Qadim Chin yurtiga safar
O'zbekiston Jurnalistlar uyushmasi raisi vazifasini bajaruvchi Xolmurod Salimov joriy yilning 13-17 iyun kunlari Xitoy davlatida xizmat safarida bo'ldi.
Shu yil o'tkazilgan “Oltin qalam” XVII Milliy mukofoti uchun xalqaro tanlovning “Chet ellik jurnalistning O'zbekiston haqidagi eng yaxshi materiali uchun” nominatsiyasida birinchi o'rin sohibi deb topilgan Xitoyning “Jenmin xuabao” nashriyoti muharriri San Xaoyangga mamlakatimizning Pekindagi elchixonasida mukofotni topshirish tadbiri bo'lib o'tdi. Unga tanlov statuetkasi, diplomi hamda pul mukofoti tantanali ravishda topshirildi.
— Keyingi yillarda O'zbekistonda jadal olib borilayotgan islohotlar bilan tanishish barobarida ularni Xitoy ommaviy axborot vositalarida yoritilishiga hissa qo'shib kelmoqdaman, — dedi San Xaoyang. — Har qanday inson yutuqqa erishsa quvonganidek, nufuzi yuqori “Oltin qalam” xalqaro tanlovida g'olib bo'lganimdan juda xursand bo'ldim.
* * *
“Jenmin xuabao” nashriyotiga qarashli markaz direktori Szyan Yungan bilan X.Salimovning uchrashuvi ham samarali bo'ldi.
Tashkil etilganiga 70 yildan oshgan “Jenmin xuabao” nashriyotida noshirlik ishlaridan tashqari “Kitay”, “China pictorial”, “Shelkovыy put-revyu”, “China-Indiya dialogue” kabi to'qqiz nomda jurnallar chop etiladi.
Jurnallar xitoy, rus, ingliz, qozoq singari o'n ikki tilda nashr etiladi.
Uchrashuvda ikki mamlakat jurnalistlari tajriba almashishini ta'minlash bo'yicha hamkorlik qilish kabi masalalar xususida fikr almashildi.
* * *
Pekin shahrida O'zbekiston Jurnalistlar uyushmasi bilan Umumxitoy Jurnalistlar assotsiatsiyasi o'rtasida hamkorlik kelishuvi imzolandi.
Shu munosabat bilan tashkil etilgan tadbirda Prezident Shavkat Mirziyoyevning joriy yil 18-19 may kunlari ushbu mamlakatga davlat tashrifi doirasida erishilgan kelishuvlar, O'zbekiston va Xitoy, umuman, Markaziy Osiyo davlatlari jurnalistlar uyushmalari hamkorligini mustahkamlash, birgalikda xalqaro mediaforumlar o'tkazish bo'yicha so'z yuritildi.
Shuningdek, imzolangan kelishuv asosida ikki mamlakat ommaviy axborot vositalari vakillarining tajriba almashishini ta'minlash, o'zaro bordi-keldini yo'lga qo'yish xususida fikr almashildi.
O'zbekiston Jurnalistlar uyushmasi va Umumxitoy Jurnalistlar assotsiatsiyasi o'rtasida hamkorlik kelishuvini imzolash marosimida tomonlar bir-biriga esdalik sovg'alarini topshirdi.
* * *
O'zbekiston Jurnalistlar uyushmasi raisi vazifasini bajaruvchi Xolmurod Salimov Xitoyga safari doirasida mazkur mamlakatdagi yirik mediatuzilmalardan biri – “Sinxua” axborot agentligi markaziy ofisida bo'ldi va ish jarayonlari bilan tanishdi. “Sinxua” muzeyida agentlik tarixiga oid eksponatlarni ko'zdan kechirdi.
Dunyoning 150 dan ortiq mamlakatida 182 nafar xodimiga ega “Sinxua” qoshida yigirmadan ortiq gazeta va jurnallar chop etib kelinadi. Agentlik muxbirlari tayyorlagan matnli, foto va videomateriallar 15 tilda jahonga tarqatiladi.
Xitoy markaziy televideniesi – “SSTV”da o'tkizilgan uchrashuvda O'zbekiston va Xitoy davlat telekanallari o'rtasida hamkorlikni, xususan, materiallar almashish, birgalikda ko'rsatuvlar tayyorlashni yo'lga qo'yish lozimligi alohida ta'kidlandi.
O'zbekiston Jurnalistlar uyushmasi bilan Umumxitoy Jurnalistlar assotsiatsiyasi o'rtasida imzolangan kelishuvga binoan o'zbekistonlik telejurnalistlarning Xitoy markaziy televideniesida malaka oshirishi, stajirovka o'tashiga sharoit yaratib berilishi ma'lum qilindi.
* * *
O'zbekiston Jurnalistlar uyushmasi raisi vazifasini bajaruvchi X. Salimov Xitoyda ana bir yirik mediatuzilma – “China daily” gazetasi rahbariyati bilan uchrashdi.
“China daily” faqat ingliz tilida qog'ozda chop etiladi. Nashrning elektron variantida xitoy tilida ham materiallar beriladi. Gazetada uning Amerika Qo'shma Shtatlari, Angliya va Afrikadagi bo'limlari hamda Rossiyadagi vakilligida ishlovchilarni qo'shib hisoblaganda bir ming besh nafarga yaqin xodim faoliyat olib boradi.
Ayni kunda 300 ming nusxada chop etilayotgan mazkur gazeta dunyoning ko'plab mamlakatlariga tarqatilmoqda.
Tahririyatda o'tgan uchrashuvda O'zbekistonda nashr etib kelinayotgan gazetalar bilan mazkur gazeta o'rtasida hamkorlik aloqalarini, tajriba va materiallar almashinuvini yo'lga qo'yish va rivojlantirish kabi masalalar bo'yicha fikr almashildi.