Tamaddun beshigi

Surxon diyori sayyohlarni o'ziga jalb qilmoqda

Alpomishlar yurti deb atalmish Surxondaryo zamini juda qadim o'tmishga ega, kerak bo'lsa, har bir toshi moziydan so'zlaydigan hikmatli yurtdir. U ne-ne hodislarning guvohi bo'lmagan, bu go'zal yurtni ishg'ol qilmoq niyatida ne-ne jahongirlar ot surib bostirib kirmagan deysiz?

Ammo hech bir bosqinchi Surxon elining qaddini buka olmadi, ne-ne xunrezliklarni, azobu uqubatlarni boshdan kechirsa-da, aslo o'zligini yo'qotmadi, yo'q bo'lib ketmadi. Bu haqda Kasteliya qiroli Genrix IIIning  Amir Temur saro­yidiga elchisi Rui Gonzales de Klavixo bu haqda juda qimmatli ma'lumot yozib qoldirgan:

“…Termizga kirgach, hamma vaqt har xil narsa sotilayotgan maydonlar va gavjum ko'chalar orqali o'tib, uzoq vaqt yurib, o'z manzilimizga yetib keldik…”

Darhaqiqat, ana shunday o'tmishi juda-juda olislarga borib taqaladigan Surxon diyori bugungi kunda ham yangi O'zbekistonning eng diqqatga molik va go'zal go'shasidir. Bu yurt bugun butun dunyo sayyohlarini o'ziga jalb qilayotgani bejiz emas.

Darvoqe, sport mamlakatni qanchalik tez jahonga tanitsa, turizm ham bugun davlatning dunyoda borligi va o'z o'rniga ega bo'lib borayotganini ko'z-ko'z qilishda sportdan qolishmaydi.

Xabaringiz bor, yaqinda Prezidentimiz Shavkat Mirziyoyev raisligida hududlarda turizm infratuzilmasini yaxshilash va xorijiy turistlar oqimini yanada ko'paytirish chora-tadbirlari yuzasidan videoselektor yig'ilishi va sohada faoliyat yuritayotgan tadbirkorlar bilan muloqot o'tkazildi.

Unda Davlatimiz rahbari bugun turizm imkoniyatlari kengayib, xorijiy sayyohlarning e'tibori mamlakatimizga qaratilayotgani va shu sohada faoliyat yuritayotgan investorlar hududga investitsiya kiritishga intilayotganini alohida ta'kidladi. Shu o'rinda turizmni yanada rivojlantirish borasida Surxondaryo viloyatining imkoniyatlari kundan-kun ortib, sayyohlar ayni vohaga intilayotganiga urg'u berib, birgina “Boysun bahori” xalqaro folklor festivali o'tkazilayotgani natijasida qadim va navqiron Surxondaryoga sayyohlar oqimi 4 karra ko'payganligini ta'kidladilar.

Tarixi uzoq ming yilliklarga borib taqaladigan, moziyning juda olis davrlaridanoq tarixiy qadamjolari, ulkan me'moriy yodgorliklari, boy madaniy merosi bilan dunyo xalqlarining hayrati va havasini uyg'otib kelayotgan Surxondaryoning dovrug'i kundan-kunga bo'y ko'rsatib, jahon maydonida nafaqat savdo-iqtisodiy, investitsion jozibadorligi, balki turizm salohiyatini ham namoyish etib kelmoqda. Surxondaryoning har bir hududida o'ziga xos turizm o'choqlari mavjudki, bunday maskanlarga tashrif buyurgan kishi vohadan ketgisi kelmay qolishi aniq.

Yaratganning inoyati ila in'om etilgan betakror tabiat, so'lim go'shalar, qadim-qadriyatlarni o'zida mushtarak etgan turmush tarzi, madaniy va tarixiy yodgorliklar, turistlar uchun yaratilayotgan shart-sharoit va diqqatga sazovor ob'yektlarga olib boruvchi zamonaviy infratuzilma — bularning bari Surxon vohasining boy tarixini ko'z-ko'z qilish va shu orqali sayyohlar oqimini hududga jalb etish barobarida ijtimoiy-iqtisodiy salohiyatini yanada rivojlantirish, xalqaro aloqalarni kengaytirish maqsad qilingan.

