Mahorat maktabiga kirish
Bugungi globallashuv zamonida tezkor va aniq axborotlarni xalqimizga to'g'ri yetkazish, ma'lum voqelikka nisbatan tahliliy va tanqidiy yondashish, xalq manfaatlarini himoya qilish va davlat bilan jamiyat o'rtasida ko'prik bo'lishdek mas'uliyatli vazifani bajarayotgan jurnalistika sohasi vakillarining mas'uliyati juda katta.
O'z navbatida ana shunday mas'uliyat va zahmat bilan bitiladigan jurnalistik materiallar, aytaylik, turli nashrlarda e'lon qilingach, ular nashrlarning sarg'aygan sahifalarida qolib ketmasligi, doimiy o'qilishi, ayniqsa, bo'lajak ijodkorlar uchun mahorat manbasi sifatida xizmat qilishi juda muhim masala. Shu o'rinda aynan ana shu maqsadda O'zbekiston Jurnalistlar uyushmasi tomonidan “Oltin qalamli jurnalistlar” nomli kitobning nashr etilishi katta voqea bo'ldi.
Ushbu kitobdan jurnalistikaning turli janrlarida bitilgan eng sara materiallar o'rin olganligini alohida ta'kidlash joiz. Chunki bugungi kunda ocherk, esse, felyeton, suhbat va lavhalar yoxud “jurnalistik surishtiruv” ruknidagi dolzarb maqolalarni har kuni ham matbuot nashrlarida uchratmasligimiz mumkin.
Xullasi kalom, joriy yilning 11 fevral kuni O'zbekiston Milliy matbuot markazida ana shu kitobning taqdimoti bo'lib o'tdi.
Aytish joizki, ushbu kitob davlatimiz rahbarining 2022 yil 27 iyundagi “Ommaviy axborot vositalarini qo'llab-quvvatlash va jurnalistika sohasini rivojlantirish chora-tadbirlari to'g'risida”gi qarorida belgilangan vazifalar ijrosi doirasida ming nusxada chop etildi.
Mazkur kitobda nafaqat poytaxtda yashab ijod qilayotgan, balki uzoq yillardan buyon yurtimizning turli hududlarida jurnalistika sohasida faoliyat olib borayotgan 50 nafarga yaqin mahoratli jurnalistlarning eng sara publitsistik materiallari jamlandi.
Taqdimotda media soha vakillari, ommaviy axborot vositalari rahbar-xodimlari, fotojurnalistlar, jamoatchilik vakillari va talaba-yoshlar ishtirok etdi.
“Oltin qalamli jurnalistlar” kitobida taniqli adib Xurshid Do'stmuhammadning “Uch faraz”, ustoz jurnalistlar O'tkir Rahmatning “Birlashtiruvchi kuch”, Karim Bahriyevning “Men nega Shavkat Mirziyoyevga ovoz beraman?” deb nomlangan publitsistik maqolalari, bundan tashqari, Ahmadjon Meliboyevning “Birinchi saboq”, Farmon Toshevning “Shamsi Nazarov kim bo'lgan edi?”, Mamatqul Hazratqulovning “Bokudan Bokuga” deb atalgan ocherklari, Abdusaid Ko'chimov, Safar Ostonov, Qulman Ochil, Ahror Ahmedov, Eshqobil Shukur, Husan Ermatov qalamiga mansub esselar, Muhammadjon Obidov, Ismat Xushev, Halim Said singari elimiz yaxshi biladigan ijodkorlarning jurnalistik surishtiruv yo'nalishidagi maqolalari o'rin olgan. Ushbu salmoqli to'plamdan Odil Yoqubov, Erkin A'zam, Anvar Jo'raboyev, Anvar Abduvaliyev, Norqobil Jalil, Nurilloh Oston kabi adiblarning eng o'qishli suhbat, pamflet va lavhalari ham joy olgan.
Fotojurnalistika bo'yicha tajribali fotomuxbirlar – Abdug'ani Juma, Alimurod Madaminov, Husniddin Ato va boshqalarning turli rakurslardan olingan 70 ga yaqin suratlari ham joy olganligi e'tiborli.
