Jurnalistlar

Bu yo'llarning so'qmoqlari og'ir-og'ir,

To'g'ri so'zning to'qmoqlari og'ir-og'ir,

Zarbalardan yelkalarim hamon og'rir,

Og'ir yukka yelka tutgan jurnalistlar,

Oq tonglarni bedor kutgan jurnalistlar.

Gohi otliq, goho yayov tog'lar oshib,

So'z aytmoqning ishqi bilan yonib, shoshib,

So'qmoqlarda goh adashib, goh talashib,

Igna bilan quduq qazgan jurnalistlar,

Ne bo'lsa-da, haqni yozgan jurnalistlar.

Bu yo'llardan kim kelmagan, kim ketmagan,

Manziliga kim yetgan-u, kim yetmagan,

Haq so'z aytgan zotlarni el unutmagan,

Ona yurtning ko'zi bo'lgan jurnalistlar,

Olov yanglig' so'zi bo'lgan jurnalistlar.

Jurnalistning noni qattiq bo'lar emish,

Nonidan ham joni qattiq bo'lar emish,

Bir so'z ichra ming tug'ilib, o'lar emish,

El ishiga fido bo'lgan jurnalistlar,

Haq yo'lida ado bo'lgan jurnalistlar.

Ash'or bitdim bayramingiz bir bahona,

Sizga umr tilamasman zo'r, shohona,

Quchog'idan ayirmasin Vatan-ona,

Shu Vatanga ko'ksi qalqon jurnalistlar,

Har biri bir O'zbekiston, jurnalistlar!

Har bir jumla — yuragingiz bir parchasi,

Ma'rifatu ma'naviyatning darchasi,

Poyandozdir sizga she'rimning barchasi,

Millat sha'ni, iftixori jurnalistlar,

Yor Muhammad dil iqrori jurnalistlar!

Yor MUHAMMAD