Ҳасратингдан айлагил огоҳ

Orif TO'XTASh

Muallif haqida: 1976 yilda Ishtixon tumanida tug'ilgan. “G'unchalar tabassumi”, “Quyosh yo'li”, “Ko'ngilga tashrif”, “Vatan atri”, “Ajabtovur arznomalar” va “Baxtiyor bolalik” nomli she'riy to'plamlar muallifi.

O'zbekiston Yozuvchilar uyushmasi a'zosi, “Shuhrat” medali sohibi.

YaNGI OY

Tun osmoni misli tegirmon,

To'lishgan oy – tegirmon toshi.

Va sochilgan yulduzchalar – don,

Tayyoralar — qumursqa, tashir.

Somon yo'li turar tutashib,

Bug'doyzorga, hu anov qirga.

Bulut – qopi bilan don tashib,

Har kun quyosh botadi terga.

Kechga borib yiqilar behol,

Qilmishidan qizarib rangi.

O'z-o'ziga beradi savol:

— Nahot shunday yashasam mangu?! –

Tirikchilik, har kun shu holat,

Joni hiqildog'iga yetdi.

Tegirmonga bug'doyni solib,

Ko'zi nogoh uyquga ketdi.

Udda qilolmadi lekin u,

Tatimadi o'g'rilik oshi.

… Ana, turar yarmi ko'rinib,

Sinib qopti tegirmon toshi.

TAQDIR

Osmon — katta kultepa,

Yulduzlar cho'qqa o'xshar.

Oy bezovta.

Kutgani –

Kelgani yo'qqa o'xshar.

O'tga solib bir zamon,

Yorining maktublarin.

Endi esa ko'ziga

Surmoqchiday kullarin –

Kezinadi umidlab,

Ko'zlarini yoshlaydi.

Parcha-parcha bulutlar —

Yoshin arta boshlaydi.

Yo oy sehrli ko'zgu,

Unda o'ksik qiz aksi.

Tanish chehra.

…Balki u —

Men sevgan qiz emasmi?

Tan olmayin vaqtida,

Jo'shqin muhabbatimni,

Qiymalab, so'ng olovga —

Otgan edi xatimni.

Endi…

Osmon – bir hovli,

Yulduzlar izga o'xshar

Oy esa…

Bir zulmatga —

To'y bo'lgan qizga o'xshar.

VATAN

Tug'ilganimdan to shu kunga qadar,

Nima topgan bo'lsam, shuni yo'qotdim.

Yo'qoldiqlar bilan o'ksinsam agar,

Topildiqlar bilan o'zni yupatdim.

Esankirab qoldim ilk yo'qotuvdan,

Nogoh o'g'irlatdim yoshlik — erkimni.

Shunda xayolimni tortqilab, birdan

Yuragim ortiga bir qiz bekindi.

Tutday to'kildi-ya avvalgi dardim,

Ul chilvirsoch bilan bo'lib andarmon.

O, qanday yashardik! Qanday yashardim!..

Men bugun sevgisin yo'qotganlardan.

Keyin do'st orttirdim hamroh deb yo'lda,

Ular ham qaytmadi ketib har tomon.

Nachora?! Ko'nikdim, daldam shu bo'ldi:

— Men axir o'zimga yetib ortaman!

Sog'inib – siqtashga yo'q bunda o'rin,

Birin yo'qotgan choq birini topdim.

G'oyibni izlasam, undan ham zo'ri —

Duch kelib, joy ola boshlaydi qalbdan.

Ayni damda esa topganim — Vatan,

Uning nomi bilan atalguvchi baxt.

Men uni hammadan, hamma narsadan —

Aziz anglamog'im, asramog'im shart!

Boshqa istamasman yo'qotmoqlikni,

Boshqa topmoqni ham qilmasman orzu.

Bu shiddatli so'zlar yurakning hukmi,

Ko'ksim kengligida tongday yorishuv.

Tillarim biyrondir hayrat sehridan,

Biz endi birgamiz qiyomat qadar.

