“Afsonaviy kinofestival qayta tiklanganidan minnatdormiz!”

Shu yilning 28 sentyabr — 3 oktyabr kunlari “Ipak yo'li durdonasi” XIII Toshkent xalqaro kinofestivali o'zgacha shukuhda bo'lib o'tdi

Kinoni sevmaydigan, uni tomosha qilmaydigan odam bo'lmasa kerak.

Ikkinchi jahon urushi yillaridan so'ng kino tufayli non shahri sifatida yanada tanilgan Toshkent o'tgan asrning 80-yillarida butun jahon kinochilarini jamlagan go'zal san'at poytaxtiga aylandi. So'ng…yillar o'tib bu ajoyib anjuman to'xtab qolgan edi. Yarim asrdan ko'proq o'z tarixiga ega bo'lgan ushbu xalqaro kinofestival 24 yildan so'ng qayta tug'ildi!

Toshkent yana bag'riga jahon kinoyulduzlarini chorladi. Ha, “Ipak yo'li durdonasi” nomida XIII Toshkent xalqaro kinofestivali Prezidentimiz Shavkat Mirziyoyevning tashabbusi bilan qayta tiklandi.

Qariyb bir hafta davom etgan kino bayrami o'zgacha ruhda, o'zgacha shukuhda o'tdi.

Jahonning ko'plab mamlakatlaridan tashrif buyurgan yuzlab kinoyulduzlar, soha namoyandalarining e'tirofi shunday bo'ldi: xalqaro anjumanga tayyorgarlik a'lo darajada bo'lgan. Afsonaviy kinofestival qayta tiklanganidan minnatdormiz!

Osiyo, Afrika va Lotin Amerikasi mamlakatlarining Toshkent kinofestivali ilk bor 1968 yilda “Tinchlik, ijtimoiy taraqqiyot va xalqlar do'stligi uchun” shiori ostida o'tkazilgan edi. O'sha yili dunyo­ning 22 mamlakatidan taniqli kinoprodyuserlar, rejissyorlar va kino yulduzlari ishtirok etgan, 50 ga yaqin kartinalar namoyish qilingan. Ushbu kinofestival 1988 yilga qadar muntazam ravishda o'tkazib kelingan, sovet ittifoqi parchalanganidan so'ng, ushbu festival mamlakatimizda faqat 1992 va 1997 yillarda o'tkazilgan edi.

O'zbekiston Respublikasi Prezidenti Shavkat Mirziyoyev tashabbusi bilan O'zbekiston kinematografiyasini rivojlantirish, o'zbek kinosining tarixiy shuhratini qayta tiklash maqsadida bir qator qaror va farmonlar qabul qilindi. “O'zbekkino” milliy agentligi negizida O'zbekiston Respublikasi Kinematografiya agentligi tashkil topdi. “O'zbekfilm” davlat konsernining zamonaviy binosi va pavilonlari foydalanishga topshirildi.

O'zbekiston Respublikasi Prezidentining tashabbusi bilan 1968-1997 yillar davomida O'zbekistonda o'tkazilib kelingan “Osiyo, Afrika va Lotin Amerikasi mamlakatlarining Toshkent xalqaro kinofestivali”, “Ipak yo'li durdonasi” Toshkent xalqaro kinofestivali nomi bilan qayta tiklandi, ushbu san'at anjumanini har yili sentyabr-oktyabr oylarida Toshkent shahrida o'tkazish belgilandi.

“Tinchlik, taraqqiyot va ma'rifat” shiori ostida, o'n uchinchi marotaba o'tkazilgan ushbu kinofestival avvalo, kino san'ati orqali dunyo mamlakatlari o'rtasida madaniy muloqotni yanada mustahkamlash, jahon kinoustalari bilan hamkorlikdagi qo'shma loyihalarni kengaytirish, insonparvarlik va bag'rikenglik, xalqlar do'stligini targ'ib qiluvchi, madaniy xilma-xilligini aks ettiruvchi eng sara jahon kinosi durdonalarini   jalb qilish, ushbu san'at turi orqali xalqimizning boy tarixi va betakror madaniyatini dunyoga keng targ'ib etishni ko'zda tutadi.

