Vatan qanotlari
14 yanvar — Vatan himoyachilari kuni
Vatan – har bir millat uchun or-nomus, sadoqat, e'tiqod, matonat, jasorat mezoni va timsolidir. Hatto, qushlar mavsumiy qay manzillar tomon uchsalar ham, lekin o'z oshyoniga yana va yana qaytaveradi. Shu ma'noda Vatan va vatanparvarlik tiriklikning o'ziga xos omili desak, xato bo'lmaydi. Vatan hissi insonga Vatanidan olisda bo'lganida yaqqol seziladi. Turli sabablar bilan o'zga yurtlarda yashagan ko'plab vatandoshlarimizning hayoti ayanchli va qayg'uli kechgani bizga tarixdan ma'lum. Bu haqiqat buyuk bobomiz Alisher Navoiyning “Oltin qafas ichra gar qizil gul bitsa, Bulbulg'a tikondek oshiyon bo'lmas emish”, degan da'vatlarida ham o'zining yorqin ifodasini topgan.
Ayniqsa, yoshlarda vatanparvarlik tuyg'ularining yuksalishi va namoyon bo'lishida, ularning jismonan baquvvat va ma'nan yetuk bo'lib kamol topishida milliy armiyaning o'rni beqiyos. Bugun yoshlarimizda yuksak vatanparvarlik tuyg'ulari asosida yon-atrofimiz va jahonda ro'y berayotgan siyosiy-ijtimoiy jarayonlarga milliy manfaatlarimizdan kelib chiqqan holda yondashish ko'nikmalarini, turli ichki va tashqi tahdidlarga qarshi mafkuraviy immunitetni shakllantirishga erishish ustuvor masala bo'lib turibdi.
Jahon va mintaqadagi vaziyat, yuzaga kelayotgan xatar va tahdidlarga mos holda qayta ishlab chiqilgan va 2018 yil 9 yanvarda qabul qilingan “O'zbekiston Respublikasining Mudofaa doktrinasi to'g'risida”gi Qonun qabul qilindi. Bu tarixiiy hujjat mazmun-mohiyatidan kelib, Shavkat Mirziyoyevning harbiy sohaga oid qabul qilgan qarorlari, harbiy xizmatchilarga yaratilgan imtiyozlar va qulay shart-sharoitlar, ularni uy-joy bilan ta'minlash bo'yicha uzoq muddatli imtiyozli ipoteka kreditlari berilishi, harbiy shaharchalarni obodonlashtirish, ularda zamonaviy infratuzilmalar barpo etish, muddatli xizmatni o'tayotgan yoshlarga oliy ta'lim muassasalariga imtiyozli yo'llanmalar berish, harbiy xizmatchilarning farzandlariga oliy o'quv yurtlarida ta'lim olishlari uchun davlat grant o'rinlari ajratilishi mamlakat mudofaa salohiyatini mustahkamlashda muhim omil bo'lmoqda. Ayniqsa, bu borada tumanlar, shaharlar, mahallalarda uzluksiz targ'ibot- tashviqot tadbirlari o'tkazish yoshlarimizning harbiy xizmatga, Vatanga muhabbat va sadoqat ruhida tarbiyalash imkonini beradi. Undan tashqari, harbiy qismlar, ta'lim muassasalarida yoshlarning harbiy kasbga bo'lgan qiziqishlarini yanada oshirish, vatanparvarlik fazilatlarini kamol toptirish maqsadida tarixiy qahramonlar To'maris, Shiroq, Spitamen, Jaloliddin Manguberdi, Amir Temur, Bobur Mirzo singari ulug' zotlar hayoti va faoliyati, jasorati, jangovar taktikasini targ'ib etuvchi uchrashuv va davra suhbatlarini tashkil etish katta ijobiy natija beradi. Shundan kelib chiqib, Prezidentimiz “Vatanparvarlik har bir davlat hayotining ma'naviy asosi hisoblanadi va jamiyatni har tomonlama rivojlantirish borasida eng muhim safarbar etuvchi kuch sifatida namoyon bo'ladi”, deya bejiz ta'kidlamagan edi.