Birgina “Boysun bahori” folklor festivalining o'ziyoq viloyat nufuzini yetti iqlimga taratmoqda, mahalliy va xorijiy sayyohlarning diqqatini Surxonga jalb etmoqda, desak mubolag'a bo'lmas.

Shu yilning 1-7 may kunlari yuksak badiiy saviyada o'tkazilgan xalqaro folklor festivali doirasida so'lim tog'lar qo'ynidagi Boysun tumanidagi “Bibishirin” mahallasida zamonaviy turistik maskan barpo etildi. Bu yerda besh qavatli, to'rt yulduzli muhtasham mehmonxona, yirik sahnaga ega amfiteatr, hududlar qo'rg'onlari uchun joy, etnosport maydonchalari va bosh­­qa infratuzilma inshootlari barpo etildi. O'tovlar o'rnatilib, Termiz shahri, tumanlar va viloyat tashkilot, muassasalarining 21 ta qo'rg'oni tashkil etildi.

Festivalda dunyoning 50 dan ortiq davlatlaridan martabali mehmonlar, soha mutaxassislari, san'atkorlar va muxlislar ishtirok etdi. Milliy qadriyatlar ulug'langan shodiyonada 16 ta xorijiy davlat, jumladan, Braziliya, Belarus, Belgiya, Buyuk Britaniya, Italiya, Qozog'iston, Qirg'iziston, Ozarbayjon, Portugaliya, Rossiya, Ruminiya, Tailand, Tojikiston, Hindiston va Eron davlatlaridan 81 nafar, mamlakatimizdan 130 nafar ijodiy jamoa a'zolari va yakkaxon san'atkorlar, Qoraqalpog'iston Respublikasi, viloyatlar va Toshkent shahridan 250 nafar, Surxondaryo viloyatining tuman-shaharlaridan 1000 nafarga yaqin folklor ishtirokchilari tomonidan xalq og'zaki ijodining eng go'zal navolari, milliy an'analari yuksak mahorat bilan tarannum etildi.

YuNESKO, Turkiy davlatlar tashkiloti (TDT), TURKSOY kabi nufuzli xalqaro tashkilotlar hamkorligida tashkil etilgan festival qadimiy va hamisha navqiron vohaning boy sayyohlik salohiyatini keng targ'ib qilishga yo'naltirilgani bilan ham ahamiyatli bo'ldi.

7 kun davom etgan xalqaro folklor festivalida 400 dan ortiq xorijiy qatnashchilar, 20 nafar yuqori martabali mehmonlar, jami 50 ta xorijiy davlatdan 10 ming 200 ga yaqin xorijiy sayyohlar tashrif buyurdi.

Ushbu ma'lumotlardan ham ko'rinib turibdiki, Surxon diyorida turizm imkoniyatlari kengayib bormoqda. Mutasaddilar ham bevosita turizm voha kelajagida o'ziga xos o'rin egallashini alohida e'tirof etib, ushbu sohani yanada rivojlantirishga katta e'tibor qaratishmoqda.

* * *

Surxondaryoda 600 ga yaqin madaniy meros ob'yekt­lari mavjud bo'lib, ushbu turistik maskanlarning har biriga sayyohlarni jalb etish, turizm maskanlarini yanada obod qilish, shart-sharoitlar hozirlab, sayohatchilarning eng sevimli maskaniga aylantirish muhim masalalardan sanaladi.

O'tgan davr mobaynida turizmni rivojlantirish borasida amalga oshirilayotgan ishlarni tahlil qiladigan bo'lsak, birgina 2023 yil viloyatga 32 ta investitsion loyiha jalb etilib, 172,8 milliard so'm mablag' o'zlashtirildi.

Shuningdek, joriy yilning o'tgan davri mobaynida hudud infratuzilmasini yaxshilash va turistlarga qulayliklar yaratish maqsadida 31 ta Wi-fi nuqtalari tashkil etildi va “O'zstandart” asosida 15 ta tumanda joylashgan yodgorliklarga jami 28 ta yo'l ko'rsatkich belgilari o'rnatildi.

Hududdagi joylashtirish vositalari soni 215 taga yetkazildi (shundan 58 tasi mehmonxona, 19 tasi xostel, 138 tasi oilaviy mehmon uylari bo'lib, ulardagi jami xonalar soni 1930 ta hamda o'rinlar soni 4228 tani tashkil qiladi). Shuningdek, 91 ta sanatoriy va klinika bo'lib, ularda 3 300 dan ziyod koykalar mavjud. Shu bilan birga, 58 ta turoperatorlik sub'yekti, 124 ta turistik sinfga mansub avtobus, 48 ta avtobus, 44 ta mikroavtobus, 2 ta elektromobil, 3 ta gidrotsikl, 4 ta motorli qayiq va boshqa transport vositalari sayyohlar xizmatiga shay turibdi.

