Yaxshilikning javobi

Assalomu alaykum, aziz bolajonlarim! Bu dunyoi azalda tafakkurga ega bo'lgan yagona zot inson ekanligini bugun hamma bolalaru yoshlar bilasizlar. Sizlar o'z tafakkuringiz  vositasida yaxshi nimayu yomon nimaligini, halol-haromni, savob va gunohni farqlay olasizlar. Bu — yaxshi amal. Endi bitta savolga o'zim javob aytsam. Har birimiz bir kunda necha marta qo'l ochib duo qilinishini bilamizmi? Albatta bilamiz. Duo paytida faqat yaxshi tilaklar Allohdan so'raladi. Bu ham yaxshi odat va odob. Odatga ko'ra qo'l duoga ochilganda, har bir insonga, avvalo imon, insof, diyonat so'raladi. Boisi, mana shu mushtarak tushunchalar kimda mujassam bo'lsa, undan aslo yomonlik chiqmaydi.

Siz aziz farzandlarimga murojaat qilaman, aytinglar-chi, ma'naviyat degan so'z o'z ichiga olgan odob-axloq, bilim, ilm, imon-e'tiqod, vijdon, amaliy ko'nikma, halollik va adolat tushunchalaridan qaysi biriga egasiz? O'ylab ko'ring! Xulosa qilish o'zingizga qoldi.

Men siz aziz farzandlarimga havas qilaman. Siz azizlar Yangi O'zbekistonning ertangi kunida yashaydigan, shu go'zal Vatanning aziz odamlari bo'lasiz. Shu makonda baxtli-iqbolli bo'lib, haqiqat va adolat yukini yelkangizda ko'tarib, hur va farovon  yashaydigan sizlardan umidimiz katta! Demak, bir so'z bilan aytganda, sizlarni imonli, e'tiqodli bo'lishingizga chaqiraman va bunga ishonaman.

Sizlarga baxtli kelajakni tilab, sal kam 84 yoshni qarshi olayotgan kamina yozuvchi, dramaturg buvangiz bir hikoyatni aytib bermoqchiman.

…Qadim-qadim zamonda, katta bitta mamlakatda bir o'ziga to'q, boy kishi bo'lgan ekan. Ammo u shunday ziqna, xasis ekanki, bir qora tangasini ham osonlikcha sarflagisi kelmas ekan. Hatto o'sha mamlakatning shohi ham uning shunaqaligini eshitgan ekan. Kunlardan bir kuni qarasa, o'sha boy yo'llar, ko'priklar qura boshlabdi, kambag'allarga uy-joylar qurib beribdi, ko'p bolali yordamga muhtoj oilalarning xatna to'ylarini o'tkazib berayotganmish.

Mamlakat podshohi uning taqvodorligini eshitib, o'z minnatdorligini aytish uchun boyni o'z huzuriga taklif qilibdi. “Ey, boy, xafa bo'lmaysiz, sizni o'ta xasis kishi deb eshitgandim, nima bo'ldiyu, siz o'z hisobingizdan mamlakatga katta yordamlar qilayotgan emishsiz, buning boisi nimada?” Savolga javob shunday bo'libdi: “Shu kungacha bu dunyoda halol ishladim va halol yashadim. Menga Alloh ko'p davlat berdi. Uni huda-behudaga sarf etmay, ancha mol-mulk yig'dim. Endi umrim oxiriga borayotganida u dunyo uchun ham savobli ishlardan qilishim kerakligini angladim. Shu bois qo'limdan kelgancha yo'qsillar g'amida bo'lgan barcha ishlarga sarflab turibman, ey, olampanoh!” — debdi.

“Mamlakatga yordamingiz katta bo'lib, elning og'irini yengil qilayotganingiz uchun sizga tashakkur bildiraman. Sog'-salomat bo'lib, bu savobli ishlaringizni to'xtatmang. Alloh bu fazilatu saxovatingizni qadrlashiga, sizga o'z yaxshilik­larini, fazlu karamini ato etishiga men ishonaman”, debdi shoh.

Podshohning bu gapini eshitgan boy shu zahoti “Ashhadu alla-a ila-ha illallohu va ashhadu anna Muhammadan 'abduhu va rasuluh”  deya, ya'ni Alloh yagona va buyuk, U bizlarga yuborgan payg'ambari Muhammadga hamdu sanolar bo'lsin, degan so'zlarni aytibdi. Boyning bu tilovati podshohga juda ma'qul bo'lib, shu ondayoq uni katta bir viloyatga hokim etib tayinlabdi.

E'tibor qiling, demak, yaxshilikning nihoyasi yaxshilik bilan tugar ekan-da.

Xulosa: bu hikoyatlardan ibrat oling, aziz bolajonlarim, hamisha yaxshilik qilishga, odamlarning rahmatini olib yurishga intiling. Bundan, albatta, o'zlaringiz yaxshilik ko'rgaysiz.

To'lqin MUHIDDIN,

yozuvchi, dramaturg.