Ushbu anjuman munosabati bilan shu yilning 6-29 sentyabr kunlari   Toshkent shahridagi “Adib­lar xiyoboni”da O'zbekiston Kinematografiya agentligi buyurtmasiga asosan suratga olingan “Xalq yuragi” turkumidan 24 nafar buyuk shoir va adiblarimiz hayoti va ijodi haqida hikoya qiluvchi hujjatli filmlar namoyish qilindi. 27 sentyabr kuni “O'zbekfilm” kinokonsernida Toshkent Xalqaro kinofestivali munosabati bilan mahalliy va xorijiy ommaviy axborot vositalari ishtirokida matbuot anjumani tashkil qilindi. Unda yuzdan ortiq OAV vakillari ishtirok etdi. Anjumanda kinofes­tivalning maqsad va vazifalari, undan o'rin olgan tadbirlar, taqdimotlar, namoyishlar xususida jurnalistlarga ma'lumotlar berildi.

“Ipak yo'li durdonasi” xalqaro kinofestivalining tantanali ochilish marosimi, go'zal poytaxtimizda “Panorama” nomi bilan mashhur bo'lgan “Kinochilar uyi” binosida bo'lib o'tdi. Alisher Navoiy nomidagi kino saroyi– “Kinochilar uyi” bugungi kunda eng zamonaviy kino maj­mualaridan biridir. Kino majmuasi hududida filmlarni namoyish qilish uchun 10 ta kinozal, shuningdek, filmlar premyerasini o'tkazish uchun mo'ljallangan 1890 o'rinli katta kino va konsert zali mavjud.

Bugungi kunga kelib kinoteatrda keng ko'lamli rekonstruksiya ishlari olib borildi. Bino zamonaviy, yuqori texnologiyali uskunalar bilan jihozlandi.

Anjuman ishtirokchilari va mehmonlari bu yerda yaqinda ochilgan Kino tarixi muzeyi bilan ham tanishishdi. Bu yerda o'zbek kinematogra­fiyasining 100 yillikdan ziyod tarixi haqida hikoya qiluvchi nodir eksponatlar, fotosuratlar, kinotasmalar, liboslar, qo'lyozmalar, mashhur filmlarning afishalari o'rin olgan.Ushbu afishalarning aksariyati kinofestival arafasida Rossiyadan, shuningdek mamlakatimizning turli muassasalari arxivlaridan keltirildi. Ta'kidlash joizki, kapital rekons­truksiya binoning modernizm davriga oid me'moriy ko'rinishiga ta'sir qilmagan. Kinoteatr fasadining ko'rinishi saqlab qolindi.

“Ipak yo'li durdonasi” XIII Toshkent xalqaro kinofes­tivalining ochilish marosimida jahon va milliy kinosining 355 xorijlik kinoijodkor va dunyoning 55 taniqli kino yulduzlari ishtirok etdi. Ochilish marosimiga AQSh, Ozarbayjon, Belarus, Misr, Isroil, Hindiston, Italiya, Eron, Qozog'iston, Qirg'iziston, Polsha, Rossiya, Tojikiston, Turkiya va o'zbekistonlik mashhur kinoijodkorlar ham tashrif buyurdilar. Turli mamlakatlar delegatsiyalari vakillari, kino va estrada yulduzlari an'anaviy qizil yo'lakdan o'tishdi.

Festival ishtirokchilariga yo'llagan Prezidentimiz Shavkat Mirziyoyevning tabrigini Bosh vazir o'rinbosari Aziz Abduhakimov o'qib eshittirdi.

Tabrikda, jumladan, shunday deyiladi:

“Bugungi kunda shiddat bilan o'zgarayotgan dunyoda ijtimoiy voqelikka, jumladan, madaniyat va san'atga qarash va mezonlar tinimsiz yangilanib borayotgani barchamiz uchun ayon haqiqatdir. Bu jarayonlar hayotni yaxlit bir holda, jamiki ziddiyat va murakkabliklari bilan haqqoniy aks ettiradigan kinematografiya rivojiga ham o'z ta'sirini ko'rsatishi tabiiy, albatta.

Aminmanki, qayta tiklangan, o'z tarixida yangi sahifa ochayotgan Toshkent xalqaro kinofestivali zamonning o'zi talab qilayotgan ana shunday yuksak badiiy mezonlar ruhida o'tadi.

Ishonchim komil, XIII Toshkent xalqaro kinofestivali ko'pmillatli O'zbekiston xalqi uchun chinakam san'at bayramiga aylanib, yangi nom va iste'dodlarni kashf etadi, kino­ijodkorlar va kino ixlosmandlari xotirasida yorqin taassurotlar qoldiradi.