Oxirgi 3 yil ichida turizm sohasida faoliyat ko'rsatayotgan kompaniyalar soni 2-2,5 barobarga oshgan. Jumladan, o'tgan yili jami turistik korxonalar 260 tani tashkil etgan bo'lsa, 2024 yilga kelib, ularning soni 275 taga yetkazildi.

Viloyatimizda jami 58 ta turoperator va turagentlar faoliyati yo'lga qo'yilgan bo'lib, shundan 2024 yil mobaynida 6 ta sayyohlik korxonasi (2 ta turoperator, 4 ta turagent) faoliyati yo'lga qo'yilgan. Yil boshidan buyon 5 ta mehmonxona, 4 ta mehmon uyi, 2 ta xostel ishga tushirildi.

Turizmni rivojlantirish borasida amalga oshirilayotgan loyihalar negizida nafaqat sayohatchilarni hududga jalb etish, balki mahalliy aholi vakillarining ham turizm yo'nalishidagi qiziqish va imkoniyatlarini kengaytirish, shu yo'nalishda tadbirkorlikni yo'lga qo'yib, yangidan-yangi ish o'rinlari yaratish kabi ustuvor vazifalar ham belgilangan. Negaki, qanchalik sayyohlar tashrif buyursa, eng avvalo, turoperatorlarga, mehmonxonalar, shuningdek, ular uchun milliy va zamonaviy taomlarni hozirlaydigan oshpazlar uchun shu qadar xizmat ko'rsatish imkoniyatlari oshib boradi. Eng muhimi, yurtimizning, diyorimizning go'zal go'shalari, qadim qadamjolari bilan dunyoni yanada kengroq tanitish imkoni oshadi.

UChTA hududda turistik zona

Viloyatda turizm sohasiga investorlarni jalb qilish maqsadida kichik turistik zonalar, turizm klas­terlarini tashkil etish bo'yicha amaliy ishlar olib borilmoqda. Xususan, Surxondaryoning eng diqqatga sazovor hududlari tanlab olinib, 3 ta hududda kichik turistik zonalar tashkil etish ko'zda tutilgan. Jumladan, Boysun tumanida “Omonxona” qishlog'i, “Zovboshi” tog'li hududi, “Darband” qishlog'i hududlarini o'z ichiga olgan Boysun kichik turizm zonasini tashkil etish borasida ham bir qator amaliy ishlar olib borilmoqda.

Ayni vaqtda “Boysun-Termiz qurilish” MChJ tomonidan Boysun tumanining “Inkobod” mahallasi, “Zovboshi” massivida 7,5 ga yer maydonida turizm klas­teri tashkil etilgan. Kiritilgan investitsiya miqdori 15 mlrd so'mni tashkil etadi.

Sariosiyo va Uzun tumanlarida Xonjiza tog' tizmalari yon bag'irlarida hamda Sariosiyo tumani Sangardak qishlog'i hududlarida Sariosiyo kichik turizm zonasi tashkil etilib, hozirda dor yo'li loyihasiga start berildi. Ushbu hududda Sangardak — turizm qish­log'i maqomini oldi. “To'palang” milliy tabiat bog'i hamda To'palang suv ombori hududida ekoturizm maskanini tashkil etish bo'yicha yumushlar qizg'in kechmoqda.

Shuningdek, Sherobod tumani Shalqon qishlog'i, Xo'jaikon tuz koni hamda hududdagi mevali bog'larni o'z ichiga olgan Sherobod kichik turizm zonasini tashkil etish hamda ularda zamonaviy mehmonxona maj­mualari, madaniy-sog'lomlashtirish, savdo-ko'ngilochar va turizm ahamiyatiga ega bo'lgan boshqa ob'yektlar qurish, zamonaviy muhandislik infratuzilmasi ob'yekt­larini tashkil etish ham sayohatchilarni vohamizga jalb etish va ular uchun munosib shart-sharoit yaratish borasidagi muhim yo'nalishlarimizdandir.

