Sultonning maktubini kim yetkazadi?
Xullas, gap mundoq, hamma bazmga! O'zbekiston davlat Jahon tillari universitetida yangi yil bazmi tashkillashtirilayotgan ekan. Ijtimoiy tarmoqlarda “Ball, maskarad, mister & miss, fleshmob, kofe-breyk va diskoteka, shuningdek, shohona ball dasturxonida unutilmas onlar” deya tarqatilgan e'longa ko'zimiz tushdi.
“Bazm ishtirokchilari o'z jufti bilan ishtirok etishi (agar jufti bo'lmasa, biror yaqini yoki tanishini taklif qilishi), yigitlar smokingda, qizlar ball kiyimida bo'lishi talab etiladi”, deyilgan e'londa.
Ko'z tegmasin, qanday ulug' ish! Ayniqsa, koronavirus pandemiyasi hali davom etayotgan bir paytda yigit-qizlar qo'ltiqlashib, balga borishsa!
Avstraliyalik tarixchi Jozef von Hammer-Purgshtalning xotiralarida hukmdor o'z yurti sarhadidan tashqaridagi hayosizlikka bunday qarshi chiqqani yoziladi:
“Usmoniylar sultoni Sulaymon Qonuniyning Fransiya hukmdoriga yozgan maktubi:
“Menkim, qirq sakkiz yurtning imperatori Qonuniy Sulton Sulaymonman. Menga yetgan xabarlarga ko'ra, sening mamlakatingda “tansa” nomida xotin bilan erkak bir-biri ila quchoqlashib, xaloyiq oldida ochiqchasiga o'yin tushadigan odat paydo bo'libdi.
Hududlarimiz bitta bo'lgani bois, ushbu razolatli o'yinning mamlakatimga o'tish ehtimoli mavjud. Nomai xumoyunim qo'lingga yetgani zamon bu o'yinni to'xtatsang, to'xtatding, to'xtatmasang, mening o'zim borib to'xtataman”.
Mana shu birgina maktub tufayli Fransiyada to'la yuz yil “tansa” o'yini man etiladi. Bu haqda Fransiya tarixiga oid manbalarda ham ma'lumotlar bor. Xo'sh, Oliy ta'lim muassasasiga sultonning maktubini kim yetkazarkin-a?!
Tahririyatdan: muxbirimiz ushbu holat yuzasidan munosabat olish uchun Oliy va o'rta maxsus ta'lim vazirligining ma'naviy-axloqiy tarbiya boshqarmasi boshlig'i Otabek BOZOROV bilan bog'landi. Otabek BOZOROV holatga: “Haqiqatan ham “O'zDJTUda yangi yil bazmi!” nomi ostida e'lon qilingan va u yerda nazarda tutilgan ball o'tkazish tadbirlari haqidagi xabar universitetning 2 nafar yuqori kurs talabasi tomonidan ijtimoiy tarmoqlarga joylangan.
Bu masala bo'yicha mazkur tadbirni e'lon qilgan talabalar bilan suhbatlashildi. E'londagi ball, maskarad, fleshmob kabi “Ommaviy madaniyat” unsurlari o'zbek milliy mentalitetiga, milliy urf-odat va an'analarimizga, o'ziga xos yozilmagan axloq qoidalarimizga to'g'ri kelmasligi, buning o'rniga Vatanni madh etuvchi kuy va qo'shiqlar, yoshlarni vatanparvarlik ruhida tarbiyalashga yo'naltirilgan “Yangi O'zbekiston – yangicha dunyoqarash” shiori ostida o'tkazilayotgan tantanali tadbirlarda ishtirok etish tavsiya qilindi.
Umuman, bu kabi tadbirlarni o'tkazishda talabalar oliy ta'lim muassasasidagi mas'ul rahbar va xodimlar bilan kelishishlari maqsadga muvofiqdir”, deya fikr bildirdi.
Darvoqe, talabalar o'zlari tashabbus bilan chiqib, tadbir tashkil etishlari mumkinmi?
— Ha, mumkin. Lekin hammasi belgilangan tartib-qoidalar, ya'ni xalqimizning milliy, ma'naviy darajasiga zid ko'rinishda bo'lmasligi kerak, — deydi Oliy va o'rta maxsus ta'lim vazirligi mutasaddisi.
Nima ham derdik. Hamma narsa o'z o'rnida, yarashiqli bo'lganiga ne yetsin! Yaqinlashib kelayotgan bayramlar bilan!
Suhrob ZIYoDOV