O'ylaymanki, sizlar festival doirasida mamlakatimizning qadimiy va zamonaviy shaharlarida bo'lib, turli soha vakillari bilan uchrashib, Yangi O'zbekistondagi keng ko'lamli o'zgarishlardan bevosita xabardor bo'lasiz.

Siz, azizlarni yana bir bor chin dildan tab­riklab, barchangizga sihat-salomatlik, ijodiy yutuqlar, festival ishiga esa muvaffaqiyatlar tilayman”.

Shundan so'ng, O'zbekiston Respublikasi Kinematografiya agentligi bosh direktori F.Abduxoliqov, rossiyalik kinoprodyusser va rejissyor T.Bekmambetov, amerikalik mashhur multiplakator va rejissyor Rob Minkoff va boshqalar kinofestivalning ahamiyati, yurtimizda kinematografiyani rivojlantirishga qaratilgan chora-tadbirlar, bugungi jahon kinosi oldida turgan masalalar xususida qisqacha so'z yuritishdi. Bir qator davlatlar delegatsiyalari vakillari tomonidan festivalning rasmiy bayrog'i ko'tarildi. O'zbek va jahon kinosida kuylangan qo'shiqlar asosida tuzilgan musiqiy kompozitsiya tomoshabinlar hukmiga havola qilindi. Tadbirda xorij musiqasining mashhur vakillari Rossiya xalq artisti Filipp Kirkorov, tur­kiyalik Serdar Ortach, tojikistonlik xonanda Xujastai Mirzovali va boshqa taniqli san'atkorlar ijrosidagi kuy-qo'shiqlar yangradi.

29 sentyabrdan kinofestivalning ikki muhim tanlovi “Yangi avlod kinosi” hamda “Kino besh kunda” loyihalari ish boshladi.

“Yangi avlod kinosi” va “Kino besh kunda” lo­yihalari asosida taqdim etilgan filmlar kinofestival pavilonlarida tomoshabinlar hukmiga havola qilindi.

“Jahon kinosi kunlari” ham katta tantanalar bilan boshlandi. Har bir mamlakat kinosi kunlarining ochilishi katta bayramga aylanib ketdi. Poytaxtimizning turli madaniyat muassasalari – “O'zbekiston” anjumanlar saroyi, Respublika Kinochilar uyi, O'zbekiston Milliy akademik drama teatri, Muqimiy nomidagi musiqali drama teatri, Respublika qo'g'irchoq teatri, Alisher Navoiy nomidagi davlat akademik katta teatri, Respublika Yoshlar teatri singari madaniyat va san'at maskanlarida kinofestival ishtirokchilari, milliy va xorijiy kino yulduzlari, muxlis va mutaxassislar ishtirok etdi.

Kinofestival “Festivallar festivali” shaklida, nufuzli xalqaro kinofestivallarning g'olib va nominantlari ishtirokida o'tkazildi. Uning doirasida mamlakatimiz bo'ylab 16 ta mamlakatning   kino san'ati kunlari tashkil etildi.

Toshkent xalqaro kinofestivalida qatnashchi davlatlar kinosi kunlari ham o'tkazildi.

30 sentyabr kuni “Jahon kinosi kunlari” loyihasining xorijiy ishtirokchilari o'zbek san'atkorlari hamrohligida mamlakatimizning turli hududlariga yo'l oldilar.

Mazkur kinofestival doirasida yurtimizning bir qator shaharlarida jami 6 ta kino­teatr foydalanishga topshirildi.

Har bir mamlakat vakillari o'z kino mahsulotlarini respublikamizning turli shaharlarida namoyish etdilar.

Kinofestivalga 150 dan ortiq xorijiy filmlar qabul qilindi. Asosiy qismi o'zbek tilidagi subtitrlar bilan namoyish qilindi.

Ishtirokchi davlatlarning rejissyorlari va aktyorlari ishtirokida mahorat darslari o'tkaziladi.

Mamlakatimiz bo'ylab o'tkaziladigan tadbirlarda 150 nafardan ortiq xorijiy kinoijodkorlar ishtirok etdilar. Ular orasida taniqli kinorejissyorlar, aktyorlar, prodyuserlar, fes­tivalda namoyish qilinadigan filmlarning ijodkorlari, turli distribyutorlik kompa­niyalari vakillari, xalqaro festivallar va tashikilotlar vakillari bor.

