Inson qadri hamma narsadan ulug'
– deydi Prezident xalq qabulxonasi Namangan shahar bo'limi rahbari Hasanboy QOSIMOV
Xalq qabulxonalarini adolat dargohi deb bilib murojaat qiluvchilar soni bugun ham kam emas. Har bir fuqaro murojaati zamirida kimningdir, kimlarningdir taqdiri, ular duchor bo'layotgan haqiqatsizlik borligini o'ylasak, bu tashvishli holatdir. Ammo masalaning ijobiy tomoni ham bor. Fuqarolar adolat qidirib, moddiy va ma'naviy muhtojliklarini bartaraf etish istagida xalq qabulxonalaridan najot izlab kelishi va bu dargohda tajribali va bilimli mutaxassislar tomonidan arzlariga qoniqarli yechim topayotgani e'tiborga molik ish.
Prezident xalq qabulxonasining Namangan shahar bo'limi Namangan shahar Davlat xizmatlari binosining ikkinchi qavatida joylashgan. Bu idoraga rasmiyatchilik begona. Hatto rahbarning kotibi ham yo'q. Hasanboy Qosimov huzuriga bemalol kiraverasiz.
Xalq qabulxonasi Namangan shahri bo'limi rahbari Hasanboy Qosimov huzuriga kelgan fuqaroni obdan tinglaydi. Vakolati doirasidagi masalalarni tezkorlik bilan o'zi hal qiladi. Qolganlarini esa nazoratiga olib, yuqori idoralarga havola etadi. Yana telefon orqali ularning e'tiborini shu masalani hal etishga qaratadi. Zero, arz qiluvchi fuqaro sarson bo'lmasin, masalasiga yechim topsin.
— Uzoq yillik tajribamdan shuni angladimki, arizachini sabr-toqat bilan xolis turib tinglashning ahamiyati katta, — dedi Hasanboy Qosimov. — Adolatsizlikka uchragan fuqaro idorama-idora haqiqat izlab har eshikka boshini uraverganidan, asablari tarang bir holatga kelib qoladi. Shunday paytda biz murojaatchi fuqarolarni obdan tinglab, masalaning ildizini, muammoning sabablarini aniqlab olishimiz muhim. Namangan shahrida 384 mingdan ortiq aholi istiqomat qiladi. 2025 yilning 3 oyida xalq qabulxonamizga 2 ming 145 ta murojaat kelib tushdi. Bu raqam o'tgan yilning shu davridagi miqdordan 35 taga ko'p. Shunga qaramay, murojaatlarning 835 tasi ijobiy hal etilgani ahamiyatlidir.
— O'tgan uch oyda Namangan shahridan poytaxtga O'zbekiston Respublikasi Prezidenti qabulxonasiga murojaat bilan borganlar soni ham keskin kamayibdi, bunga qanday omillar sabab bo'ldi, — deb so'radim suhbatdoshimdan.
Mudirning aytishicha, mamlakatimizda mahalla institutining jamiyatdagi roli ortib borayotganligi, “xonadonbay” ish tashkil etilganligi, “Kambag'allikdan farovonlik sari” dasturi amalga oshirilayotgani muammolarni aniqlash va bartaraf etish barobarida, ayniqsa, moddiy muhtoj oilalarning yordam so'rab qiladigan murojaatlarini ijobiy hal etishga imkon bermoqda.
Murojaatlar yuzasidan o'n beshta mahalla fuqarolar yig'inlarida o'rganish olib borildi. O'rganish jarayonida 23 ta muammodan 14 tasi joyida ijobiy hal etildi.
Masalan, yil boshida Namangan shahar Zafar ko'chasida yashovchi Umar Sobirov qaramog'ida ikki nafar farzandi borligi, ro'zg'or tebratish uchun ishga joylashish kerakligi uchun yordam so'rab qabulxonaga keldi. Saxovatli tadbirkorlar bilan o'zaro hamkorligimiz yaxshi yo'lga qo'yilgani ham qo'l kelmoqda. “Sardoba” mahallasidagi tadbirkorlardan biri uni ishga oldi.
Shu yilning 24 fevral kuni hamshahrimiz Otabek Boyxonov sug'urta kompaniyasidan 14 million so'm mablag'ini qaytarib ololmayotganidan ranjib murojaat qilgan. Xalq qabulxonasi aralashuvi bilan o'sha kunning o'zida mablag' to'liq qaytarib berildi.
Shaharning Ko'zagarlik ko'chasida yashovchi Salomat Boyxonova esa bir yildan buyon guruh bo'yicha nogironlikka chiqa olmayotgani sabab qilgan shikoyati ham qanoatlantirildi.
Ikkinchi guruh nogironi Zokir Oxunov va turmush o'rtog'i jarrohlik amaliyotiga muhtoj bo'lsa-da, mablag'i yo'qligidan zoriqib murojaat qilgan. Ularga respublika Onkologiya markaziga order olib berishga yordam ko'rsatildi.
Yaqinda Namangan shahrida quvonchli voqealardan yana biri sodir bo'ldi. Yolg'iz ona Dilshoda Odilova qaramog'idagi ikki farzandining biri ikkinchi guruh nogironi ekanligi, uning uy-joyi yo'qligidan nolib murojaat qildi. U saxovatli kishilar ko'magida «Elobod Siti» mavzesidan uy-joy bilan ta'minlandi.
Ayrim tashkilotlarda fuqarolar murojaatlariga qonun talablariga ko'ra belgilangan tartibda ish olib borilmayotgani aniqlanmoqda. Xususan, Namangan shahar maktabgacha va maktab ta'limi bo'limi boshlig'i Sh.Turg'unovaga Xalq qabulxonasi tomonidan qonun buzilishi, uning kelib chiqish sabablarini va bunga imkoniyat yaratib berayotgan shart-sharoitlarni bartaraf etish yuzasidan taqdimnoma kiritilgan edi. Bo'lim boshlig'i Sh. Turg'unova taqdimnomani jamoada atroflicha muhokama qilmay, xo'jako'rsinga ma'lumot uchun rasmiy javob yozadi. Xalq qabulxonasi xodimlarining qo'shimcha ko'rsatmasi bilan taqdimnoma qonunda ko'rsatilgan tartibda qat'iy muhokama qilindi. Aybdorlar intizomiy jazoga tortildi.
Albatta, bunday misollarni sanayversak, misollar, raqamlar sahifalarga sig'masligi mumkin. Muhimi, Xalq qabulxonalari odamlar o'zlarining murojaatlariga yechim topayotgan dargohga aylanganidir.
Dilmurod QIRG'IZBOYEV,
O'zbekiston Jurnalistlar
uyushmasi a'zosi.