Ezgulik kuychisi

Atoqli qoraqalpoq shoiri va mutafakkiri Ajiniyoz tavalludiga  200 yil to'ldi

O'zbek va qoraqalpoq xalqlari azaldan do'stlik va birodarlik rishtalari bilan bog'langan. Qoraqalpoq adabiyoti nafaqat boy adabiy merosga, balki olis tarixga ham egadir. Ajiniyoz qoraqalpoq elining buyuk farzandi va tengsiz so'z zargari edi. O'zbekiston Respublikasi Prezidentining 2024 yil 16 iyuldagi “Atoqli qoraqalpoq shoiri va mutafakkiri Ajiniyoz Qo'siboy o'g'li tavalludining 200 yilligini keng nishonlash to'g'risida”gi qarori ijrosini ta'minlash maqsadida joriy yilning 19 noyabr kuni poytaxtimizdagi Alisher Navoiy nomidagi davlat akademik katta teatrida tantanali adabiy kecha bo'lib o'tdi.

Tadbirda qoraqalpoq adabiyoti vakillari, madaniyat va san'at namoyandalari, yozuvchi va shoirlar, adabiyot ixlosmandlari, talaba-yoshlar va ommaviy axborot vositalari xodimlari ishtirok etdi.

Adabiy kechaning kirish qismida O'zbekiston Yozuvchilar uyushmasi raisining birinchi o'rinbosari Minhojiddin Hojimatov, O'zbekiston xalq yozuvchisi, Qoraqalpog'iston Yozuvchilar uyushmasi raisi Kenesboy Karimov ikki xalqning shoiri Ajiniyoz Qo'siboy o'g'li tavalludiga bag'ishlangan tadbir do'stlik va birodarlik rishtalarini yanada mustahkamlashini e'tirof etib, ulkan adabiy meros, adib ijodidagi o'ziga xoslik kabi mavzularga alohida to'xtaldilar. Xususan, M.Hojimatov qardosh shoir adabiy merosi va uning o'zbek adabiy muhitidagi o'rni haqida alohida so'z yuritdi.

Tadbirda Qoraqalpog'iston Respublikasi Jo'qorg'i Kengesi Qo'mita raisi Murat Atamuratov ham o'z so'zi bilan chiqish qilib, qoraqalpoq adabiyotining o'rganilishi yuzasidan amalga oshirilayotgan keng ko'lamli ishlar to'g'risida to'xtalib o'tdi.

Ajiniyoz Qo'siboy o'g'li — umrini xalq va millat bilan bog'lagan. Xivadagi Sherg'ozixon va Qutlimurod Inoq madrasalarida tahsil olgan. Ma'rifatparvar shoir ijod qilish barobarida Navoiy, Fuzuliy, Bedil asarlaridan nusxalar ko'chirib, xattotlik ham qilgan. Shu bilan birga, qoraqalpoq ovullarida muallimlik qilgan. Ulkan hayotiy tajriba natijasida undan o'lmas asarlar meros bo'lib qoldi.

Ajiniyoz asarlarida vatanparvarlik, insonparvarlik, do'stlik va hamjihatlik g'oyalari yuksak darajada tarannum qilingan. Asarlari o'zbek va boshqa ko'plab tillarga tarjima qilingan. Turkiy adabiyot durdonalari 100 jildlik to'plami va qoraqalpoq adabiyoti durdonalari majmuasiga uning ham ijodidan namunalar kiritilgan.

Adabiy kechada Qoraqalpog'iston Respublikasidan tashrif buyurgan bir guruh mehmonlar ommaviy axborot vositalari vakillari bilan suhbatda tadbirning nihoyatda qiziqarli va foydali bo'lganligini ta'kidladilar.

Dastur davomida Ajiniyoz tomonidan yozilgan she'rlarga bastalangan go'zal kuy-qo'shiqlar qoraqalpoq va o'zbek san'atkorlari tomonidan ijro etildi.

Atoqli shoir ijodiga oid adabiy kechalar, uchrashuvlar butun mamlakatimiz bo'ylab davom etadi.

O'z muxbirimiz.