Kinofestival doirasida konferensiya, davra suhbatlari, mashhur kino ijodkorlar ishtirokida mahorat saboqlari va treninglar, ijodiy uchrashuvlar jami – 50 dan ziyod tadbirlar tashkil etildi, kinematogfariya sohasidagi xalqaro hamkorlikni rivojlantirishga oid 10 muhim hujjat imzolandi. 100 dan ortiq filmlar namoyish qilindi.

29 sentyabr kuni “O'zbekfilm” kinokonserni taqdimotida Daniyaning “Danmon Group” kompaniyasi rahbarlari, tegishli vazirlik va idoralarning rahbarlari, kinofestival ishtirokchilari taklif etildi. Unda kompaniyaning yetakchi vakillari, mutaxassislar, festival qat­nashchilari ishtirok etdi. Tadbirda O'zbekis­ton Res­publikasi Kinematografiya agentligi direktori F.Abduxoliqov, Daniyaning “Danmon Group” kompaniyasi mas'ul xodimi Xenning Bronnum va boshqalar bu yerga o'rnatilgan zamonaviy texnologiyalarning kinematografiya rivojidagi ahamiyati, bu borada xorijiy korxonalar bilan hamkorlik istiqbollari, yangi asbob-uskunalardan foydalanish masalalari xususida so'z yuritdilar.

2018 yil 19 oktyabrda O'zbekiston va Rossiya hukumatlari o'rtasida “O'zbekiston Respublikasida Rossiya Federatsiyasining oliy ta'lim bo'­yicha ta'lim muassasalari filiallarini tashkil etish va ularning faoliyat yuritishi to'g'risida” bitim imzolangan edi. Shunga ko'ra 2021 yil 28 avgustida O'zbekiston Respublikasi Prezidentining “Toshkent shahrida S.A. Gerasimov nomidagi Butunrossiya Davlat kinematografiya instituti” federal davlat byudjeti oliy ta'lim muassasasi filiali faoliyatini tashkil etish to'g'risidagi qarori qabul qilindi. Aytish joizki, bu qarorning imzolanishi mamlakatimiz oliy ta'lim tizimi va kinematografiya rivojida muhim tarixiy voqea bo'ldi.

Zotan, jahon kinematografiya ta'limida Butunrossiya Davlat kinematografiya instituti alohida o'rin tutadi. Bir asrdan ko'proq tarixga ega bo'lgan ushbu institutdan ayni paytga qadar jahon kinosining qanchadan-qancha ko'zga ko'ringan namoyandalari yetishib chiqqan. Xususan, ushbu ta'lim dargohida Komil Yormatov, Yo'ldosh A'zamov, Latif Fayziyev, Elyor Eshmuhamedov, Ali Hamroyev,   Rashid Malikov, Farhod Mahmudov singari o'zbek kinosining o'nlab namoyandalari ta'lim olishgan.

Demak, O'zbekiston tarixida ilk bor kinematografiya yo'nalishida mutaxassislar tayyorlaydigan oliy o'quv yurti Butunrossiya Davlat kinematografiya instituti Toshkent filiali o'z faoliyatini bosh­laydi. 2021-2022 o'quv yilidan mazkur institutga talabalar qabul qilinadi.

Darhaqiqat, o'zbek kinosining rivojida ushbu nufuzli ta'lim maskanining o'rni va aha­miyatini e'tirof etgan holda, so'nggi yillarda ushbu institut bilan aloqalarimiz sezilarli ravishda ortdi. 2019 yildan beri institut rahbariyati, xususan, rektor Vladimir Malishev bilan bir necha bor uchrashib, hamkorlikni rivoj­lantirish bo'yicha muzokaralar olib borildi. Ayni paytda ikki tomonlama imzolangan kelishuvga muvofiq, Butunrossiya davlat kinematografiya institutida Agentlik tomonidan yuborilgan 20 nafardan ortiq yigit-qiz ta'lim olmoqda.

Kinematografiya tarixida hujjatli kino muhim o'rin tutadi. Ayni paytda O'zbekiston Res­publikasi Kinematografiya agentligi qoshida Hujjatli va xronikal filmlar stu­diyasi faoliyat ko'rsatmoqda. Kinofestival doirasida turli mamlakatlarning hujjatli kino ustalari ishtirokida “Hujjatli kino kunlari” ham o'tkazildi. Ular ishtirokida davra suhbatlari, mahorat darslari, turli mamlakatlarda yaratilgan 20 dan ortiq hujjatli filmlar namoyish qilindi.

