O'gay maktab
Avvalroq Sirdaryo tumani xalq ta'limi bo'limining mudiri Rustam Do'stmurodov bilan maktablarning moddiy-texnik ta'minoti haqida suhbatlashib qolgandik.
— Ta'minotimiz yomon emas, — degandi mudir. — Lekin tumanimiz maktablari orasida uzoq yillardan buyon ta'mirlanmay, avariya holatiga kelib qolganlari bor. Shulardan biri Baxt shahridagi 32-maktab.
Navro'z bayrami arafasida mudir ta'kidlagan maktabda bo'ldik.
— Maktabimiz bundan roppa-rosa 50 yil muqaddam qurilgan, — deydi Barno Umarova. — Ishonasizmi, o'shandan buyon biron marta ham kapital ta'mirlanmagan.
Faqat bundan 15 yil muqaddam sport zalimizning tomini yopib berishgandi xolos.
Haqiqatan ham, 410 nafar o'quvchi tahsil olayotgan ushbu ta'lim o'chog'ining ahvoli anchayin xarob. Devorlari darz keta boshlabdi, sinfxonalari, pol va shiftlar, eshiklar abgor ahvolda.
— Yuqori tashkilotlarga bir necha marta murojaat qilganmiz, — deydi direktor. – Hatto tuman hokimi va boshqa mutasaddilar nomiga deputat so'rovnomasi ham kiritganmiz. Lekin hozircha biron-bir ijobiy javob yo'q.
Direktorning aytishicha, bundan bir necha yil muqaddam maktabni Baxt yengil sanoat kollejining bo'shab qolgan binosiga ko'chirishmoqchi bo'lishgan. Lekin keyinroq viloyat xalq ta'limi boshqarmasi boshlig'ining buyrug'i bilan, u binoga 71-maxsus maktab-internat jamoasi ko'chirilibdi.
— Maktabimiz joylashgan “Ishonch” mahalla fuqarolar yig'ini “Obod mahalla-2023” dasturiga kiritilgan, — deydi B.Umarova. — Zora, bizga ham e'tibor qaratishsa, bizning o'quvchilarimiz ham xavfsiz, obod va shinam sinfxonalarda tahsil olishsa…
Haydarali MAMATOV,
jurnalist