Xalq ichiga kirib boraylik!

O'ttiz yil… Ko'hna tarix oldida bu raqam ehtimol dengizdan bir tomchidek. Ammo mustaqil O'zbekistonimiz uchun “30” ko'p xususiyatlarni anglatadigan katta mazmun, mohiyat kasb etdi. Alalxusus, shu arafada muhtaram Prezidentimiz Shavkat   Mirziyoyevning “Yangi O'zbekiston strategiyasi” kitobi yorug'lik yuzini ko'rdi.

Bu yil qutlug' sanaga bag'ishlanib “Yangi   O'zbekiston” bog'ida kechgan   bayram tantanasi avvalgilardan keskin tafovut qilgani   barchaga ayon. Teatrlashtirilgan ko'rinish­lar fonida Istiqlol mohiyatining ifodalanishi   tomoshabinlar ko'ng­lida o'zgacha   zavqu shukuh tuyg'ularini   jo'shtirayotganini xayolga keltirish   mumkin edi. Prezidentimiz ta'kidlaganidek, bu inson tafakkuri   o'zgarayotganiga bir misoldir.

Oradan ikki haftacha vaqt   o'tgach, aniqrog'i, kecha poytaxtimizdagi Milliy matbuot markazida O'zbekis­ton   Jurnalistlari ijodiy uyushmasi,   Prezident Administratsiyasi huzuridagi   Axborot va ommaviy   kommunikatsiyalar agentligi, Madaniyat   vazirligi, Yozuvchilar uyushmasi, Milliy teleradiokompaniya, O'zbekiston   Milliy axborot agentligi, O'zbekiston Respublikasi Kinematografiya agentligi, Badiiy akademiya,   Res­publika “Tasviriy oyna”   ijodiy uyushmasi hamkorligida Vatanimiz   mustaqilligining o'ttiz yilligiga   bag'ishlangan “Eng ulug', eng   aziz” an'anaviy ko'rik-tanlovining respublika bosqichi g'olib   va sovrindorlarini taqdirlash   marosimi o'tkazildi.

Shuni alohida ta'kidlash joizki,   mazkur ko'rik- tanlov 1997   yilda Vazirlar Mahkamasining qaroriga binoan tashkil   etilgan. Ushbu nufuzli tanlovning yuqori   saviyada o'tkazilishiga O'zbekiston   Jurnalistlari ijodiy uyushmasi   bosh-qosh bo'lib kelmoqda.

Joriy yilgi ko'rik-tanlov mo­hiyatida   “Yangi O'zbekistonda erkin   va farovon yashaylik!”   degan   ezgu g'oya   ustuvorlik kasb etdi.

Marosimda O'zbekiston   Jurnalistlari ijodiy uyushmasi   raisi, Tanlov hay'ati raisi   Olimjon O'sarov, O'zbekiston Milliy   axborot agentligi Bosh   direktori Abdusaid Ko'chimov, O'zbekiston Respublikasi Prezidenti   huzuridagi Axborot va   ommaviy kommunikatsiyalar agentligi   boshqarma boshlig'i Ma'murjon Parpiyevlar so'zga   chiqishib, joriy yilgi   bellashuvning o'ziga xos   jihatlari to'g'risida gapirdilar.

“Ijodkorlar o'rtasida   an'anaviy o'tkazib kelinayotgan   “Eng ulug', eng aziz”   ko'rik-tanlovi ijod ahlining   jamiyatdagi faolligini oshirish, kasbiy mahoratini yuksaltirish, fidoyi ijodkorlar qatlamini   yuzaga olib chiqish,   iqtidor sohiblarini rag'batlantirish va qo'llab-quvvatlashda muhim   o'rin tutayotgani sir emas. Muhtaram   Prezidentimiz Shavkat Mirziyoyevning 2020 yil   17 dekabrdagi “O'zbekiston   Respublikasi davlat mustaqilligining o'ttiz yillik bayramiga   tayyorgarlik ko'rish va   uni yuqori saviyada   o'tkazish to'g'risida”gi qarori   8-bandida O'zbekis­ton Jurnalistlari ijodiy uyushmasi va   boshqa tashkilotlar hamkorligida “Eng ulug', eng aziz” an'anaviy respub­lika   ko'rik-tanlovini yuqori darajada   o'tkazish belgilangan.

Davlatimiz rahbarining   2021 yil 3   fevraldagi “ 2017-2021 yillarda   O'zbekiston Respublikasini rivojlantirishning beshta ustuvor yo'nalishi   bo'­yicha Harakatlar strategiyasini “Yoshlarni qo'llab-quvvatlash va   aholi salomatligini mustahkamlash yili”da amalga oshirishga   oid davlat dasturi   to'g'risida”gi Farmoni bilan   tasdiqlangan Davlat das­turida   “Eng ulug', eng aziz”   an'anaviy ko'rik-tanlovini o'tkazishga   O'zbekiston Jurnalistlari ijodiy   uyushmasi bosh ijrochi tashkilot sifatida   qayd etilgan”, — dedi o'z   so'zida Olimjon O'sarov.

E'tiborga loyiq   jihati ko'rik-tanlov oltita   yo'nalish bo'yicha jabha   oldi. Bular — bosma ommaviy   axborot vositalari xodimlarining maqolalari, ommaviy axborot vositasi   sifatida davlat ro'yxatiga   olingan veb- saytlar xodimlarining jurnalistik ishlari, televidenie   va radio ijodkorlarining materiallari, yozuvchi va   shoirlarning badiiy asarlari, tasviriy san'at, foto asarlari   va dizayn ishlari,   kino san'ati asarlari   nominatsiyalaridir. Oydinlashadiki, “Eng   ulug', eng aziz” respublika   ko'rik-tanlovining qamrovi yanada   kengaytirildi. Deylik, avvallari   elektron matbuot jabhasiga   u qadar diqqat-e'tibor qaratilmasdi.

G'olib va   sovrindorlar ma'naviy va   moddiy taraflardan rag'batlantirildi. Birinchi o'rin sohiblariga   I-darajali diplom, zamonaviy   noutbuk hamda plaketka,   ikkinchi o'rin egalariga   II-darajali   diplom, televizor, plaketka, uchinchi o'rinni olganlarga esa III-darajali diplom, planshet va plaketka topshirildi.

Vatanni sharaflash   mas'uliyatli, o'z navbatida   zavqli yumushdir. Bu jarayonda   qoliplardan chiqish davri   kelganligini ko'pchilik jurnalistlar, adiblar anglab   turibdilar. “Qizil” va “yaltiroq”   so'zlar vositasida haybarakallachilik shiorini baland ko'targanlar   nazardan qoladilar. Zero, millatimizning buyuk shoirlaridan biri yozganidek, “Xalq ichiga kirib borish” har bir ijodkorning nafaqat vazifasi, kerak bo'lsa burchiga aylanmog'i kerak. Ijod ahliga yurtimizda ko'rsatilayotgan bunday e'zoz, rag'batlar esa yanada jo'shqin ijod qilishga undashi shubhasizdir.   Shunday ekan, bu kungi   ijodkorlar xalq ichiga   kirib bormoqliklari, bunyodkorlikning otashin nafaslarini   ijodlarida ifoda qilib   berishlari darkor.

O'z muxbirimiz.