Kinematografiyaning eng muhim masalalaridan yana biri yaratilgan kinoasarlarni saqlash va keyingi avlodlarga ham bekamu-ko'st yetkazishdir. Ayni paytga qadar O'zbekiston Milliy kino fondi o'z binosiga ega emas edi. “O'zbekkino” Milliy agentligida yetarlicha sharoitlar bo'lmagani uchun juda ko'p tarixiy tasmalar O'zbekiston Milliy arxiviga topshirilgan edi. Mazkur san'at anjumani doirasida O'zbekiston kino fondi ham o'zining alohida binosiga ega bo'ldi. Binoning ochilish marosimida ko'pgina mahalliy va xorijiy kinoijodkorlar ishtirok etishdi.

Turli mamlakatlardan tashrif buyurgan taniqli kino arboblari, kinorejissyorlar va ope­­ratorlar, aktyorlar va kinotanqidchilar kinofes­tival kunlari Yangi O'zbekistonda yuz berayotgan o'zgarishlar bilan yaqindan tanishishdi. Ular o'z taassurotlarini o'rtoqlashishdi.

— Birinchi marta Toshkentga hamkorlikda film ishlaganimizda kelgandim, bir oy davomida bu yerda yashaganmiz, ammo mamlakat bilan yaqindan tanishish imkoni bo'lmagan, — dedi hindistonlik kinoaktyor va prodyuser Mitxun Chakraborti. — Toshkentga kelib, hayratimni yashira olmadim. Aeroportning o'zidayoq ulkan o'zgarishlarni ko'rib, xuddiki, o'zimni Yevropaga kelib qolgandek his qildim. Albatta juda ham chiroyli, mehrli xalqingiz ham o'zgarishlarga ko'rk beryapti. O'zbekiston va Hindiston o'rtasida azaldan juda yaqin do'stona aloqalar bo'lgan va bugun ham bu aloqalar nafaqat kino va seriallar, balki barcha sohalarda davom etib kelyapti. Bular meni faqat quvontiradi. Aytishim mumkinki, Toshkentga kelib, O'zbekiston yangi taraqqiyot bosqichiga chiqib, yanada rivojlanib chiroy ochganiga guvoh bo'ldim. Ayni paytda, Toshkent Xalqaro kinofestivalining Yangi O'zbekis­tonda o'tkazilishi juda muhim voqea deb, ayta olaman.

Fursatdan foydalanib, O'zbekiston Prezidenti Markaziy va Janubiy Osiyoda tinchlik va taraqqiyotni ta'minlashga salmoqli hissa qo'shayotganini ham alohida e'tirof etmoqchiman. Biz hind delegatsiyasi samimiy va do'stona qabul uchun O'zbekiston hukumatiga o'z minnatdorligimizni bildiramiz.

— Men dunyoning turli mamlakatlaridagi kinematografistlar qatori mashhur va afsonaviy kinofestivalning qayta tiklangani uchun O'zbekiston Respublikasi rahbariyatidan juda minnatdorman, — dedi amerikalik kinorejissyor Stiven Sigal, — Dunyoning ko'plab mamlakatlaridan kelgan taniqli kino namoyandalari ishtirokidagi mazkur kinofestival juda katta miqyosli voqeaga aylandi. Yangi O'zbekistondagi Toshkent xalqaro kinofestivali do'stona va ijodiy muloqotlarga boy bo'ladigan maydon sifatida o'zining avvalgi shuhratini yana qayta tikladi! Biz birgalikda unutilmas voqealarni guvohi bo'lib, juda mazmunli kunlarni boshimizdan kechirdik.

Turkiyalik hujjatli kino ustasi Huseyn O'zdenning fikricha, “Turkiya va O'zbekiston o'rtasida mushtarak jihatlar juda ko'p. Men Onado'lida, Turkiyada nimani ko'rgan bo'lsam, O'zbekistonda ham shuni topa olaman. Tilimiz,   urf-odatlarimiz, e'tiqodimiz bir. O'zbekis­tondagi bu galgi tashrifim asnosida juda katta o'zgarishlarga guvoh bo'ldim. Birgina Toshkent xalqaro kinofestivalining qayta tiklanishi ham O'zbekistonning yutuqlaridan biri deb bemalol aytishim mumkin.

