Elga tanitgan tanlov
Poytaxtdan Namanganga “Eng ulug', eng aziz” respublika tanlovining g'olibi sifatida qaytdim. Tabriklar hali davom etyapti. Mustaqilligimizning 30 yilligi arafasida taqdirlanganim quvonchimni yanada oshirdi. Joriy yilgi ko'rik-tanlovning o'ziga xosligi — unga taqdim etilgan ijodiy ishlarda “Yangi O'zbekistonda erkin va farovon yashaylik!” degan ezgu g'oya mujassamligi bilan diqqatga sazovordir.
Bundan 4 yil avval “Yilning eng faol jurnalisti — 2017” respublika tanlovida ham g'olib chiqqandim. To'g'risi, o'sha yillarda barcha jarayonlar yopiq kechardi. Nomzodlarning ijodiy ishlari soni, sifati, mazmuni va ularni baholash haqida faqat hakamlar hay'ati a'zolarigina bilardi. Natijalarni kutaverib, umidimizni uzardik, mavhumlikdan kayfiyatimiz tushardi.
Bu safar esa butunlay shaffof va ochiq tarzda tashkillashtirildi, deb o'ylayman. Tanlovga yuborilgan ijodiy ishlarimiz internet imkoniyatlaridan foydalanib keng jamoatchilik e'tiboriga havola qilindi. Mamlakatimizning jami hududlaridan turli yoshdagi ijodkorlarning materiallari maxsus ochilgan https://tanlov2021.uz/ saytiga joylashtirilib, onlayn ovoz berish ta'minlandi. Hakamlar hay'ati g'olib va sovrindorlarni aniqlashda onlayn ovoz berish natijalariga ham tayanibdi. Demoqchimanki, ijod namunalarimizdan ijtimoiy tarmoqlar faol kuzatuvchilari xabardor bo'ldi. Shu bahonada mazkur tanlov har tomonlama bizni elga tanitdi. Eng ko'p ovoz to'plashimiz uchun turli sohalar vakillarining munosabati ham inobatga olindi. Bunda O'zbekiston Jurnalistlari ijodiy uyushmasining olib borgan tashkilotchilik faoliyati, xolislik mezoniga qat'iy amal qilgan tanlov hay'ati a'zolarining xizmatlari tahsinga loyiq, albatta.
Ko'rik-tanlovga “Yangi O'zbekiston” va “Namangan sadosi” gazetalarida o'tgan bir yil davomida Namanganda amalga oshirilayotgan keng islohotlar samaralari, viloyat ijtimoiy-iqtisodiy, madaniy hayotiga oid, qizg'in bunyodkorlik jarayonlariga bag'ishlab chop etilgan o'nga yaqin tahliliy maqolalarimni jo'natgandim va yuqori baholanib, “Bosma OAV xodimlarining jurnalistik ishlari uchun” yo'nalishida faxrli o'ringa munosib ko'rilganidan xursandman. Albatta, bu nafaqat menga, balki jamoamizga ham bo'lgan e'tirofdir. Tabiiyki, shu kabi mukofotlar, e'tiroflar yanada tinimsiz, tezkor, charchoq bilmasdan ijod qilishga chorlaydi, qalamkashga qanot ulashadi.
Shu o'rinda, ustoz jurnalist va taniqli shoir, O'zA bosh direktori Abdusaid Ko'chimovning “Jurnalist” nomli mashhur she'ridan quyidagi o'tli satrlari bilan o'rtoqlashsam:
Bir kun piyodasiz, bir kuni rolda,
Tongda shahardasiz, kechqurun cho'lda,
Umrning yarmisi yomg'irda, do'lda,
Yarmisi to'shalib yotadi yo'lda.
Elim deb, yurtim deb yongan jonlarim,
Jurnalist do'stlarim, qadrdonlarim!
Bitta xabar uchun, bir satr uchun,
Goh olam nurafshon, gohida tutun,
Shundan baxtiyorsiz, shundan baxtlisiz,
Dunyoda baxt yo'qdir shu baxtdan ustun.
Elim deb, yurtim deb yongan jonlarim,
Jurnalist do'stlarim, qadrdonlarim!..
Darhaqiqat, so'zda qudrat, tasvirda haqiqat bor. Ayni fikrlarning isbotini an'anaviy “Eng ulug', eng aziz” respublika ko'rik-tanlovi misolida yana bir karra angladik, guvohiga, ishtirokchisiga aylandik.
Orifjon JO'RAYEV,
“Yangi O'zbekiston” gazetasining Namangan viloyati bo'yicha muxbiri.