Kitob taqdimotini O'zbekiston Jurnalistlar uyushmasi raisi vazifasini bajaruvchi Xolmurod Salimov olib bordi. Taqdimotda bir qancha ustoz jurnalistlar so'zga chiqdi.
Salim DONIYoROV — “Yangi O'zbekiston” va “Pravda Vostoka” gazetalari bosh muharriri:
— Ushbu kitob taqdimoti jurnalistikamiz faoliyatida alohida o'rin tutadigan voqea, desak, adashmaymiz. Uning chop etilishi va taqdim etilishini hech ikkilanmasdan mahorat maktabiga kirish deyish mumkin. Chunki undan o'rin olgan maqolalar, ocherk va esselar, umuman har bir material, ayniqsa, yoshlar uchun katta mahorat darsi bo'lishiga shubha yo'q. Kitobni kengroq targ'ib qilish va uni ko'proq odamlarning mutolaa qilishiga ko'maklashish maqsadida elektron shakli ham havola etilsa, yaxshi bo'lar edi.
Husan ERMATOV — “Ishonch” va “Ishonch-Doverie” gazetalari
bosh muharriri, senator:
— Ushbu kitob bugungi kunda bosma nashr jurnalistikasi uchun oyna vazifasini bajaradi. Hozirgi paytda ommaviy axborot vositalari sahifalarida, xususan, bosma nashrlarda chop etilayotgan maqolalarga nisbatan ko'pincha turli e'tirozlar bildirilmoqda. Aslida ham gazetalarimizda bir paytlardagidek o'tkir felyetonlar, ocherklar, “jurnalistik surishtiruv”lar kamayib ketgan. Ammo jurnalistikaning barcha janrlarida o'ziga xos maktablar yaratib ketgan ustozlarimiz bor. Ularning asarlaridan ham namunalar kitobning keyingi nashrlarida o'rin olishi kerak. Qolaversa, bu kitobni nafaqat jurnalistika sohasiga daxldor insonlar, balki turli kasb egalari, ziyolilar o'qishi kerak.
Xurshid DO'STMUHAMMAD — yozuvchi, O'zbekiston Respublikasida xizmat ko'rsatgan madaniyat xodimi:
— Qaerdaki jurnalistika borasida eng oddiy gap aytilsa ham, maqsad bitta bo'lishi kerak: bu — jurnalistikaning obro'sini, qadrini ko'tarish. Ushbu “Oltin qalamli jurnalistlar” kitobidan kutganimiz ham jurnalistikaning nufuzini, ahamiyatini yanada oshirishga qaratilgan ishlardan biri, desak bo'ladi. Kitob mundarijasini ko'rgan odam: “Ie, shuncha jurnalistlarimiz, qalami oltin fidoyilarimiz bor ekan-ku!” deyishi shubhasiz. Ana shu jihatdan mazkur kitobni hech ikkilanmay “dunyoda yagona to'plam!” deyish mumkin. Unga o'zimning ham maqolam kiritilgan. Ustozlarda bir gap bor: “Gazetada maqolang chiqdimi, ikki marta o'qi” degan. Hozirgilar o'qiydimi, yo'qmi, men o'qib juda xursand bo'ldim. Maqolalar kimgadir dalda, turtki bo'larmikin, fikrlashga, o'ylashga undarmikin deb o'ylab qoldim. Men Uyushma faoliyatiga omad tilayman. Oltin qalamli jurnalistlar ko'payaversin! Bu kitob javonlarda qolib ketmasin.
Tadbir davomida Jurnalistlar uyushmasi a'zoligiga qabul qilingan bir qator ijodkorlarga jurnalistlar uyushmasining a'zolik guvohnomalari topshirildi. Tadbir so'ngida esa ishtirokchilarga “Oltin qalamli jurnalistlar” kitobi ulashildi.
Darvoqe, O'zbekiston Jurnalistlar uyushmasi tomonidan ushbu xayrli loyiha asosida har yili “Oltin qalamli jurnalistlar” seriyasida ana shunday kitoblar nashr etilishi ma'lum qilindi.
Gulnora ShERMATOVA