O'zlik g'oyasi nega o'n qadam oldinda yurishi kerak?

Kecha Prezidentimiz Shavkat Mirziyoyev raisligida bo'lib o'tgan Ma'naviyat va ma'rifat kengashining kengaytirilgan yig'ilishi tarixiy bir anjuman bo'ldi desak xato qilmagan bo'lamiz. Negaki, unda Davlatimiz rahbarining so'zlagan nutqi har bir uyg'oq qalbli yurtdoshlarimizning qalbini to'lqinlantirib yubordi.

Albatta, so'nggi yillarda ma'naviy-ma'rifiy sohalarda juda katta ishlar amalga oshirilmoqda. Ijod ahli hamisha qo'llab-quvvatlanmoqda. Madaniyat va san'at sohasi uchun birgina yakunlanib borayotgan 2023 yilda 712 milliard so'mdan ortiq mablag' yo'naltirilgani fikrimizning yorqin dalilidir.

Yangi O'zbekistonda “Maqom”, “Baxshichilik”, “Hunarmandchilik”, “Lazgi” kabi yo'nalish­larda xalqaro festivallar o'tkazish an'anaga aylanib ulgurdi. Poytaxtimizda Adib­lar xiyoboni tashkil etilgani, Yozuvchilar uyushmasining muhtasham binosi qurib berilgani, ijodkor adiblarga imtiyozli asosda uy-joylar berilgani… bularning bari ma'naviyat ahliga yuksak e'tibor namunasi, albatta.

Yurtboshimiz uzoq yillar aytilmay kelgan jadidlar merosini o'qib-o'rganishga, ma'rifatparvar bobolarimizning jasoratini qalblarga singdirishga da'vat etib kelmoqda. Shu yo'lda yaqinda poytaxtimizda o'tkazilgan “Jadid­lar: milliy o'zlik, istiqlol va davlatchilik g'oyalari” mavzusidagi konferensiya butunjahon jamoatchiligi o'rtasida katta qiziqish va e'tibor uyg'otgani bejiz emas. Chunki, ma'rifatparvar bobolarimiz xalqimizning ozod va hur yashashi uchun jonlarini tikkan zotlar edilar. Ular g'oyalari hurlik istagan dunyodagi barcha xalqlar uchun ham katta e'tiborga ega edi.

Prezident nutqidan ma'lum bo'ldiki, yurtimizda “Jadid” nomli yangi gazeta tashkil etiladigan bo'ldi. Demak, adolatparvar, elparvar bobolarimizning asarlarini o'qib va uqib olishimiz yo'lida yana bir xayr­­li tashabbus ro'yobga chiqadigan bo'ldi.

Ma'naviyat va ma'rifat kengashining yig'ilishida Prezidentimiz bugun dunyoda kechayotgan tahlikali vaziyatga e'tibor qaratar ekan, uzoqda turib milliy o'zligimizga, taraqqiyotimizga, hur va erkinligimizga tosh otayotgan kimsalar, turli siyosiy kuchlar ham yo'q emasligini, bu borada birinchi navbatda har bir ziyolidan, ma'rifat ahlidan ogoh bo'lishni, Vatan taqdiri uchun befarq bo'lmasdan hamisha o'z so'zimizni ayta bilish lozimligini ta'kid­ladi.

– Tarixdan ma'lum: Vatan va xalq taqdiriga nisbatan tahdidlar kuchaygan vaziyatda aynan millat fidoyilari – uyg'oq qalbli ziyolilar, shoir va adiblar, san'at namoyandalari, ma'naviyat va ma'rifat sohasi xodimlari jasorat bilan maydonga chiqqanlar. Mamlakatimiz o'z taraqqiyotining yangi, yuksak bosqichiga kirayotgan hozirgi paytda bizga jadid bobolarimiz kabi G'arb ilm-fan yutuqlari bilan birga, milliy qadriyatlar ruhida tarbiya topgan yetuk kadrlar suv bilan havodek zarur, – dedi Shavkat Mirziyoyev.

O'zbek tilini o'qitish, kerak bo'lsa, bu yo'lda rag'batlantirish masalalari ham o'rtaga tashlandi. Ona tilimizga bo'lgan e'tibor, jonkuyarlikni Prezidentimizdan o'rganmoq, ulgu olmoq lozim. Dunyo minbarlarida turib o'zbekcha gapirayotgan yurtboshimiz xalqimizning ziyoli qatlamiga o'zbek tilining qadrini yanada oshirishga da'vat etdi.

Shuning uchun ham, “Bugun ma'naviyat boshqa sohalardan o'n qadam oldinda yurishi, ma'naviyat yangi kuchga, yangi harakatga aylanishi” kerakligini bildirdi.

Darhaqiqat, inson ma'naviy barkamol bo'lsa, yurtini, xalqini, milliy qadriyatlarini e'zozlasa, o'zligini tanisa, qolgan barcha narsalarni qo'lga kiritishi mumkin. O'zini tanimagan, o'zligining qadriga yetmagandan hech narsa kutib bo'lmaydi. Mana, eng ulug' g'oya, oliy maqsad qaerda!

O'zbekistonda ma'naviyat va ma'rifat masalasi birinchi darajaga ko'tarilmoqda. Hatto iqtisodiyotdan ham muhimroq narsa bu ma'naviyat va ma'rifatdir, dedi davlatimiz rahbari. Shuning uchun ham kitobxonlikka, teatrga, musiqa va san'at maktablariga, ommaviy axborot vositalariga e'tibor yanada oshirilishi xususida bildirgan fikrlari, tashab­buslari qalblarimizni to'lqinlantirib yubordi.

Islom EGAMBERDI o'g'li.