Yangi yil arafasida oziq-ovqat mahsulotlari narxi asossiz oshirilishining oldi olinadi
Raqobat qo'mitasi yirik savdo tarmoqlarini Yangi yil bayrami arafasida oziq-ovqat mahsulotlari narxlari barqarorligini ta'minlash muhimligi to'g'risida ogohlantirdi.
Ma'lum qilinishicha, qo'mita tomonidan Yangi yil bayrami arafasida keskin talab oshadigan ijtimoiy muhim oziq-ovqat mahsulotlari narxlari barqarorligini ta'minlash bo'yicha chakana savdo tarmoqlariga (“Korzinka”, “Makro”, “Havas”, “Baraka”, “Magnum”, “Assorti”, “B1” va “Magnit”) yetkazib beruvchi korxonalar tomonidan narxlarni o'zgartirishi, logistika xarajatlari va boshqa narxning oshishiga olib kelishi mumkin bo'lgan omillar to'g'risida qo'mitani tezkor xabardor qilib borish hamda yetkazib beruvchilarni narxlarni asossiz oshirishga yo'l qo'ymaslik yuzasidan ogohlantirib borishlari bo'yicha ko'rsatmalar yuborildi.
Ijtimoiy ahamiyatga ega oziq-ovqat mahsulotlari — aholi iste'molining asosiy ratsionini tashkil qiladigan, ular bo'yicha ichki bozorda talab va takliflarning mavsumiy hamda boshqa keskin o'zgarishlari kuzatiladigan oziq-ovqat mahsulotlaridir.
Bularga, birinchi navbatda, go'sht (mol go'shti, qo'y go'shti, parranda go'shti), o'simlik va hayvon yog'i, shakar, g'alla, un, kartoshka, sabzi, boshpiyoz va ro'yxati Respublika komissiyasi tomonidan tasdiqlanadigan boshqa turdagi oziq-ovqat mahsulotlari kiradi.
Bundan avval Raqobat qo'mitasi tadbirkorlarni yangi yil arafasida chegirmalar va aksiyalar o'tkazish qoidalariga rioya qilishlari zarurligi haqida ogohlantirgandi.
Manba: daryo.uz nashri