarasiga yetib borish uchun harakat qilaman.
Bilamizki, mamlakatimiz qo'shni davlatlar bilan qadimdan do'stlik aloqalarini bog'lab keladi. Qardosh xalqimiz bilan do'stona munosabatlarni, muhim strategik aloqalarni mustahkamlash maqsadida tumanimizning Qirg'izovul hududidagi 33-maktabda qirg'iz xalqining faxri bo'lgan Chingiz Aytmatovning byusti o'rnatildi. Biz tahsil oladigan maktabda 2021 yilda Abdulla Avloniy nomidagi ilmiy-tadqiqot instituti hamda Amerika Qo'shma Shtatlarining Shimoliy Jorjiya instituti bilan hamkorlikda tashkil etilgan “Maktablarda liderlik STEAM” kursi ishtirokchilari tashrif buyurdi. Bu biz, yoshlar uchun katta mahorat darsi bo'ldi.
Men yozgan so'zlarimda hech qanday mubolag'aga yo'l qo'ymaslikka harakat qildim. Bu inshoda Millatimiz Sardori olib borgan va olib borayotgan islohotlar o'zim yashaydigan hudud misolida qisqacha bayon qilindi.
Baxtim kulib, Yurtboshimiz bilan uchrashishga musharraf bo'lsam, ularga shu so'zlarni aytardim: “Bilaman, siz mamlakatimizdagi ko'plab yoshlar bilan yuzma-yuz uchrashgansiz. Shu yoshlar qatorida men ham taqdir bergan qismatimdan minnatdorman. Balki bu keng olamda kimdir men tug'ilgan yurtda dunyoga kelishni, men tarbiyalanayotgan oilada voyaga yetishni orzu qilar. Balki oddiy fermer va o'qituvchining mendek qizi bo'lishni kimdir, eng oliy baxt, deya hisoblar.
Aziz Yurtboshim, sahiy quyosh nurlaridan bahramand bo'ladigan tonglarim uchun, jiyanlarimning shodon tabassumi uchun kelajakda yetuk dasturchi bo'lishni niyat qilgan ukamning orzulari uchun, barcha-barchasi uchun Sizga rahmat aytaman. Yaxshiyamki, Siz mening, ha, mening Prezidentimsiz. O'ylaymanki, kelajakda men bilan ham faxrlanasiz. Bu uchun qo'limdan kelgancha harakat qilishga Sizga so'z beraman!!!”
Ra'no ABDUHAMIDOVA,
Parkent tumanidagi 5-ixtisoslashtirilgan
davlat umumta'lim maktabi o'quvchisi,
“Mening Prezidentim” ijodiy ishlar tanlovining
respublika bosqichi 1-o'rin sohibasi