Yurakdan so'zlagan inson
Saodat O'rmonova. Bu nom o'zbek jurnalistikasiga oshno bo'lgan har bir inson uchun tanish, aziz va samimiy bir ovozdir. Bu ovoz yillar davomida ko'plab yuraklarga yo'l topdi, minglab xonadonlarga mehr va haqiqat so'zini olib kirdi. Bu telejurnalist o'z faoliyati davomida faqat axborot tarqatgan emas, balki ijodi bilan insonlar qalbiga muhabbat, sadoqat, fidokorlik, insonparvarlik kabi tuyg'ularni ham singdirgan.
Yoshlikdan ijodga, jurnalistikaga muhabbati kuchli bo'lgan Saodat opa o'zining ilk qadamlaridanoq kasbiga sidqidildan yondashdi. Uning efir orqali xalqqa taqdim etgan har bir dasturi, har bir chiqishi nafaqat axborot, balki ruhiy ozuqa, qalbga yaqin mulohaza bo'lib eshitilar edi. Har bir savoli, har bir mulohazasi ortida chuqur bilim, teran mushohada va inson qalbiga yetadigan his-tuyg'ular mujassam edi.
Kuni kecha poytaxtimizdagi Milliy matbuot markazida O'zbekiston Jurnalistlar uyushmasi tomonidan tashkil etilgan “O'zbekiston teleradiokanalidanman” nomli kitob taqdimoti aynan ana shunday yurakdan chiqqan, qalbga yetadigan so'zlarning, voqelikning ifodasi bo'ldi.
Ushbu kitob nafaqat shaxsiy xotiralar, balki bir davrning jonli guvohi, bir avlodning jurnalistik tafakkurini shakllantirgan maktab haqidagi hujjatdir. Unda nafaqat faktlar, balki hayot saboqlari, iztirob va xursandchiliklar, qiyinchiliklar va zafarlar mujassam.
Ha, Saodat O'rmonova nafaqat ustoz, balki uning ijodi o'ziga xos maktabdir. U kishining mehnati, qalami ostidagi satrlar, efirdagi chiqishlari qanchadan-qancha yosh jurnalistlar uchun ilhom manbai bo'lib xizmat qilgan. “Qishloq haqida o'ylar”, “Telejurnalist”, “Mo''jizalar makoni” kabi kitoblari orqali u insonlarga faqat faktlarni emas, balki hayot haqiqatini, inson yuragidagi sadolarni yetkazishga harakat qildi.
Kitob taqdimotida Xurshid Davron, Nasiba Ibragimova kabi taniqli ijodkorlar, ustozlar so'z olib, Saodat opaning hayot va ijod yo'li, kasbga bo'lgan sadoqati haqida samimiy so'zlar aytishdi. Bu so'zlar shunchaki madh yoki tabrik emas, balki chinakam ijodkorning haqiqiy qadrini anglashga urinish, unga bo'lgan yuksak hurmat ifodasi edi.
Tadbir yakunida O'zbekiston Jurnalistlar uyushmasi raisi v.b. X.Salimov Saodat O'rmonovaga uyushmaning esdalik sovg'alarini topshirdi. Bu — minnatdorlik ramzi, ibrat va ehtirom timsoli edi. Shundan so'ng muallif kitoblarini talabalarga hadya qildi. Bu — bilimga, kelajakka qilingan saodatli hissadir.
Chindan ham Saodat O'rmonova — oddiy va kamtar, biroq qalbi daryo inson. Uning ovozi orqali xalq o'zini eshitgan, ko'plab haqiqatlar xalqqa yetkazilgan. U kishining ijodi bugungi kundagi yosh jurnalistlar uchun qo'llanma, ibrat maktabi sifatida xizmat qilmoqda.
Shu kunlarda jurnalistikaning o'ziga xos murakkab va tezkor dunyosida yurakdan so'zlash, inson yuragiga yetadigan so'z topish oson emas. S.O'rmonova esa ana shunday so'zlarning ustasi. U kishi haqida yozilgan har bir satr, aytilgan har bir so'z — bu bir e'tirof, bir minnatdorlik.
Muxtasar aytganda, “O'zbekiston teleradiokanalidanman” kitobi — bu faqat xotira emas. Bu — ruhiy meros, bu — jurnalistika tarixining tirik guvohi, bu — kelajakka yo'llangan da'vatdir. Saodat opa, sizning so'zlaringiz, sizning mehnatingiz yana ko'p yuraklarga yetsin, yoshlar uchun ilhom bulog'i bo'lib xizmat qilaversin!
Nigina Iskandarova,
O'zJOKU 1-kurs talabasi.