Orol dengizining inqirozi
Bu inqiroz keltirib chiqargan ekologik fojialar va uning salbiy oqibatlariga qarshi kurashish bo'yicha O'zbekistonda amalga oshirilayotgan amaliy chora-tadbirlar yuqori baholandi.
O'zbekistonning Janubiy Koreyadagi elchisi Vitaliy Fen BMTning sobiq bosh kotibi, Yashil rivojlanish global instituti assambleyasi raisi Pan Gi Mun bilan uchrashdi.
Suhbat avvalida Pan Gi Munga “Bugungi Mo'ynoq” nomli hamda “Orolni tiklash ishlari”ga bag'ishlangan maxsus fotoalbomlar taqdim qilindi.
BMTning sobiq bosh kotibi fotoalbomlarda aks ettirilgan Orolbo'yida ekologik vaziyatni yaxshilash bo'yicha so'nggi yillarda amalga oshirilgan keng ko'lamli ishlar bilan tanishib, bundan juda ta'sirlanganligini ta'kidladi. Ushbu sovg'alar u uchun eng qimmatbaho hisoblanishini bildirib, O'zbekiston tomoniga o'zining chuqur minnatdorligini izhor etdi.
Shu bilan birga u O'zbekistonga uch marotaba amalga oshirgan tashrifi va o'zbek xalqining mehmondo'stligi haqida iliq xotiralari bilan o'rtoqlashdi.
Pan Gi Mun Orol dengizi inqirozining salbiy oqibatlariga qarshi kurashish bo'yicha O'zbekistonda amalga oshirilayotgan amaliy chora-tadbirlarni yuqori baholadi. Shuningdek, Prezident Shavkat Mirziyoyevning ushbu muammoga xalqaro hamjamiyat e'tiborini yanada oshirishga hamda uni hal qilish uchun donorlik yordamini safarbar qilishga qaratilgan xalqaro tashabbuslarini to'la ma'qulladi.
— Orol dengizi qurishining mintaqadagi ekologik va ijtimoiy-iqtisodiy vaziyatga dahshatli oqibatlarini o'z ko'zim bilan ko'rganimdan buyon, mazkur muammo men uchun iqlim o'zgarishiga qarshi kurash sohasidagi ustuvor yo'nalishlardan biriga aylangan, — dedi Pan Gi Mun.
Uning so'zlariga ko'ra, u ko'plab xalqaro forumlarda o'zining halokatli ko'lami bilan mintaqadan ancha uzoqqa cho'zilgan Orol muammosiga doimiy e'tibor qaratib kelmoqda, ushbu muammoni hal qilmasdan turib, mintaqa davlatlarining barqaror iqtisodiy rivojlanishini ta'minlab bo'lmaydi.
Pan Gi Mun O'zbekiston Prezidenti Shavkat Mirziyoyevni shaxsan bilishidan juda faxrlanishini aytib, respublika yetakchisining “moslashuvchan va pragmatik” tashqi siyosati qo'shni davlatlar bilan munosabatlarda ijobiy o'zgarishlarga sabab bo'lganiga, bu esa butun Markaziy Osiyo mintaqasining barqaror rivojlanishiga ta'sir qilayotganiga alohida e'tibor qaratdi.
— Men O'zbekiston Prezidentini amaliy harakat odami deb bilaman. Uning qat'iy rahbarligi ostida mamlakatingiz o'z oldiga qo'ygan maqsadlarga qanday erishayotganini diqqat bilan kuzatyapman. Ayni paytda ekologik muammolar va “yashil” rivojlanishga katta ahamiyat berilayotganidan quvonaman. Davlat rahbarining “Yashil makon” tashabbusi Barqaror rivojlanish maqsadlariga erishish yo'lidagi global sa'y-harakatlarga qo'shilayotgan muhim hissadir, — dedi BMT sobiq bosh kotibi.
Pan Gi Mun 2022 yilda Yashil rivojlanish global Institutining O'zbekistonda vakolatxonasi ochilganligini xursandchilik bilan tilga olib, ushbu Institut bilan Koreya xalqaro hamkorlik agentligi (KOIKA) ko'magida Orol dengizi tanazzuli oqibatlarini bartaraf etish, Qoraqalpog'iston Respublikasi “yashil” reabilitatsiyasiga ko'maklashishga qaratilgan qiymati 5,65 million AQSh dollariga teng qo'shma loyiha doirasida amalga oshirilayotgan kompleks chora-tadbirlarni alohida e'tirof etdi.
Shu o'rinda, u mazkur Institut vakolatxonasining O'zbekistondagi faoliyatida Orolbo'yi mintaqasida barqaror ijtimoiy-iqtisodiy rivojlanishni ta'minlashga qaratilgan yangi loyihalarga e'tibor qaratishiga ishontirdi.
BMTning sobiq Bosh kotibi mamlakatimizda iyul oyida bo'lib o'tadigan muddatidan ilgari prezident saylovi oshkora va demokratik tamoyillarga to'la mos ravishda o'tishiga hamda o'zbek xalqi o'z kelajagi uchun o'zi tanlagan munosib nomzodga ovoz berishiga ishonch bildirdi.
“Dunyo” AA,
Seul shahri