Ushbu hududda “Zarautsoy maskani” MChJ tomonidan ekoturizm zonasi va mehmon uylari, shuningdek, Xo'jaikon tuz koni hududida davlat sherikchiligi asosida turistik maskanlar tashkil etilmoqda.

“Turizm ko'chalari” xizmatga shay

Quvonarlisi, viloyatimizda jami 4 ta turizm ko'chasi tashkil etilgan bo'lib, Boysun tumanidagi Olmazor ko'chasi turizm ko'chasiga aylantirilishi natijasida 45 ta xizmat ko'rsatish ob'yekti ishga tushdi va 64 ta doimiy yangi ish o'rni yaratildi. Denov tumanidagi Mustaqillik ko'chasi turizm ko'chasiga aylantirilishi natijasida 70 ta xizmat ko'rsatish ob'yekti tashkil etildi va 91 nafar fuqaro doimiy ish bilan ta'minlandi. Shuningdek, Sherobod tumanidagi Ahmad Donish ko'chasi turizm ko'chasiga aylantirilishi natijasida 41 ta xizmat ko'rsatish ob'yekti ishga tushdi va 65 ta doimiy yangi ish o'rni yaratildi. Termiz shahridagi Navbahor va Dilnavo ko'chalari turizm ko'chasiga aylantirilishi natijasida esa 53 ta xizmat ko'rsatish ob'yekti tashkil etildi va 78 ta doimiy yangi ish o'rni ochildi.

Bundan tashqari, 211 ta turizm infratuzilmasi yaratildi (152 ta Wi-fi nuqtasi, 57 ta SGSh va 2 ta turizm axborot markazi). 2024 yil uchun viloyat doirasida jami 25 ta ommaviy turizm tadbirlari rejalashtirilgan bo'lib, 2024 yil iyun holatiga ko'ra viloyatda 11 ta ommaviy turizm tadbirlari o'tkazildi. Shundan 6 tasi xalqaro tadbirlar hisoblanadi.

Xorijliklarning qiziqishi boshqacha

Turizm yo'nalishidagi xalqaro aloqalarimiz ham yildan-yilga mustahkamlanib bormoqda. Shu yilning yanvar-fevral oylarida Yaponiya davlati poytaxti Tokio shahrida “Surxondaryo viloyatining turizm salohiyati” nomli targ'ibot dasturi amalga oshirildi va Yaponiyaning bir nechta sayyohlik agentlari bilan hamkorlik shartnomalari imzolandi. Aprel-may oylarida esa Surxondaryo — Pekin hamda Surxondaryo — Vengriya o'rtasida investitsiyalar, sanoat, savdo va turizm hamkorligi istiqbollari mavzusidagi forumlarda ham bir qator manfaatli kelishuvlarga erishildi.

Bundan tashqari, joriy yilning 28-29 fevral kunlari viloyatimizda Surxondaryo-Yaponiya investitsion forumi tashkil etilgan bo'lib, o'tgan investitsiya forumida viloyat hududiga xorijiy sayyohlarni jalb qilish bo'yicha muhim kelishuv va muhokamalar o'tkazildi. Jumladan, Yaponiyaning Tokio, Nagoya va Xokkaydo viloyatlari vakillari bilan Surxondaryo viloyatiga sayyohlarni jalb qilish bo'yicha muhokamalar bo'lib o'tdi. Buning natijasida joriy yilning yakuniga qadar viloyat hududiga qo'shimcha ravishda 200 ming nafar xorijiy sayyoh jalb qilinishi rejalashtirilib, jami tashrif buyurgan xorijiy sayyohlar sonini 750 ming nafarga, shuningdek, turizm eksporti hajmini 150,0 mln AQSh dollariga yetkazish rejalashtirilgan.

Turizm va manfaatli investitsiya

Investitsiya forumida vohalik 50 dan ortiq tadbirkorlar qatnashib, jami 650,0 mln AQSh dollari miqdoridagi 18 ta yirik loyihalarni amalga oshirish bo'yicha kelishuv shartnomalari imzolandi. Xususan, Surxondaryo-Yaponiya texnologik universitetini tashkil etish ham loyihalar qatoridan joy olgan.

Shu bilan birga, 14 ta loyihaga 316,0 mln AQSh dollari miqdorida pul tikuvchi mahalliy investorlar jalb qilinib, bu borada kelishuv shartnomalari imzolandi.

