Raqamli dunyoning imkoniyatlari
“Ict week Uzbekistan – 2023” haftaligi doirasida xalqaro sammit o'tkazildi
Sun'iy intellekt deganda insonning mantiqiy va ijodiy funksiyalarini bajaruvchi intellektual sun'iy tizim tushuniladi. Ushbu atama, shuningdek, o'rganish va muammolarni hal qilish kabi inson aqli bilan bog'liq xususiyatlarni namoyish etadigan har qanday texnologiyaga nisbatan ham qo'llanishi mumkin. Uning ideal xususiyati – bu aniq maqsadga erishish uchun eng yaxshi imkoniyatga ega bo'lgan harakatlarni baholay olish va amalga oshirish qobiliyatidir.
AI dunyosi deyarli cheksizdir, u o'sib borayotgan muhandislik va kompyuter imkoniyatlari hisobiga katta ta'sir ko'rsatish qudratiga ega bo'lib bormoqda. Turli tor funksiyalar, vazifalar va faoliyatlar allaqachon inson qobiliyati va undan yuqori darajada amalga oshirilishi mumkin, ba'zan esa insonga bo'lgan ehtiyojni kamaytiradi.
Toshkent nufuzli haftalikka mezbonlik qildi. Joriy yilning 24–27 oktyabr kunlari “ICT Week Uzbekistan – 2023” – axborot-kommunikatsiya texnologiyalari haftaligi bo'lib o'tdi. 2004 yildan beri o'tkazib kelinayotgan haftalik bir qator yirik xorijiy va mahalliy kompaniyalar o'zlarining yangi texnologik yechimlarini taqdim etgani bilan ahamiyatlidir.
Tadbir Toshkent shahrining 3 ta asosiy manzilida “CAEx (Central Asian Expo Uzbekistan)” ko'p funksiyali ko'rgazma markazi, Mirzo Ulug'bek tumanida joylashgan IT-Park Uzbekistan majmuasi, Alisher Navoiy nomidagi O'zbekiston milliy kutubxonalarida o'tkazildi. Haftalikning muhim tadbirlaridan biri Raqamli texnologiyalar va sun'iy intellektni rivojlantirish ilmiy-tadqiqot institutida o'tkazilgan “Sun'iy intellekt kelajagi va global integratsiya” mavzusidagi xalqaro sammit bo'ldi.
Ushbu tadbirda bir necha yetakchi xorijiy kompaniya va tashkilotlarning sun'iy intellekt yo'nalishida faoliyat olib boradigan ekspertlari va rahbarlar o'z taqdimotlari orqali erishilayotgan yutuqlar, tajribalar, shuningdek, sohadagi muammolar haqida mulohazalar bildirdilar.
Sammitda 100dan oshiq soha mutaxassislari, yangi innovatsiya va texnologiyalarga qiziquvchi talabalar hamda OAV xodimlari qatnashib, ushbu mavzuga oid yetarlicha ko'nikmalarga ega bo'ldilar.
— Xalqaro sammitni tashkil qilishdan ko'zlangan asosiy maqsad sun'iy intellekt texnologiyalarini hayotga tatbiq qilish bo'yicha eng so'nggi xalqaro tajriba bilan tanishish va fikr almashishdan iborat. Shuningdek, sun'iy intellekt va shu kabi texnologiyalarni davlatimizda ham rivojlantirib, ta'lim va tibbiyot sohasida keng talqinda foydalanishni maqsad qilganmiz, — dedi Raqamli texnologiyalar va sun'iy intellektni rivojlantirish ilmiy-tadqiqot instituti direktori Anvarxo'ja Qodirov. – Institutimiz 2021 yilda tashkil etilgan bo'lib, hozirga kunda “Amazon”, “KOILA”, “Huawei”, “UZINFOCOM”, “VEON”, “Yandex”, “Sber” kabi bir nechta uyushmalar bilan hamkorlikda faoliyat olib borilyapti. Asosiy vazifalarimizdan biri “Raqamli O'zbekiston — 2030” strategiyasini amalga oshirish, shuningdek, qabul qilingan ko'plab belgilangan vazifalarni bajarish va ularni amalga oshirishda sun'iy intellekt va raqamli texnologiyaning yordami qanday ahamiyat kasb etishini namoyon qilish. Shu nuqtai nazardan institutimizning o'z oldiga qo'ygan vazifalari bisyor va bu borada hali katta yutuqlarga erishamiz.
Xulosa qilib aytganda, bo'lib o'tgan sammit nafaqat tibbiyot, ta'lim, balki bank va turli yirik jabhalarda sun'iy intellekt va raqamli texnologiyalarni qo'llash, shuningdek, ushbu yutuqlarga erishgan tashkilotlar bilan tajriba almashish, hayotga joriy qilinishi kerak bo'lgan muhim tizimlarni va texnologik rivojlanishlarni o'rganish, ishlarni tahlil qilish va umumiy muhokamadan iborat bo'ldi.
Islom ASILBEKOV,
“Hurriyat” muxbiri.