Vatan

ko'kragingda gullaydi qiyg'os

Abdusaid KO'ChIMOV

Muallif haqida:

Abdusaid Ko'chimov Samarqand viloyatining Urgut tumanida tug'ilgan. Nizomiy nomidagi Toshkent davlat pedagogika instituti (hozirgi O'zbekiston milliy pedagogika universiteti)ning o'zbek tili va adabiyoti fakultetida tahsil olgan.

Mehnat faoliyatini bolalar gazetasida boshlagan ijodkor O'zbekiston Yozuvchilar uyushmasida, “Sharq yulduzi” jurnalida, O'zbekiston teleradiokompaniyasi va boshqa yuqori idoralarda turli mas'ul vazifalarda mehnat qilgan.

Hozirda O'zbekiston Milliy axborot agentligi (O'zA) Bosh direktori vazifasida ishlaydi.

Adibning “Kashfiyotchi bolalar”, “Mening O'zbekistonim”, “Toshburgut”, “Mening yulduzim”, “Chanoq”, “Halqa”, “Ikki bahor”, “Umid daraxtlari”, “Qiyofa”, “Yosuman”, “Muhabbat bog'lari”, “Safar”, “Qor”, “Bahor”, “Men shoirman, istasangiz shu…”, “Binafsha”, “Qayta tug'ilgan bola” singari o'ttizga yaqin she'riy va nasriy kitoblari nashr etilgan.

Abdusaid Ko'chimov “Shuhrat” medali, “Mehnat shuhrati” ordeni, “O'zbekiston Respublikasida xizmat ko'rsatgan jurnalist” unvoni bilan taqdirlangan.

O'zbekiston Yozuvchilar va Jurnalistlar uyushmalari a'zosi.

Besh tashabbus, besh g'oya

Prezident Shavkat Mirziyoyevning tashabbusi bilan taqdim etilgan 5 muhim tashabbus mamlakat hayotida katta voqeaga aylanib ketdi.

Gazeta xabaridan.

Yog'moq uchun yomg'irlar,

Irmoqlar kulmoq uchun;

Ko'klamoq uchun qirlar,

Daryolar to'lmoq uchun;

Bir guldurak, bir chaqmoq

Bo'lgan kabi kifoya.

Dunyoga ochdi quchoq –

Besh tashabbus, besh g'oya.

Orolda berdi jilo

Bo'kadan taralgan nur.

Sayxun, Jayhundek go'yo –

Qalblarda toshdi surur.

Mahobatli bu to'lqin

Endi bilmas nihoya;

Quyoshdek sochgay yolqin –

Besh tashabbus, besh g'oya.

Saflar boshida lov-lov

Jilolangay mayoqlar.

Dillarda yondi olov,

Nurlandi ishtiyoqlar.

Bugun do'st – do'stga qanot,

Bugun do'st – do'stga qoya.

Har botirga duldul ot –

Besh tashabbus, besh g'oya.

O'zbekiston uyg'ondi,

Uyg'ondi mudroq ko'zlar.

Oy nuriga chulg'andi

Osmon to'la yulduzlar.

Endi shiddatimizga

Bulutlar solmas soya.

Tog'day tayanchdir bizga

Besh tashabbus, besh g'oya.

Bo'lmoq uchun mukammal,

Quchmoq uchun samoni;

Qurmoq kerak eng avval

Ko'ngil degan dunyoni.

Ko'ksiga qo'ngay yulduz,

Kimki qilsa rioya;

Yolqin ilhom, yoniq so'z,

Besh tashabbus, besh g'oya.

San'atsiz hayot – kuybat,

Ilmsizlik kulfatdir.

Bahonalar hammavaqt

Tanballarga ulfatdir.

Yolg'onlarni so'ldirgay,

Aldovlar endi zoya;

Illatlarni o'ldirgay

Besh tashabbus, besh g'oya.

Barcha hamohang bo'lib,

“O'qing!” degan xitobga;

Yuraklar shavqqa to'lib,

Qaytayotir kitobga.

Bu qudratli yolqinlar

Bilmas endi nihoya.

Faqat yuksakka undar

Besh tashabbus, besh g'oya.

Ishlasang-u, bilmasang

Dam olishni, hordiqni.

Bo'yningga ossang beshan,

“Nodon” degan yorliqni;

Kimga kerak bu sitam,

Bunday mahzun hikoya?

Chek qo'ymoqda bunga ham,

Besh tashabbus, besh g'oya.

Ko'rsatgaylar yana bo'y,

Navoiylar, Sinolar.

Mulla To'ychi chalgan kuy,

Bo'lgay doston, kinolar.

Jahoniy minbarlarga

Chorlab poyama-poya;

Etaklar zafarlarga,

Besh tashabbus, besh g'oya.

Bugun tog'dan toshgacha

Boshqachadir na'rasi.

Shovullaydi boshqacha

Sangardak sharsharasi.

