Ko'klamlar tug'ilar kuzda…

Ahmadali ShERNAZAROV

Muallif haqida:

Ahmadali Shernazarov — taniqli jurnalist va publitsist. Sirdaryo viloyatining Shirin shahrida tug'ilgan. Toshkent davlat universiteti (hozirgi O'zMU)ning jurnalistika fakultetida tahsil olgan. Ko'p yillar “Sirdaryo haqiqati” gazetasida ishlagan. 2013 yildan buyon “Xalq so'zi” gazetasining Sirdaryo viloyati bo'yicha muxbiri bo'lib faoliyat yuritib kelmoqda. O'zbekiston Jurnalistlar uyushmasi a'zosi. “Mehnat shuhrati” ordeni sohibi. “Kuz bahori” deb nomlangan publitsistik maqolalar to'plami nashr etilish arafasida.

 

O'TKINChI

 

Sellar daryo bo'lmaydi,

Toshqinligi o'tkinchi.

Ellar bo'ron bo'lmaydi,

Shoshqinligi o'tkinchi.

 

Ko'kni bulut bossa ham,

Mayin yomg'ir yog'sa ham,

Jazirama yozlarning

Salqinligi o'tkinchi.

 

Mingta chaqmoq bir bo'lib,

Yolg'iz Oydek bo'lolmas,

Charaqlagan chaqinning

Yorqinligi o'tkinchi.

 

“Aylanayin” desa-da,

“O'rgilayin” desa-da,

Jigar bo'lmas, yotlarning

Yaqinligi o'tkinchi.

 

Kunda o'qib turmasa,

Xalq ichida yurmasa,

Bunday shoir, oqinning

Jo'shqinligi o'tkinchi.

 

…Sellar daryo bo'lmaydi,

Toshqinligi o'tkinchi.

Ellar bo'ron bo'lmaydi,

Shoshqinligi o'tkinchi.

 

JURNALISTIKA

 

Tug'ilibon so'zga egizak,

Odam Ato zamonlarida,

Jarchidan to internetgacha,

Olamning to'rt tomonlarida

Kezib yurar jurnalistika!

 

Toshbitiklar, gazetalar ham,

Shaksiz erur muxbir-muarrix.

O'tayotgan har daqiqadan,

Kundan-tundan — haqqoniy tarix,

Yozib yurar jurnalistika!

 

Har jabhadan erur xabardor,

Hatto jumboq — falakiyotdan.

Kelajakdan mujdalar yo'llab,

Shamoldan-da shoshqin hayotdan

O'zib yurar jurnalistika!

 

Bu sohada tin olish yo'qdir,

Harakatda har kun, har onda.

Kerak bo'lsa, hatto kemasiz,

Xabarmakon degan ummonda

Suzib yurar jurnalistika!

 

…Shamoldan-da shoshqin hayotdan

O'zib yurar jurnalistika!

Olamning to'rt tomonlarida

Kezib yurar jurnalistika!

 

TO'YING MUBORAK,

EY, SIRDARYo BOBO!

 

Kezar ho'v qishlog'u kentlaring aro,

Garmsel o'rnida fayzli bir sabo.

Oltmishta bahorda ming bog' yaratgan,

To'ying muborak, ey, Sirdaryo bobo!

 

Senda yashaydilar turfa yurtdoshim —

Senda o'n to'rt manzil jamdir, ajabo!

Millatu elatdan gulbog' yaratgan,

To'ying muborak, ey, Sirdaryo bobo!

 

Kuzakda polizing chorlar olamni:

“Qovun sayli” bugun, keling, marhabo!”

“Torpedo” qovundan dovruq taratgan,

To'ying muborak, ey, Sirdaryo bobo!

 

Zamining saxiy va bog'laring bolli,

Hatto sho'r yering ham tutar murabbo.

Yassi sahroda ham rizqtog' yaratgan,

To'ying muborak, ey, Sirdaryo bobo!

