Lazgi parijliklarni maftun etdi

Navro'z shukuhi dunyo ahlini ham maftun etmoqda. Parijdagi mashhur madaniy maskanlaridan biri – “Theatre de la Ville” teat­rida Navro'z bayramiga bag'ishlangan konsert dasturi bo'lib o'tdi.

 Qayd etish joizki, ushbu teatr har yili Fransiya poytaxti aholisi va mehmonlarini Navro'z bayrami nishonlanadigan mamlakatlar madaniyati bilan tanishtirib boradi. Bu yilgi tadbirda O'zbekiston, Qozog'iston va Erondan  kelgan san'atkorlar ishtirok etdi.

O'zbekiston san'at ustalari tomonidan taqdim etilgan “Xorazm oqshomi” dasturida Davlat filarmoniyasi solisti, “Nihol” mukofoti sohibi Dilnoza Ortiqova, Davlat “Lazgi” ashula va raqs ansambli xonandasi Dilmurod Otajonov, sozanda San'atbek Shukurullayev va Mukarrama Turg'unboyeva nomidagi “Bahor” davlat raqs ansambli sozandasi To'lqinbek Tojiyev tomonidan o'zbek milliy kuy va qo'shiqlari ijro etildi.

O'zbekistonlik qo'shiqchilarning chiqishlari  shu kuni “Theatre de la Ville” teatriga kelgan tomoshabinlarda iliq taassurot qoldirdi va  ularning davomiy olqishlariga sazovor bo'ldi.

Quvonarlisi, konsert yakunlanganidan so'ng, fransuz tomoshabinlarining taklifiga binoan “Theatre de la Ville” foyesida o'zbek san'at  ustalari lazgini qaytadan ijro etishdi.

Tadbir doirasida O'zbekiston xalq artisti Gavhar Matyoqubova, Mukarrama Turg'unboyeva nomidagi “Bahor” davlat ansambli direktori Gulnora Musayeva va raqqosa Dilnoza Ortiqova tomonidan “Lazgi” raqsi bo'yicha mahorat darsi tashkil etildi. Fransuz raqs ixlos­mandlari lazgining tarixi va turlari bilan tanishdilar, shuningdek, Dilnoza Ortiqova ko'magida Xorazm raqsining ba'zi elementlari va plas­tikasini o'rgandilar.

Fransiyadagi Temuriylar tarixi va san'atini o'rganish assotsiatsiyasi prezidenti      Frederik Bressan:

— “Theatre de la Ville”da xorazmlik san'atkorlar ishtirokidagi konsertga tashrif buyurganimdan juda xursandman. Lazgi raqsi juda ajoyib, ayniqsa, go'zal raqqosa Dilnoza Ortiqovaning  chiqishlari menda katta taassurot qoldirdi. Ushbu konsert parijliklar uchun Navro'z bayramiga haqiqiy sovg'a bo'ldi. O'zbekiston san'atkorlarining Fransiyaga gas­trol safarini uyushtirganlarga minnatdorlik bildiraman.

Tomoshabin Jouve Vilar:

— Parijlikman, bugun Navro'z bayrami munosabati bilan tashkil qilingan konsertni tomosha qilish uchun ushbu teatrga keldim. O'zbek san'atkorlari ijrosidagi qo'shiqlarni tinglash, raqslarni tomosha qilish, o'zbek musiqa mada­niyati bilan tanishish imkoniyatiga ega bo'lganimdan bag'oyat xursandman. Bugungi konsert men uchun haqiqiy syurpriz bo'ldi. Katta rahmat.

“Dunyo” AA,

Parij shahri.