Shuningdek, joriy yil 1 iyun holatiga ko'ra, viloyat hokimligi, turoperator va mehmonxonalar tomonidan 8 ta xorijiy davlat (Xitoy, Turkiya, Singapur, Yaponiya, Janubiy Koreya, Vengriya, Eron va Tojikiston) vakillari va turizm sohasidagi tadbirkorlari bilan yaqin aloqalar o'rnatilib, turizm sohasida investitsion loyihalarni amalga oshirish, qolaversa, kirish va chiqish turizmini ko'paytirish bo'yicha muhokamalar o'tkazildi.

Turizmga investitsiya jalb qilish yo'nalishidagi mazkur rasmiy uchrashuvlarda turli sohalar bo'yicha shartnomalar imzolangan bo'lib, erishilgan kelishuv-shartnoma talablarini o'z muddatlarida amalga oshirish maqsadida nazorat rejasi ishlab chiqilib, Turizm qo'mitasiga taqdim etildi.

Shu yilning o'zida ikki bor viloyatimiz hokimi Ulug'bek Qosimov rahbarligidagi viloyat delega­siyasi Xitoy davlatida bo'ldi. Tashriflar davomida nafaqat Xitoy davlati iqtisodiy kompaniya vakillari bilan, balki sayyohlik agentliklari raislari va sayyohlik kompaniyalari prezidentlari hamda bosh ijrochi direktorlar bilan ham ikki tomonlama uchrashuvlar o'tkazildi. Muzokaralar davomida Xitoy davlati yetakchi sayyohlik kompaniyalari bilan hamkorlikda O'zbekistonning turizm salohiyati haqida broshyuralarni chop qilish, keng tarqatish, Termiz va Xitoy shaharlari o'rtasida charter reyslarni tashkil etish, xorijiy sayyohlarni qabul qilish imkoniyatlari va shart-sharoitlari bilan tanishtirish maqsadida 2024 yilda Xitoy sayyohlik kompaniyalari vakillaridan iborat delegatsiyaning Surxondaryoga tashrifini tashkil qilishga kelishib olindi.

Shuningdek, Yaponiyaning “H.I.S.Co.Ltd.” sayyohlik kompaniyasi bilan hamkorlikda Surxondaryo viloyatining turizm salohiyatini targ'ib qilishga bag'ishlangan videorolik suratga olish, ziyorat, gastronomik va ekoturizm yo'nalishlari bo'yicha yangi “turizm kontentlari”ni ishlab chiqish, mamlakatimiz uchun ishlab chiqilayotgan turizm marshrutlariga Termiz shahrini kiritgan holda broshyuralar tayyorlash bo'yicha kelishuvlarga erishildi.

E'tiborlisi, Yaponiyaning “Alpha Gakuin” ins­tituti bilan hamkorlikda jami 30 kishidan iborat maktab va maktabgacha ta'lim muassasalari mudirlari hamda direktorlarini yapon tili va Yaponiyadagi bog'cha hamda maktablardagi o'qitish sistemasini o'rgatish bo'yicha kelishuvga erishildi. Ushbu loyiha 2024 yil 1 iyundan 2025 yil may oyiga qadar davom etadi. Kurs yakunlangandan so'ng maktab va maktabgacha ta'lim muassasalarining mudirlari va direktorlari Yaponiya davlatiga malaka oshirishga yuboriladi. Lo­yihadan asosiy ko'zlangan maqsad — Yaponiya ta'lim sistemasini o'zimizda joriy etishdir.

O'tkazilgan ommaviy hamda xalqaro tadbirlar natijasida viloyatga jami 20 ming nafar sayyoh tashrif buyurib, shundan 4 ming nafari xorijiy sayyohlarni tashkil etdi.

