Osoyishtalik ortida kim turibdi?
Namangan viloyatining Mingbuloq tumanidagi “Qirqchek” mahalla fuqarolar yig'inida, ikki yildirki, umuman jinoyatchilik sodir etilmadi. Shu bois u viloyatdagi jinoyatchilikdan eng xoli hudud, deya tan olindi.
Mahalla profilaktika inspektori, katta leytenant Miraziz Rahimov bunga qanday erishmoqda?
Mahallada 3200 nafardan oshiq aholi istiqomat qilmoqda. To'g'ri, mahallada huquqbuzarlik holatlari qayd etildi. Ularning aksariyati jamoat tartibini buzish, spirtli ichimliklar iste'mol qilish bilan bog'liq. Huquqbuzarlarning barchasi qat'iy nazoratga olingan bo'lib, ular bilan yil davomida tarbiyaviy-nazorat ishlari olib borildi. Natijada ularning jinoyat yo'liga kirib qolmasliklariga erishilmoqda.
Miraziz Rahimov 2021 yildan buyon ushbu mahallada xizmat olib boradi. U yangi ish boshlagan paytlarida hududdagi bitta oshxonada 3 ta nazorat kamerasi bor edi, xolos. Eng avvalo, ishni shundan boshladi. Mahalla aholisi bilan kelishgan holda 7 ta bino va mahallaga kirish joylarini jami 38 ta nazorat kameralari bilan ta'minlashga erishdi. Bunda ichki ko'chalarni ham istalgan paytda kuzatish imkoni yaratildi. Qolaversa, har bir ko'chaning o'z ko'chaboshisi bor. Ular mahallada obro'-e'tiborga, hurmatga loyiq insonlar orasidan tanlab olingan. Biror kor-hol bo'lmasidan oldin tartibbuzarlarning harakatlarini sezish va ko'ngilsizlikning oldini olishda ushbu oqsoqollar munosib hissa qo'shishmoqda.
— “Qirqchek” mahalla fuqarolar yig'inining eng osoyishta hudud sifatida tan olinishi bejiz emas, — dedi Mingbuloq tuman IIB JXX HPB boshlig'i, kapitan Javlonbek Nishonov. — Buning zamirida har bir mas'ulning vijdonan xizmat qilishi, ayniqsa, profilaktika inspektorining qat'iyatli va fidokorona mehnati bor. Miraziz Rahimov tezkor vaziyatda ham, oddiy kundalik ish jarayonida ham aholining ishonchini birinchi o'ringa qo'yadi. Uning jamoat bilan doimiy muloqoti, hududni har tomonlama bilishi va har bir oilani e'tibor bilan kuzatib borishi jinoyatchilik oldidagi eng kuchli to'siqdir. Biz uning ish uslubini tumandagi boshqa inspektorlarga ham o'rnak sifatida ko'rsatamiz. Shunday inspektorlar soni qancha ko'p bo'lsa, tumanimizda xavfsizlik shunchalik barqaror bo'ladi.
— Biror kor-hol bo'lsa, aholi eng avvalo mening huzurimga oshiqadi, — dedi qahramonimiz. — Uning muammosi, balki, boshqa sohaga taalluqli bo'lsa ham imkon qadar amaliy yordam ko'rsatishga harakat qilaman. Qolaversa, to'y bormi, aza bormi, hamma tadbirlarda shunchaki ishtirok etmay, xalqimiz bilan yelkama-elka turaman. Dam olish kunlari ham mahallani aylanib chiqaman. Kimdir ko'chasida biror ish bilan band bo'lsa, darrov ko'maklashaman, kimningdir gapiga quloq solib, hamfikr bo'laman. Shu bois qo'shnilarimiz ham hurmat qilishadi, menga ishonishadi. Jinoyat sodir etishdan o'zlarini tiyishadi. Muammolari bo'lsa, u gazak olib ketmasidan birgalikda hal qilamiz.
Demak, profilaktika inspektori bilan xalq o'rtasidagi masofani yaqinlashtirish kerak. Ichki ishlar xodimi aynan o'zi xizmat olib borayotgan hudud aholisining bir qismi bo'lishi shart. Shundagina hududda jinoyatchilik sodir etilmaydi.
Jahongir TO'XTASINOV.
Namangan viloyati.