Mamlakatdagi yetakchi axborot manbai
O'zbekiston axborot agentligi (O'zA)
tashkil etilganiga 30 yil to'ladi
Jahon taraqqiyotining turli davrlariga nazar tashlansa, jamiyat hamisha axborotga kuchli ehtiyoj sezib kelgani ma'lum bo'ladi. Axborot maydoni uchun kurash nafaqat mamlakatning ichida, shu bilan birga, uning tashqarisida ham kechadi. Mustaqil davlat axborot siyosatida erkin bo'lmog'i, o'z maqsadlarini ommaga, qolaversa, jahon ahliga tezkor, xolis yetkazib beruvchi milliy axborot agentliklariga ega bo'lishi taqozo etiladi.
Ana shu ehtiyojdan kelib chiqqan holda endigina mustaqillik yo'liga qadam qo'ygan davlatimizning Milliy axborot agentligi bundan roppa-rosa 30 yil muqaddam — O'zbekiston Respublikasi Prezidentining 1992 yil 5 fevraldagi “O'zbekiston axborot agentligi (O'zTAG)ni O'zbekiston Milliy axborot agentligi (O'zA)ga aylantirish to'g'risida”gi Farmoniga binoan tashkil etildi.
2019 yil 2 dekabrdagi O'zbekiston Respublikasi Prezidenti Shavkat Mirziyoyev tomonidan imzolangan “O'zbekiston Milliy axborot agentligi faoliyatini yanada takomillashtirish chora-tadbirlari to'g'risida”gi qarorga ko'ra, O'zA — O'zbekiston Milliy axborot agentligi respublika hayotiga oid ijtimoiy-siyosiy axborotlarni tarqatuvchi rasmiy axborot agentligi ekani qayd etildi va agentlik faoliyati tubdan qaytadan takomillashtirildi, moddiy-texnik bazasi zamonaviy talablar asosida yangilandi.
Ta'kidlash joizki, O'zbekiston Jurnalistlari ijodiy uyushmasi va O'zbekiston Milliy axborot agentligi o'rtasidagi hamkorlik samarali davom etayotgani, xususan, Uyushma tomonidan o'tkazilgan tadbirlar O'zA muxbirlari tomonidan muntazam yoritib kelinayotganidan mamnunmiz. Jurnalistlarni qo'llab-quvvatlash, ularning kasbiy mahoratini oshirish bo'yicha Uyushma va Agentlikning birgalikda amalga oshirilayotgan ishlari, shubhasiz, milliy axborot makonining ravnaqiga xizmat qiladi.
Darhaqiqat, O'zA mamlakatimiz ichki va tashqi siyosatini, jamiyatimizda kechayotgan ijtimoiy-iqtisodiy o'zgarishlar va yangilanishlarni, amalga oshirilayotgan tub islohotlar mohiyatini, ahamiyati va samaralarini xolis, izchil va O'zbekiston milliy manfaatlari nuqtai nazaridan yoritadigan rasmiy davlat axborot agentligi hisoblanadi.
Xalq xizmatida kunu tun bo'lib, doimo yangilik izlab, yangilikka intilib yashaydigan, jamiyatda yuz berayotgan muhim o'zgarishlar, ustuvor g'oya va tashabbuslarning ma'no-mohiyatini odamlarga tezkorlik va xolislik bilan yetkazadigan, hayotning qaynoq nuqtalariga dadil kirib boradigan jurnalistlar haqida so'z yuritilganda, birinchi navbatda, ko'z oldimizda O'zA muxbirlari gavdalanadi.
Negaki, respublikamiz miqyosidagi yangiliklar, axborot va xabarlarni tezkor va xolis yetkazib berish amaliyoti ushbu Agentlikda muhim tamoyil sifatida qadrlanadi.
Yana bir muhim jihati, O'zA O'zbekiston Respublikasi qonunlari, Prezident qarorlari, rasmiy bayonotlari va ma'ruzalari, shuningdek, Oliy Majlis palatalari va Hukumat qarorlari, eng muhimi, ular faoliyatiga oid axborotlar birinchi bo'lib yoritib boriladigan rasmiy axborot manbaidir.
Mamlakatimiz ichki va tashqi siyosatini, amalga oshirilayotgan keng miqyosli islohotlarni, jamiyatimizda kechayotgan ijtimoiy-siyosiy va sotsial-iqtisodiy o'zgarishlar va yangilanishlarni tezkor yoritish; jamoatchilikning katta qiziqishini uyg'otayotgan voqealarning mohiyati bo'yicha fuqarolarda xolis fikrni shakllantirish hamda ma'lumotlardan buzg'unchi va boshqa g'ayriqonuniy maqsadlarda foydalanish imkoniyatini bartaraf etish uchun aholini bunday hodisalar haqida o'z vaqtida xabardor qilib borish; o'quvchilar uchun qulay va qiziqarli shaklda O'zbekiston xalqining o'ziga xos madaniyati, urf-odatlari, milliy qadriyatlari, mamlakatning ko'p yillik tarixi va ilm-fan rivojiga qo'shgan hissasini namoyish etishga qaratilgan ijtimoiy loyihalarni amalga oshirish; yurtimizda yuz berayotgan o'zgarishlarni dunyoga tarqatish, jahonda sodir bo'layotgan voqea-hodisalar haqida mamlakatimiz aholisiga tezkor axborot yetkazib berish, xorijdagi axborot agentliklari va boshqa ommaviy axborot vositalari, media-tuzilmalar bilan hamkorlikni rivojlantirish ham O'zA faoliyatida ustuvor vazifalardandir.