 

Bag'ringdagi moziy — yog'och Sardoba,

Ko'hna Xovosing bor, qadimdan sado.

Tarixning ustiga tarix yaratgan,

To'ying muborak, ey, Sirdaryo bobo!

 

Oltmish yoshingda ham chehrang navqiron,

Har go'shang oboddir, ko'rkam-dilrabo.

Go'zallikda o'zin bedog' yaratgan,

To'ying muborak, ey, Sirdaryo bobo!

 

KAPALAK

 

Guldan gulga uchib-qo'nib, jon halak,

Ko'rgani shu: bitta gulzor — katalak.

Umri buncha qisqa uning, ey, falak,

Oyni ko'rmay o'ladimi kapalak?!

 

Qanotlari misli atlas yo palak,

Bir go'zalki, sohibjamol u malak.

Sevolmayin yo sevmayin, ey, falak,

To'yin ko'rmay o'ladimi kapalak?

 

Chechaklarga bo'lib bir bor jamalak,

Yaratibon bog'lar ichra kamalak.

Vaqtdan yut, deb odamzodni, ey, falak,

Ogoh etib o'ladimi kapalak?!

 

KUZ KO'KLAMI

 

Nechun seni sevmay misli bahordek,

Husnu malohating ko'klamdan kammi?!

Chiroyli chehrangdan bahramand bo'lib,

Seni madh etmasam, men ham odammi?!

 

Axir, sen — barchadan ulug' ijodkor,

Borliqqa chizasan rang-chaman — tasvir.

Tuslaring topolmay bo'yoqlaridan,

Qarshingda lol turar qancha musavvir?!

Ko'rimsiz yulg'undan gulshan yaratib,

Rayhonni so'ldirsang, bo'lmayman xafa.

Negaki bilaman, bunda yashirin,

Kuz bahori degan ajib falsafa!

 

Sunbulang suvlari bunchalar zilol,

Quvlashmachoq o'ynar uchqur mezonlar.

Yalang'och qolsa-da, oltin poyandoz

To'shar yo'limizga daraxt-mezbonlar.

 

Kungay qirlardagi maysalar zaif,

Bahor qaytishidan bermoqda mujda.

Demak, sen ko'klikka emas intiho,

Aksincha, ko'klamlar tug'ilar kuzda.

 

O, kuzim! Garchi sen qizg'aldoqlar-u

Qilmasang-da o'rik gullarin tortiq.

Lek o'sha yashirin bahoring uchun,

Rosti, seni sevgum ko'klamdan ortiq.

 

KO'NGILNI KO'NGIL ZABT ETAR HAR VAQT

Jilovlanar asov daryolar,

To'ssa yo'lin toshli to'g'onlar.

Zabt etilar jahd-u ahd bilan,

Har qandayin baland qo'rg'onlar.

Qodir Egam qo'llasa agar

Va intilsa oqil odamzod,

Dardlar borki, topilur shifo,

Echiladi har bir mushkulot.

Oyga yetgan uchqur qanotlar

Tez orada eltar Marsga ham.

Sahroda ham olma o'stirib,

Nasib etsa, ko'rgaymiz baham.

Qachonlardir, bilmam, qay asr,

Osmonda ham shahar qurilar.

Tortish kuchin yengganda aql,

Dengizda ham yayov yurilar.

 

Davom etar intilish shavqi,

Zabt etilmay qolmas bor cho'qqi.

Bir-biridan g'olib zamonga

Etkazajak bu zamin o'qi.

 

Daxlsizdir birgina makon,

Ne dovondan oshsa-da inson!

Egallanmas zar-u kuch bilan,

Unga kirmoq emasdir oson.

 

Azal-abad muzaffar oshyon,

Ko'ngildir bu, ko'rinmas qo'rg'on.

Zabt etadi ko'ngilni ko'ngil,

Bundan o'zga g'oliblik yolg'on.