Zero, harbiy-vatanparvarlik konsepsiyasining ustuvor vazifalari ham yoshlarda milliy armiyamizning qudrati va salohiyatiga bo'lgan ishonchni kuchaytirish, har qanday murakkab vaziyatlarda tezkor va mustaqil qaror qabul qilish, zamonaviy harbiy-texnika vositalaridan samarali foydalanish malakasiga ega kadrlar yetishtirish, O'zbekiston manfaatlarini nafaqat harbiy sohada, balki hayotning barcha jabhalarida himoya qilishga tayyor, yurt uchun fidoyi, bugungi kun talabiga javob bera oladigan qilib tarbiyalashga qaratilgandir.
Mamlakatimizda o'tgan yillar davomida harbiy ta'lim tizimini tubdan isloh qilish borasida ibratli ishlar amalga oshirildi. Jumladan, oliy harbiy ta'lim muassasalari faoliyati kengaytirilib, ularning salohiyati yanada oshirildi. “O'smirlarni harbiy-vatanparvarlik ruhida tarbiyalash hamda O'zbekiston Respublikasi Qurolli Kuchlari va davlat xizmati uchun kadrlar zaxirasini tayyorlash tizimini takomillashtirishga oid qo'shimcha chora-tadbirlar to'g'risida”gi 2019 yil 28 iyundagi 4375-sonli O'zbekiston Respublikasi Prezidentining qarori asosida yangi O'zbekiston Respublikasi Mudofaa, Ichki ishlar, Favqulodda vaziyatlar vazirliklari, Davlat xavfsizlik xizmati, Milliy gvardiyasi tarkibida barcha hududlarda tashkil topgan “Temurbeklar maktabi” harbiy-akademik litseylarida farzandlarimiz ongi va tafakkuriga yoshligidan vatanparvarlik, milliy armiyaga ishonch tuyg'ulari singdirilib borilmoqda.
Bugun dunyoning olis va yaqin mintaqalarida murakkab mojaro va to'qnashuvlar davom etayotgan bir paytda O'zbekistonimizda tinchlik va xavfsizlikni ta'minlash borasidagi ishlar yanada samarali tashkil etilmoqda. Xususan, mudofaa qobiliyatini mustahkamlash, qo'shinlarni zamonaviy qurol-yarog' va texnikalar bilan ta'minlash, bo'linmalarni boshqarishda axborot texnologiyalarini keng qo'llash, jangovar tayyorgarlik va kasbiy mahoratni oshirish ustuvor vazifalar bo'lib qolaveradi.
Zero, yoshlarda Vatanga daxldorlik hissini kuchaytirish bugun hayotiy va axloqiy ehtiyojga aylanishi kerak. Davlatimiz rahbari, Qurolli Kuchlar Oliy Bosh Qo'mondoni Shavkat Mirziyoyev shu yilning 7 yanvar kuni Davlat xavfsizlik xizmatining harbiy ta'lim muassasalari faoliyati bilan tanishar ekan, poytaxtimizning Yunusobod tumanida joylashgan “Temurbeklar maktabi” o'quvchi-yoshlari bilan uchrashdi.
“Sizlar Yangi O'zbekistonning qanotisizlar. Bu qanotlar nima bilan kuchli bo'ladi? Bilim bilan! Kamida ikki-uchta tilni, aniq fanlarni va tariximizni mukammal bilishingiz kerak”,—dedi Yurtboshimiz.
Darhaqiqat, yurtimizning tinch-totuvligi, ertamizning porloq yo'li ona Vatanimizning tinch-totuvligiga bog'liq. Shu bois Vatan himoyachilari Prezidentimiz ta'biri bilan aytganda hayotimiz qanotlaridir.
Eshbolta Qobulov,
Termiz davlat universitetining
pedagogika instituti direktori,
tarix fanlari doktori