Ma'lumki, O'zbekiston Milliy axborot agentligiga turli yillarda bir qancha taniqli jurnalistlar rahbarlik qilgan. Ayniqsa, Abdusaid Ko'chimov O'zbekiston Milliy axborot agentligi bosh direktori etib tayinlangandan keyin O'zAdagi eski qoliplar o'zgardi. Agentlik faoliyatida katta ijobiy o'zgarishlar kuzatildi. Xususan, maqolalarda fikrlar xilma-xilligi namoyon bo'ldi, tanqidiy-tahliliy chiqishlarga keng o'rin berildi. O'zA turli soha vakillari uchun tom ma'noda minbar vazifasini o'tay boshladi. Ijtimoiy hayotdagi shunday muammolar yoritildiki, dastlabki paytlarda buni ko'pchilik tasavvuriga ham sig'dira olmadi.
Tan olishimiz kerak, keyingi besh yilda jurnalistikamizda ro'y bergan o'zgarish, yangilanish va rivojlanishlarni ilgari tasavvur etish qiyin edi. Soha va uning vakillariga keng erkinliklarning berilishi jurnalistlarga ko'tarinkilik bag'ishlashi barobarida ularda zamon bilan hamnafas bo'lish, bir qadam oldinda yurish hissi va mas'uliyatini oshirdi.
O'zbekiston Milliy axborot agentligi bugun nafaqat yurtimizda, balki jahon axborot maydonida ham o'z o'rniga ega tuzilma sifatida tanilmoqda. Dunyodagi o'nga yaqin yetakchi axborot agentliklari bilan o'zaro aloqa o'rnatilgani va agentlikning Veb-saytiga sakkiz tilda materiallar joylashtirilgani ham shundan dalolat beradi.
O'zbekiston Prezidentining yurtimiz hududlariga, xorijiy mamlakatlarga safarlari haqidagi axborotlar O'zA muxbirlari tomonidan tayyorlanib, respublikaning barcha OAVlariga tezkor yetkazib berilayotgani e'tirofga molik.
Yana bir quvonarli jihati, so'ngi yillarda O'zA Media markazi tashkil etilib, axborot-tahliliy va multimedia materiallar, eshittirish va ko'rsatuvlar, voqea joyidan onlayn reportajlar tayyorlash, audio va video materiallarni qayta ishlash, ularni O'zAning veb-saytiga joylashtirish va ommaviy axborot vositalariga belgilangan tartibda yetkazib berish yo'lga qo'yildi. Bu, o'z navbatida, respublika ijtimoiy-siyosiy hayotiga oid yangiliklar bo'yicha fuqarolarda xolis fikrni shakllantirish, ularga axborot-tahliliy, shu jumladan, audio va video axborotlar yetkazish imkoniyatlarini yanada kengaytirishga xizmat qiladi.
Garchi 30 yil tarix uchun qisqa vaqt bo'lsa-da, shu davr ichida O'zA milliy jurnalistikamizda o'ziga xos maktab yaratdi. Agentlikda qanchadan-qancha yosh kadrlarning qalami charxlandi, ular bugungi kunda yetuk mutaxassislar sifatida mamlakatimizning nufuzli ommaviy axborot vositalarida, siyosiy-ijtimoiy sohalarida faoliyat olib bormoqda.
Yangi O'zbekistonning axborot makonida yuqori maqomga ega bo'lish maqsadida O'zbekiston Milliy axborot agentligi o'z faoliyatini yangicha, aytish mumkinki, jahon axborot maydoni ehtiyojlaridan kelib chiqqan holda yanada takomillashtirishni davrning o'zi taqozo etmoqda. Qolaversa, mamlakat OAVning, amalga oshirilayotgan islohotlarning oldingi qatorida bo'lishi ham zamon talabi. Shunday ekan, hali Agentlik tizimida ham yana qator ishlar amalga oshirilishiga ishonamiz.
Muxtasar aytganda, Agentlik ijodiy jamoasining namuna sifatida ko'rsatiladigan jihatlari bisyor. Ezgu maqsad yo'lida sidqidildan xizmat qilib kelayotgan aziz hamkasblarimiz — O'zA ijodiy jamoasini Agentlik tashkil etilganining 30 yilligi bilan muborakbod etib, ularga mustahkam sihat-salomatlik va ulkan ijodiy muvaffaqiyatlar tilaymiz.
Olimjon O'SAROV,
O'zbekiston Jurnalistlari
ijodiy uyushmasi raisi