Tergovchining har lahzasi sarguzasht

yoxud haqiqatning ko'zlariga tik boqib…

Tergovchining ish jarayonidagi har bir qarori ortida o'zining hayot-mamoti bilan birga oilasining osoyishtaligi, tizimdagi ish maromi, qo'ying-chi, butun bir jamiyatning adolatga ishonchi va ishonchsizlik ehtimoli turadi. Shu bois bu soha faqat bilim va tajribani emas, chuqur mulohaza, xolislik, fidoyilik, yuksak vijdon va alohida qobiliyatni talab qiladi.

Namangan viloyati Mingbuloq tumani IIB huzuridagi Tergov bo'linmasi boshlig'i, kapitan Rahmatullo Abdurahmonov faoliyati bilan tanishuv jarayonida shularni angladim. Va yana tushunib yetdimki, aynan shu kasb o'z egasini tanlar ekan.

2013-2014 yillarda Rahmatullo harbiy xizmatda bo'lib, o'zini IIV Akademiyasida tahsil olishga tayyorlagandi. El-yurt osoyishtaligi uchun butun borlig'ini safarbar etish, hamisha hushyor va jismonan shay turish unga odat bo'ldi. Harbiylar va ichki ishlar xodimlarining murakkab faoliyat yo'li haqida o'qiganlarini hayot bilan solishtirdi.

2018 yilda leytenant unvoni bilan ish boshlagan yigitning nigohlarida bir maqsad bor edi: “Haqiqat, adolat yo'lida xizmat qilish”.

Uychidagi surishtiruv jarayonlari, Uchqo'rg'ondagi jinoyatlarni ochish bilan bog'liq murakkab vaziyatlar va viloyat boshqarmasining qat'iy talablari Rahmatulloning irodasini tobladi. Kasbga sadoqat, adolatga ishonch, haqiqatga ixlos bilan tik qarash va yurtga muhabbat uni har qadamda rivojlantirdi.

Mana, endilikda Mingbuloq tumani Ichki ishlar bo'limining tergov bo'linmasiga rahbarlik qilayotgan R.Abdurahmonov faqat topshiriq bajaruvchi emas, qonun bilan kafolatlangan huquq va burchlari doirasida o'z bilim va tajribasiga suyangan holda mustaqil ish yuritmoqda.

U har bir murojaatni diqqat-­e'tibor bilan eshitib, har qanday mazmundagi masalani shaxsiy dardiday qabul qiladi.

Tergovchi sifatida jinoyat ishini faqat o'rganmaydi, chuqur tahlil qiladi, sidqidildan tuyg'ulari bilan his qiladi, voqea ichida yashaydi, insonga xos murakkabliklarni nazardan qochirmagan holda yuragidan o'tkazadi.

Yodida, oddiy chorva o'g'riligi ko'rinishidagi ish. Gumonlanuvchi qo'lga olingan, aybiga to'liq iqror, hujjatlar ham badastir.

Ammo kapitan Rahmatullo Abdurahmonov ko'nglidagi shubha arimayapti. Avvaliga o'z-o'zini tahlil qildi. Har holda, bu ichki sezgi tarzidagi shunchaki badgumonlik emasmi?

Qayta tergovga kirishdi.

Tergovchi bu safar o'g'rilik harakatining har bir vaziyatini qadam-baqadam nazardan o'tkazish bilan rosmana yashab o'tdi. Telefon so'zlashuvlarini o'rganib, har bir aloqa mazmunini sinchkovlik bilan tekshirdi. Shu tariqa tahlil orqali bo'lib o'tgan jinoyatda “uchinchi shaxs” — X.Z.ning ishtiroki aniqlandi.

Agar ish faqat to'plangan hujjatlarga tayanib yakunlanganida, asosiy aybdor ozodlikda bo'lar va yana jinoyat urchishi mumkin edi. Rahmatulloning bilimi va professionallik tajribasi tufayli jinoyat yorqin ochildi.

— Tergovda ishga hech qachon bir taraflama yondashib bo'lmaydi, – dedi u. — Shaxslar, detallar nazardan qochirilmasligi kerak. Agar tergovchi xolislik tarozisini to'g'ri ushlamasa, tamom. Bu noxolislik yanada katta va fojiali jinoyatlarga sabab bo'lishi mumkin.

Bugun Rahmatullo Abdurahmonov boshchiligidagi chekka bir tumandagi IIB tergov bo'linmasi xodimlari uchun “fuqaro murojaati” kundalik vazifalarni bajarishgina emas, hech bir inson huquqining poymol bo'lmasligini ta'minlash. Xalq vakillarining adolatga bo'lgan ishonchini yanada mustahkamlash va shu tariqa hayotidan roziligini kafolatlash.

Agar tergovchining vijdoni toza bo'lsa, uning har bir harakati, har bir ishi haqiqat va adolatning eng to'g'ri yo'lini belgilaydi. Bu fikr Rahmatullo Abdurahmonovning amaliy faoliyatiga ham to'la mos keladi.

Qahramonimizning bizga ortiq vaqt ajratolmasligining sabablarini qisqa muloqot jarayonidayoq tushungandek bo'ldik. U hamkasblari bilan qandaydir reja bo'yicha “ko'z suhbatini” ham o'tkazgandek bo'ldi.

Balki, yana bir mudhish jinoyatning ildizini ochish va qonun tarozisiga solish jarayoniga kirishayotgandir. Har holda, uning oldidan ko'nglim to'lib chiqdim. El-yurt osoyishtaligi yo'lidagi jonbozlik, hushyorlik va yana tergovchilarga xos fidoyilikni o'zimda ham his qilayotgan edim.

Mingbuloq tuman IIBdan qaytarkanman, tegishli tartibdagi murojaat bilan qahramonimning ma'lumotnomasiga ko'z tashladim. E'tiborimni tortgan va yodimda qolganlari shu: Namangan viloyati Mingbuloq tumani IIB huzuridagi tergov bo'linmasi boshlig'i kapitan Abdurahmonov Rahmatullo Abdullajon o'g'li oilada to'rt qizdan keyingi yolg'iz o'g'il. Oilali, ikki nafar farzandi bor. Xizmat faoliyati davomida 11 marotaba rag'batlantirilgan…

Navbatdagi tergov ishini yakunlagach, Rahmatullo Abdurahmonov bilan yana ko'rishishni, u bilan ishlayotgan ahil jamoaning muvaffaqiyatlari haqida kengroq va batafsilroq yozishni niyat qildim.

Jahongir TO'XTASINOV,

O'zbekiston Jurnalistlar

uyushmasi a'zosi.