Do'stlik va hamjihatlik rishtalari
Qo'qon shahrida Ozarbayjon hunarmandchiligiga oid milliy ko'rgazma ochildi
Dunyoda tili, urf-odatlari, madaniyati, hatto tashqi ko'rinishidan bir-biriga o'xshab ketadigan millat va elatlar ko'p. O'zbek va ozarbayjon xalqlarini ana shunday xalqlar qatoriga bemalol qo'sha olamiz. Har ikki millat vakillari bir-birini tarjimasiz tushuna oladi. Turmush tarzimiz, an'ana va urf-odatlarimiz, xalq og'zaki ijodi va yozma adabiyotda mushtarak jihatlarni ko'plab uchratish mumkin.
Bu ikki buyuk xalqni asrlar, ming yillar mobaynida bir-biriga bog'lab kelgan o'xshash jihatlar ham bor. Xalqlarimizning mushtarak yodgorligi hisoblanmish “Avesto” kitobi, shuningdek, xalq og'zaki ijodining o'lmas durdonalari sanalgan “Go'ro'g'li”, “Oshiq G'arib”, “Dada Qo'rqut” dostonlari ana shu azaliy qardoshlik, do'stlik va birodarlikning yorqin isbotidir. O'zbek musiqasining gultoji sanalgan nodir maqomlarimiz va betakror Ozarbayjon mug'omlari orasidagi hamohanglik har ikki xalq o'rtasidagi yaqinlikni o'zida ifodalaydi.
Ma'lumki, qadim va navqiron Qo'qon shahrida Xalqaro Hunarmandchilik festivali doirasida Xalqaro Hunarmandchilik muzeyi ochilgan edi.
Kuni kecha esa O'zbekistondagi Haydar Aliyev nomidagi Ozarbayjon madaniyat markazining loyihasi bilan Qo'qon shahridagi mazkur muzeyda Ozarbayjon milliy hunarmandchiligi, qo'l mehnatiga doir namunalar joylashgan doimiy burchagi — milliy stendining ochilishi o'tkazildi. Madaniy tadbirda Farg'ona viloyati Qo'qon shahar hokimligi, davlat va jamoat vakillari, ziyolilar, oliy ta'lim muassasasi talabalari va jurnalistlar ishtirok etishdi.
Dastlab uni kirish so'zi bilan ochgan Qo'qon shahar hokimi Ma'ruf Usmonov Ozarbayjon va O'zbekiston o'rtasidagi yuksak saviyali munosabatlar, so'nggi yillarda yo'lga qo'yilgan hamkorlik aloqalari haqida gapirdi. U Qo'qon shahrining qadimiy tarixi, bu yerda hunarmandchilik, qo'l mehnati san'atining keng rivojlanganini va har ikki yilda bir marta bu shaharda o'tkaziladigan Xalqaro Hunarmandchilik festivali doirasida 70 dan ortiq o'lka hunarmandlarining ishtirok etganini mamnuniyat bilan qayd etdi. Shuningdek, endilikda muzeyda Ozarbayjon hunarmandchiligiga oid eksponatlarning ham doimiy ravishda namoyish qilinishi do'stona munosabatlarning amaldagi tasdig'i ekanini bildirdi.
— Davlatlarimiz o'rtasidagi hamkorlikning muvaffaqiyatli yo'lga qo'yilgani, madaniy aloqalarning kuchayishi borasida qilingan ishlar haqida ko'p gapirish mumkin, albatta. Qo'qon shahrida yaratilgan muzeyda “Haydar Aliyev yili” munosabati bilan Ozarbayjon qo'l mehnatiga, hunarmandchiligiga oid qiziqarli eksponatlarning ko'rgazmasi har yili bu shaharga tashrif buyuruvchi millionlab turistlarning va an'anaviy tarzda o'tkaziladigan festival ishtirokchilarining orasida milliy madaniyatimizning keng targ'ibotiga imkon yaratishi shubhasizdir, — dedi Haydar Aliyev nomidagi Ozarbayjon madaniyat markazining direktori Samir Abbosov.
Hunarmandchilik muzeyida yaratilgan Ozarbayjon burchagida 130 yillik tarixga ega Ozarbayjonning Qorabog' gilami, xalqimizning kashtachilikka mansub eng qadimiy turi – takalduz (kashtachilik namunasi), ipakdan tikilgan ayollar bosh kiyimi – kalag'ayilar (uzun ro'mol turi), yog'och o'ymakorligi asosida tayyorlangan tarixiy Icharishahar va Shusha qal'asining tasvirlari aks etgan portretlar, Ozarbayjon bayrog'i aks etgan xaritamiz, milliy kiyimdagi qo'g'irchoqlar, milliy naqshlar bilan bezatilgan va xalqimizning boy madaniyatini aks ettirgan eksponatlar, maxsus dizayn asosida misdan tayyorlangan qadimiy chiroqning maketi va boshqa eksponatlar o'rin olgan. Bundan tashqari milliy burchakda ulug' yo'lboshchi Haydar Aliyevning yog'ochga chizilgan rasmi va imzosi, Ozarbayjon milliy musiqa asboblari va raqslari, xalq o'yinlari – kurash san'ati, gilam to'qigan Ozarbayjon ayoli, mug'om (maqom) ijro etgan uchlikni aks ettiruvchi yog'och va plastmassadan tayyorlangan maxsus maketlar ham bor.
Ko'rgazma doirasida Ozarbayjon madaniyat markazi loyihasi bilan o'zbek tiliga tarjima qilingan mumtoz adabiyot namoyandalari – Nizomiy Ganjaviy, Imomaddin Nasimiy, Muhammad Fuzuliy, Mulla Panoh Voqif, Xurshidbonu Notavon va boshqalarning asarlari ham taqdim etildi.
Ozarbayjon hunarmandchiligiga, qo'l mehnatiga doir ushbu ko'rgazma dunyodagi ozarbayjonliklarning birdamlik kuni va Yangi yil bayramiga qadar davom etadi. Ko'rgazma tugagach, undagi barcha eksponatlar doimiy ravishda Hunarmandchilik muzeyi inventariga topshirilishi ko'zda tutilgan.
Chindan ham, o'zbek xalqining ozar qardoshlarimizga bo'lgan ehtiromini juda ko'p misollar yordamida ko'rishimiz mumkin. Bugungi kunda yurtimizdagi ko'plab ko'cha va xiyobonlar, madaniy-ma'rifiy muassasalar ozarbayjon xalqining buyuk farzandlari nomi bilan ataladi. Xususan, poytaxtimizdagi ko'chalardan biriga ozar xalqining umummilliy yetakchisi Haydar Aliyevning nomi berilgan. Toshkent shahrida faoliyat ko'rsatayotgan Ozarbayjon milliy madaniyat markazi binosi oldida buyuk davlat va siyosat arbobiga yodgorlik o'rnatilgan. Umuman, xalqlarimizni birlashtirib turgan yaqinlik, do'stlik va hamjihatlik naqadar qadimiy bo'lsa, uning istiqboli ham shu qadar boqiydir.
Islom ASILBEKOV.