Yangi yil kechasi

Muhammad Yusuf,

O'zbekiston xalq shoiri

 

Ko'ngil ma'yus tortdi yilning so'nggida,

Bilmam, nimang bilan sehrlading, qor.

Bugun kuppa-kunduz ko'zim o'ngida,

Yana bir yoshimni o'g'irlading, qor.

 

Qirqinchi qasrimga o'taymi endi,

Kechagi yoshligim ertakmi endi?..

Bahorim yetgudek qo'lim uzatsam,

Etolmay dilimni ne deb yupatsam.

 

Laylakqor, azizim, g'alat bayram bu —

Kulib kuzatsammi, yig'lab kuzatsam…

Dardim jim ichimga yutaymi endi,

Kechagi yoshligim ertakmi endi?

 

So'rsang, sevinchimdan o'kinchim ko'proq,

Sendan-da kumushroq sochimdagi oq.

Yilim kelmay turib, yilim ketmoqda,

Ko'zda tabassum-u kiprikda titroq.

 

Men ham sal shoshdim-da, qaytaymi endi,

Kechagi yoshligim ertakmi endi?

Yangi yil,

Kelaver qanday kelsang ham,

Kimlar yetdi senga, kimlar yetmadi.

 

Sen yangi yo'ldoshsan, sen yangi hamdam,

Yo'qlab kelganingni o'zi bir bayram.

Qulog'ingga bir gap aytaymi, endi,

Kechagi yoshligim ertakmi, endi…

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

2 − one =