Muhtasham qasrlarga,

Muborak zarrin loya,

Teng bo'lgay asrlarga

Besh tashabbus, besh g'oya.

Yurtimizda, alqissa,

Mumtoz kurash boshlandi.

Qo'shay, deb unga hissa,

Alp qadamlar tashlandi.

Hammamizga har damda,

Ham quvvat, ham himoya;

Qanot yozar olamga

Besh me'moriy cho'ng qoya:

— Besh tashabbus, besh g'oya!

27.05.2019

Qo'llasin

Elboshim, Sizni bu tong zarrin ma'volar qo'llasin,

Shosh sari Zomin osha, uchgan sabolar

qo'llasin.

Qo'llasin O'riklisoy,

daryoyi Sangzor jo'sh urib,

G'ovsul A'zam, Nur ota, Zangi bovolar

qo'llasin.

Chiqdingiz bog'lab kamar,

og'ir safarga jahd ila,

Duch kelib qolganda yov – yovqur daholar

qo'llasin.

Yo'lingizda yo'lchiroq bo'lsin

sadaf sayyoralar,

Qo'llasin Odam ato, Momo havolar

qo'llasin.

Har niholu har giyoh Sizga hamdam,

hamqadam,

Qumrilar chappar urib aytgan navolar

qo'llasin.

Qo'llasin, mehru vafo,

orzu-umid karvonlari,

Tog'u tosh, chashma, buloq – mehrigiyolar

qo'llasin.

Shu Vatanga jonfido bo'lmoqqa shaysiz

har nafas,

Joningizga jon bo'lib, joni fidolar

qo'llasin.

Elboshim deb ahli yurt kunu tun qilgay duo,

Elboshim, daryo bo'lib oqqan duolar

qo'llasin.

1.02.2017.

VATAN

Vatan nimadir, deb so'raysan, ajab…

Ta'riflab bo'lgaymi ona sutini?

Javob qidirmagin ko'kka mo'ltirab,

Vatan osmonlarda yotmas berkinib.

Bir parcha hovlingni iforga ko'mib,

Bir parcha hovlingni yashnatib beshan –

Saharda sehrli o'ylarga cho'mib,

Gurkurab turguvchi rayhoning – Vatan.

Ishkomda marjonday yaltirab yal-yal,

Husayni labidan tomgan boldir u.

Zangori sohilda kelinchak misol

Suzilib turguvchi majnuntoldir u.

Nozik novdalarni opichlab turgan

Namozshom gulining ko'zi ham Vatan.

Yolg'iz saksovulning tomiri cinggan,

Yalangto'sh cho'llarning tuzi ham Vatan.

Dalangda barq urib o'sgan har giyoh,

Har erka maysaning nozidadir u,

Tanbur navosidan chiqqan mahzun oh,

G'anijon Toshmatning sozidadir u.

Sira ko'rganmisan, quyosh botar chog'

Alvonga bo'yalar jilg'alar rangi.

Alomat g'ovurga ko'milar qishloq,

Dimoqni qitiqlar podaning changi.

Ikki qop somonni eshakka ortib,

Angardan qaytadi otang piyoda.

Zumda dasturxonga kiradi tartib,

Shirin jaranglaydi choynak-piyola.

Musicha solgandir ayvoningga ko'shk,

Balki, qaldirg'och ham qurgan koshona.

Qushchalar har sahar kuylagan qo'shiq,

Vatandir muqaddas, mumtoz, yagona.

Yaqinroq ko'rmoqni istasang yana,

Yo'ng'ichqa guliga yuzlaringni bos.

Osmonga tikilib yotsang jimgina,

Vatan ko'kragingda gullaydi qiyg'os.

Yo yarim kechada ma'vodan tushib,

Tomda yonboshlagan yulduzlarni ko'r,

Yuraging daryoday ketmasmi jo'shib?

Vatandir shu tuyg'u – samoviy surur.

Vatan nimadir deb so'rama, inim…

11.07.2012

Bu oqshom

Ko'k toqida yulduzlar, sayron bo'ldi

bu oqshom,

Tog'lardagi qor, muzlar, hayron bo'ldi

bu oqshom.

Bulutlarni tebratib, raqsga tushdi shamol,

Yeru samoga hilol, sulton bo'ldi bu oqshom.

Qordek duv-duv to'kildi

olcha gulin barglari,

Olcha gulin barglari xirmon bo'ldi

bu oqshom.

Ko'm-ko'k niliy samoda yuz berdimi zilzila?

Somon yo'li ko'pirdi – to'fon bo'ldi

bu oqshom.

Soylar – soyga, daryolar

qo'shilgandek daryoga,

To'lqin-to'lqin dengizlar ummon bo'ldi

bu oqshom.

Baxt bog'ida chechaklar yashnab yal-yal ochildi,

Baxt gulshani chamanzor – bo'ston bo'ldi

bu oqshom.

3.02.2020