…Uning sadoqati, qaynoq mehridan —

O'zimni yo'qotib qo'ymasam agar!

QISMAT

Sevgi nima asli, dedilar,

U go'zallik fasli, dedilar.

Bir-biriga intiq dillarning

Hech tuganmas vasli, dedilar.

Dard dedilar, qarog'lar namli,

Mard dedilar vafo qilganni.

Sevmaganlar sevib qolganni —

Telbami yo mastmi, dedilar.

Ko'zlar emas, ko'zda yosh yig'lar,

Sog'inchini etib fosh, yig'lar,

Yulduz terib yurgan oshiqlar —

Osmon shuncha pastmi, dedilar.

Bu dardning bir darmoni — visol,

Bo'lmasin hech armoni — visol.

Sevgi borki, bu olam go'zal,

U go'zallik rasmi, dedilar.

Shukur, dedim,

Sevar! Sevaman!

Bosh egishim kerak nega man?!

Mag'rur so'zim tinglagan hamon,

— Yig'isifat sasmi? — dedilar.

… Quloq tutsam kinoyasiga,

Baxtim yetmish nihoyasiga.

— O'tmang yorning himoyasiga,

U o'zganing xasmi, — dedilar.

YuRAK

Qara, manov bog'larni,

Yaproqlarni sinchiklab qara.

Uchratmaysan bunda dog'larni,

G'uborlardan xoli manzara.

Yuvintirmish ularni yomg'ir,

Ko'mib shivirlarga, titroqqa.

Andoza ol ulardan, axir —

O'xshaysan-ku sen ham yaproqqa.

Ko'zni yashnatadi neki bor,

G'unchalarning kulgusida sha'n.

Bugun borliq qanday beg'ubor,

Sen nimalar qayg'usidasan?

Vujudimda seni deb qiynoq,

Ayt, nimadir istagan narsang?

Hasratingdan aylagil ogoh,

Balki sen ham yomg'ir kutarsan?!

Afsus, bunda o'jarlik bekor,

Qilolmaysan sen yomg'ir talab.

Axir senga ko'z yoshim yetar —

Oqqanlari … ichimga qarab!

IShTIYoQ

Ro'molchamni men bugun ko'z yoshga chaydim,

Hasratimni keling, sizga aytay, ona.

Kechagina boshqa edim, boshqachaydim,

Duo qiling, men o'zimga qaytay, ona.

Nimadandir yurak-bag'rim eziladi,

Tegram aro turfa xayol kezinadi,

Avvalimning o'rni yomon seziladi,

Duo qiling, gul ro'zimga qaytay, ona.

Suyanchig'im sen, dedingiz, suyolmadim,

Olislarga ketar bo'ldim, uyalmadim,

Yo'l yurdim-u ortga qarab qo'yolmadim,

Duo qiling, o'z izimga qaytay, ona.

Hech qursa bir hol so'rashga erindim-a,

Shoirman, deb davralarda kerildim-a,

Bir so'zingiz oldida bor she'rim nima?!

Duo qiling, haq so'zimga qaytay, ona.

Omonligim so'rovi bor ko'nglingizda,

Lek oqibat yo'q ekan men – o'g'lingizda,

Shoirman-u she'rim yo'q siz to'g'ringizda,

Duo qiling, men iznga qaytay, ona.

Onalarning duosini vojib, derlar,

Yoningizda yurmaymanmi yozib she'rlar?..

Unut bo'lmay ortida tong otgan qirlar,

Duo qiling, kunduzimga qaytay, ona.

Ha, qishloqni sog'inganman va Sizlarni,

Bag'ringizga bosganingiz chog' – islarni,

Hovlimizni, tomqizg'aldoq, yalpizlarni…

Sog'inchim mo'l, qay birini aytay, ona?

Duo qiling, Ildizimga qaytay, ona!

DO'STING BO'LSIN

Do'stlarim – Vohid, G'ayrat va Nodirga

Sirpanchiqdir bu dunyoning yo'llari,

Bu dunyoning xilvatlari xatarli.

Madad uchun uzanguvchi qo'llari —