Is gazidan ehtiyot bo'ling!

Ma'lumki, sovuq kunlar boshlanishi bilan harorat keskin pasayib boradi. Shu bois, ko'pchilik xonadonlarini isitish uchun turli choralar ko'ra boshlaydi. Elektr isitish asboblari, tabiiy gaz tarmoqlari yoki isitishning boshqa turli yo'llaridan foydalaniladi.

Ogohlik juda zarurki, tabiiy gazning to'liq yonmasligi, bexosdan uzilib qolishi, xona ichida to'planishi, tabiiy gazni yoqib qarovsiz qoldirish, quvurlarni ulashda xavfsizlik qoidalariga rioya qilmaslik oqibatida chaqnash, yong'in, hamda tabiiy va is gazidan zaharlanish holatlari kabi turli favqulodda vaziyatlar sodir bo'lishi mumkin. Bu hol insonlarning turli xil tan jarohatlari olishi yoki ayrim holatlarda o'lim bilan yakunlanishi kuzatiladi. Ushbu holatlarning kelib chiqish sabablari va manbalari o'rganilib, tahlil qilinganda, fuqarolarning tabiiy gazdan noto'g'ri foydalanishi, nazoratsiz qoldirilishi, isitish qurilmalari, gaz quvurlari ulangan joydan gaz sizib chiqishi oqibatida insonlarning zaharlanishi kuzatilmoqda. Bundan tashqari, qo'lbola isitish moslamalari bilan isitiladigan xonalarda mo'ri to'lib qolishi va yong'in vaqtida yopiq, tutunli xonalarda qolgan shaxslarda ham zaharlanish holatlari yuz berishi mumkin.

Ma'lumot uchun: is gazi xonadonlarda, tashkilotlarda foydalaniladigan tabiiy gazning to'liq yonmasligi, ko'mir va organik moddalarning chala yonishidan hosil bo'ladi. U rangsiz, hidsizdir.

Is gazidan zaharlanish darajasi gazning miqdoriga, kishilarning zaharlanish joyda qancha vaqt qolib ketganligiga va boshqa omillarga ham bog'liq.

Aholini tabiiy va is gazidan zaharlanishining oldini olish uchun nafaqat mutasaddi tashkilot, idoralar xizmatchilari balki, har bir xonadon egalari va barcha fuqarolar ogoh bo'lishi, barcha ehtiyot choralarini ko'rishi zarur.

Olim ORIPOV,

O'zbekiston Milliy teleradiokompaniyasi Mediamarkazi DM YoXTTEB YoN va PB inspektori, katta leytenant.