Ellin madaniyati — ochiq muzeyda

Vohada turizmni rivojlantirish maqsadida oldimizga bir qator reja va maqsadlarni qo'yganmizki, yil davomida viloyatimizga kelayotgan xorijiy turistlarning sonini 500 mingtaga, mahalliy turist­lar sonini 1 million 800 mingtaga hamda turizm eksporti hajmini 100 mln dollarga yetkazish belgilangan. Shuningdek, turizm va yondosh xizmat ko'rsatish sohalarida 23 ta yangi investitsiya loyihasi doirasida 510 mln dollar investitsiya mablag'lari hamda 48 ta yangi mehmonxona loyihalari doirasida 45 mln dollar investitsiya mablag'lari jalb qilinadi hamda 1 550 ta ish o'rnini yaratish rejalashtirilgan. Yil yakuniga qadar 35 ta ob'yektga 195 ta yo'l ko'rsatkich va muhofaza belgilari o'rnatilishi, hududdagi joylashtirish vositalari sonini 1 baravarga oshirish choralarini ko'rish, bunda mehmonxonalar sonini 60 taga, oilaviy mehmon uylarini 150 taga, xostellar sonini 20 taga yetkazish orqali ulardagi o'rinlar sonini 5 000 taga yetkazish rejalashtirilgan.

Qolaversa, Boysun tumanida ellin madaniyati yodgorligiga oid Uzundara qal'asida ochiq osmon ostidagi muzey tashkil qilinadi.

“Hilton” qad ko'tarmoqda

Turizm yo'nalishida amalga oshirilayotgan ishlar ko'lami sayyohlarni jalb qilishga har tomonlama puxta tayyorgarlik ko'rilayotganidan dalolatdir. Surxon diyoriga tashrif buyurgan sayo­hatchi ham dam olishi, ham tillolarga teng tariximiz bilan tanishishi, ham ochiq osmon ostidagi muzey, ekoturizm maskanlari qo'ynida bunyod etilayotgan sanatoriylarda, sog'lomlashtirish mas­kanlarida salomatligini tiklab, katta taassurot bilan ortiga qaytib ketishi va kelasi safar o'zi bilan bir olam sayohatchilarni hududga yetak­lashi kerak.

Ayni shu maqsadda Omonxona hududida maxsus o'rganish ishlarini o'tkazib, hududda 5 ta sog'lomlashtirishga ixtisoslashgan mehmonxona qurish ishlari amalga oshiriladi. Viloyatning salohiyatli hududlarida 10 ta turizm qishlog'i tashkil etish yuzasidan chora-tadbirlar ishlab chiqilgan. Termiz shahar va barcha tumanlar markazlarida 15 ta tunu kun ishlovchi turizm ko'chalari tashkil etish rejalashtirilgan. Natijada 1000 taga yaqin xizmat ko'rsatish ob'yektlari tashkil etilishi va 2 ming ta doimiy yangi ish o'rni yaratilishi ko'zda tutilmoqda.

Shu yilning dekabr oyida Termiz xalqaro gas­tronomik festivali o'tkazilishi ham rejalashtirilgan bo'lib, ushbu tadbirga Tojikiston va Qirg'iziston respublikalari vakillari ishtirok etishi va ko'plab sayyohlar tashrifi ko'zda tutilmoqda.

“Inter Injiniring” kompaniyasi (Singapur) tomonidan Termiz shahri, “Tuproqqo'rg'on” MFY hududida 150 mln dollarlik zamonaviy “Hilton” mehmonxonasi va “Kongress holl” qurilishi boshlangan bo'lib, ushbu loyiha amalga oshishi natijasida 300 ta yangi ish o'rni tashkil etiladi.

Bir so'z bilan aytganda, Surxon diyorida turizmni rivojlantirish uchun hali juda ko'p ishlar amalga oshirilmog'i kerak, ammo hukumat qarorlari, amalga oshirilayotgan yirik islohotlar, xalqaro miqyosda hamkorlikning yangi ufqlari kengayib borayotganining o'ziyoq mamlakatning eng janubiy mintaqasida turizmning kelajagiga optimistik qarashga imkon beradi. Surxondaryomiz tabiat in'om etgan joylashuvi va geografik iqlimi bilan ham chinakamiga turizm o'chog'i bo'lib yer yuzida sayqal topganiga hech shubha yo'qki, qaysi hududga bormang, o'sha joyda yodgorliklar, dam olish maskanlariga, turizm ob'yektlariga ro'baro' kelaveramiz. Madaniy va tarixiy joylarning qachon ahamiyati oshadi? Qachonki, avvalo, o'zimiz yaxshi ang­lasak, borib o'z ko'zimiz bilan ko'rib, miriqib dam olib, har birimiz sayohatchiga aylansak, ana shundagina biz boshqalarni ham vohamizga taklif qila olamiz.

Jo'rabek TO'RAYEV,

Surxondaryo viloyati

hokimining o'rinbosari.