Oftobtaxtim mening, oytaxtim mening

“Toshkent oqshomi”ga va barcha

zahmatkash muxbirlarga

Ustoz G'afur G'ulom duosi bilan

Parvozin boshlagan uyg'oq gazetam.

Sen borsan – qalbimning tug'rosi baland,

Aslo yakun topmas mening qasidam.

 

Elning xovotiru og'riqlaridan

Yupanch, tasalliday bunyodga kelding.

Mash'um zilzilaning   yoriqlaridan

Oq atirgul bo'lib dunyoga kelding.

 

Yarmi vayron   uyning eshigin izlab,

Shitirlab xushxabar keltirgan o'zing.

Jajji chaqaloqning beshigin siypab,

Salqin sabolarni yeldirgan o'zing.

 

U paytlar biz hali yosh bola edik,

Zavqu orzularga limmo-lim yurak.

Tomlarda yugurgan gullola edik,

Go'zal oqshomlardan bergansan darak.

 

Hali “Mahallada duv-duv gap” – hayot,

O'lmas Lutfixonim aya siymosi.

Shundadir dillarga   nur bergan bayot,

Shundadir mehrning asl kimyosi.

 

Oddiy temirchining otalik tafti

Etgaydir dunyoning bolalariga.

Bunda chiziqlari   onalar kaftin

Ulangan quyoshning tolalariga.

 

Men bahordan qolgan qaldirg'och edim,

Qaldirg'och qaydadir qishlamog'i shart.

Qaldirg'och, ayniqsa yosh shoir bo'lsa,

Eng avval “Oqshom”da ishlamog'i shart!

 

Toshkent qizlarining ko'ylaklarida

Bir satrdan she'rim, shodligim qolgan.

Har bir sahifangning yo'laklarida

Muhabbatim qolgan, yoshligim qolgan.

 

Aziz ustozlarga men qo'yib ixlos,

Ranju zahmatlarin ko'rgandim bunda.

Hayotning shafqatsiz ko'zlariga rost,

Tik qarab yashashni o'rgandim bunda.

 

“Motamsaro ona” qoshida u kun

Bir kemtik nondayin turganlarim bor.

Anhor bo'ylarida yor suyib gulgun,

Erka shoiringday yurganlarim bor.

 

Bunda har bir nihol kelinchak bo'lgay,

Oftobtaxtim mening, oytaxtim mening.

Ko'priklar evrilib kelajak bo'lgay,

Olamga ostonam – poytaxtim mening.

 

Ustuvar qo'rg'onsan – chin do'stlaringu

Keksayu yoshlarning tilaklarida.

Ezgulik arkasin ustunlariyu

Turnalari bilan laylaklarida.

 

Faqat ko'ngillardan taralsin yolqin,

Bag'ring butun bo'lsin, yaro bo'lmasin.

Oqsaroy misoli munavvar qolgin,

Oqshoming hech qachon qaro bo'lmasin.

2006

Sirojiddin Sayyid,

O'zbekiston xalq shoiri.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

18 − 5 =