Nega 6-xonani avvaldan band qilishmoqda?
Gaz ta'minotida ta'mirlash ishlari bo'lganligi sababli uyimizda uch kun gaz bo'lmadi. Shu bois biror yemakxonaga borib ovqatlanishni lozim topdik. Qizim Guliston shahrining 4-mavzesida joylashgan “Shukran” (oshxona nomini “Shukrona” deb qo'yish kerakmi degan taklifni ham berdik) nomli milliy va Yevropa taomlari oshxonasiga borishni taklif qildi.
Oshxonaga kirib borishimiz bilan xodimlar: “6-xonaga kiringlar”, deya taklif berishdi.
Kirib, hayratdan dong qotdim. Nega?
Ajabo! Xonaning butun devorlariga gazeta yopishtirilgan. Qarasangiz, “Ishonch”, “Yangi Sirdaryo” va yana bir qancha gazetalarning rang-barang sahifalari devorda “meni o'qi” deb turibdi. Rostdan ham egilib-bukilib o'qishga tushib ketdim. Orada ko'pgina ustoz jurnalistlarning maqolalari zo'r chiqqan ekan, deb ularning ism-shariflarini ko'rib quvondim.
Ofitsiant yigit: “Opa, buyurtma berasizlarmi?” deya bir-ikki kelib ketdi. Shu qadar berilib ketganimdan: “Hozir, hozir choy-non keltira turing”, derdim-u yana o'qirdim. Qarasam, oila a'zolarim mening maroq bilan xona aylanayotganimga jim qarab o'tirishibdi. Bir amallab gazeta sahifalaridan ko'zimni uzib, joyimga o'tirdim. Keyin taom buyurtma berdik. Lekin juda shoshardim: bu xonani nega shunday bezatdi? Bu g'oya egasi kim ekanligiga juda qiziqayotgandim. Shu sababli ham ovqatlanib bo'lib, g'oya muallifini tezda topdim.
— Otam uzoq yillar ta'lim sohasida faoliyat yuritgan o'qituvchi, — dedi “Shukran” kafesi rahbari Davron Shukurov. — Bolaligimizdan otamning gazetani hurmatlashini ko'rib ulg'aydik. Ular nafaqat o'qir, balki maqolalar ham yozib turardilar. Hatto Zomindagi qatag'on qurbonlari haqida yozgan maqolalari tufayli ularni oqlashga erishganlar. Ana shunda yosh bo'lsam-da, so'z qudratini anglaganman. Otamning gazeta o'qishi hamma farzandlariga dasturilamal bo'ldi, desam, hech bir mubolag'a bo'lmasa kerak. Chunki biz ham otam kabi gazeta o'qib katta bo'ldik. Shuning uchun shu 6-xona devorlarini gazeta bilan to'ldirdim. “Kelgan xo'randalar albatta o'qib ko'radi”, deb o'yladim. Hozirgi kunda bu xonaning mijozlari bisyor. Shu sababdan bir necha kun avval xonani buyurtma qilib qo'yish lozim. O'ylashimcha, bu ham, aslida, bir targ'ibot. Axir gazeta ma'naviyat va ma'rifat o'chog'i. Uni targ'ib qilishdan, doimo o'qishdan zavqlanaman. Otam o'qidi, biz ham o'qib ulg'aydik. Endi farzandlarimiz ham gazeta o'qib ulg'ayishi kerak. Shunda kelajak avlodimizda fikrli, ijodiy qobiliyati shakllangan insonlarni yetishtirib, ulg'aytira olamiz.
Ha, oramizda ma'naviyat hamda ma'rifat ulashuvchi ziyolilar qatorida Davron aka kabi tadbirkorlarning borligi quvontiradi. Ularning xalqimiz madaniyati yuksalishida qilayotgan beminnat xizmatlari tahsinga loyiq. Jamiyatda gazeta targ'ibotiga yangicha yondashuvlar asosida hissa qo'shayotgan kishilar ko'payaversin.
Xurshida NIShONOVA,
“Yangi Sirdaryo” gazetasi
bo'lim muharriri.