 

IZLARMAN

Qizim xotirasiga

 

Misli tashna sahrodan giryon,

Mehrbuloq ko'zin izlarman.

 

Iz qoldirmas ko'chki qumlardan,

Yo'qotganim izin izlarman.

 

Ming chehradan izlab yuzini,

Ming lutfdan so'zin izlarman.

 

Topolmayman, topganim sarob,

Men MEHRning o'zin izlarman.

 

Asl mehr bulog'im — Hulkar,

Ahmad Ali qizin izlarman.

 

Topilmas lek, borki ko'z nurim,

To'xtamayin — betin izlarman.

 

Qiyomatda Qodir ALLOHdan

Diydoriga izn izlarman.

 

…Misli tashna sahroda giryon,

Mehrbuloq ko'zin izlarman.

 

GULLAB QO'YSANG…

 

Erta gullab qo'ydi o'rik,

Sovuq urib, qorda qoldi.

Shu orada kimga kimdir

Sirin aytib, dog'da qoldi.

 

Ishon, yana kelar ko'klam,

O'rik chunon gullab berar,

Ammo siring gullab qo'ysang,

Mevasini dushman terar.

 

TABIAT TALQINIDAGI TAQRIZ

I

Dovuchchadek g'o'ra she'rlar,

Mol ham yemas, sho'ra-she'rlar,

Qizil gapli, tarvuz-she'rlar,

Loyqa suvli hovuz-she'rlar,

Ichi bo'm-bo'sh qovoq-she'rlar,

Tashi chala suvoq-she'rlar,

Ajriqdek tarqoq she'rlar,

Quyonyurak, qo'rqoq she'rlar,

Bog'ni bosgan o'tloq-she'rlar,

Rayhon emas, yantoq-she'rlar,

To'tiqushdek maddoh she'rlar,

Tug'iliboq adoq-she'rlar,

Qora qozon yuqi-she'rlar,

Muallifi… “Jo'qi” she'rlar.

 

II

Biyron tilli, bulbul-she'rlar,

Satrlari sunbul she'rlar,

Sinoati anor-she'rlar,

Quyosh kabi yonar she'rlar,

Cho'ksa ko'ngil, qirg'oq-she'rlar,

Mag'zi butun, yong'oq-she'rlar,

Ta'mi totli anjir-she'rlar,

Pechakguldek zanjir-she'rlar,

Qoya misol mag'rur she'rlar,

Sheryurakli, masrur she'rlar,

Burgutqanot uchqur she'rlar,

Fikran ko'kday chuqur she'rlar,

Haqiqatga doir she'rlar,

Egasi chin shoir — she'rlar!

 

XINO QO'YMA, ATIR SEPMA

Sarvi gulro', biram suluv,

Ruxsoring bor, o'zingniki.

Xino qo'yma, atir sepma,

Iforing bor, o'zingniki.

 

Quyosh yashar ko'zlaringda,

Havas qilma ohularga.

Kiprik aro o'tli nigoh,

Nigoring bor, o'zingniki.

 

Oy yuzingga hilol hayron,

Hasad qilar lolazorlar.

Gul chehrangda hamishalik

Bahoring bor, o'zingniki.

 

Qaldirg'ochlar qayrilmaning

Andozasin sendan olgan.

Qoshlaringni manzil qilgan

Dildorlik bor, o'zingniki.

 

G'uncha labing bol yiqqanmi

Subhidamda shabnamlardan?

Sahar chog'i gulshanlarda

Diydoring bor, o'zingniki.

 

O'tsa hamki qancha bahor,

Qancha kuzlar, yozu qishlar,

Seni sevar Ahmad Ali,

Abgoring bor, o'zingniki.

 

Sarvi gulro', biram suluv

Ruxsoring bor, o'zingniki.

Surma surtma, atir sepma,

Iforing bor, o'zingniki.