Men ushbu kinofestivalda turk dunyosining buyuk mutafakkiri Hazrat Mir Alisher Navoiy haqida hujjatli film bilan ishtirok etdim. Film uchun ma'lumot to'plash asnosida bir qator o'zbek va turk olimlari bilan uchrashdim. Navoiyning hayoti va ijodi haqida imkon qadar yangi ma'lumotlardan foydalanishga harakat qildim. Zotan Navoiy shaxsiyati, uning boy madaniy merosini anglatish har bir turkiy millat vakili, jumladan, mening ham insoniy burchimdir”.

— Men yana quyoshli O'zbekistonga kelganimdan xursandman, – deydi Rossiya xalq artisti Filipp Kirkorov. – O'zbek xalqini, uning mehmondo'stligini hamisha qadrlayman. Bu gal Toshkent meni boshqacha qarshi olmoqda. O'zbekiston hukumati madaniy sohalarga, xususan, kinematografiyaga katta e'tibor qaratayotganidan benihoya mamnunman. Kinefestival endi boshlanmoqda. Umid qilamizki, ushbu kinofestival Yangi O'zbekistonning yangi o'zgarishlarini namoyon etishda katta ahamiyat kasb etadi.

“Ipak yo'li durdonasi” kinofestivalining asosiy maqsadlaridan biri yosh kinoijokorlar va jahonning mashhur kino ustalari o'rtasida mustahkam ko'prik yaratish, yoshlarimizning bilimi, tajribasi va dunyoqarashini rivojlantirish sanaladi.

Shu bois, festival davomida dunyoning turli mamlakatlaridan tashrif buyurgan taniqli kinoijodkorlar, jahon kinosining atoqli namoyandalari ishtirokida o'tgan 30 ga yaqin mas­ter-klasslar, mahorat darslarida 300 nafardan ortiq yosh kinoijodkorlar, shu yo'nalishda tahsil olayotgan talabalar ishtirok etishdi. Kinofestival doirasida Rob Minkoff, Lyuk Besson, Timur Bikmambetov, Jerar Depardye, Umesh Mehra, Huseyn O'zden, Stiven Sigal, Farhod Mahmudov, Yusuf Roziqov singari o'nlab kino ustalari “O'zbekfilm” pavilonlarida yosh o'zbek kinoijodkorlari uchun mahorat dars­larini o'tishdi. Mazkur darslar davomida xorijiy kino ustalari o'z ustida ishlash sirlari, kasbiy mahorat, auditoriya bilan ishlash, mavzu tanlash, ssenariy yozish, rejissyorlik, operatorlik, aktyorlik mahorati singari yo'nalishlarda yosh yigit-qizlarga saboq berishdi. Yoshlar kino sohasida o'zlarini qiziqtirgan turli savollarga javoblar olishdi.

Festivalning tantanali yopilish marosimi 3 oktyabr kuni Toshkent shahridagi “Renessans Hall” majmuasida bo'lib o'tdi.

Sahnaga festivalning nufuzli mehmonlari vakillari, hakamlar hay'ati a'zolari chiqib kelishdi.

Rossiyalik mashhur kinoprodyuser, xalqaro hakamlar hay'ati a'zosi Timur Bekmambetov kinofestival ishtirokchilarining O'zbekiston Respublikasi Prezidentiga yo'llagan Murojaatnomasini o'qib eshittirdi.

Murojaatnomada, jumladan, shunday deyiladi:

“Muhtaram Shavkat Miromonovich,

Avvalo, afsonaviy Toshkent Xalqaro kinofestivalining qayta tiklangani munosabati bilan    Sizga samimiy minnatdorchiligimizni   izhor etishga ijozat bergaysiz.

Toshkent shahri shu kunlarda   jahon kino san'atining muhim madaniy markaziga aylandi.

…Biz, soha vakillari sifatida kino sanoati va san'atiga yuksak e'tiboringiz, yaqinda 100 yilligini nishonlaydigan “O'zbekfilm”ning yangi qiyofasi, uning texnik ta'minoti, yangilangan Respublika “Kinochilar uyi” hamda Kino san'ati muzeyining foydalanishga topshirilishi, Butunrossiya davlat kinematografiya instituti filialining ochilishi, milliy kino fondining tiklangani va o'zbek kinosi durdonalarining asl nusxalari vataniga qaytgani munosabati bilan samimiy minnatdorlik bildiramiz…”

Shundan so'ng, kinofestival ishtirokchilari va g'oliblarini taqdirlash marosimi bosh­landi. Mukofotlarni topshirish tantanali tarzda amalga oshirildi. Har bir nominatsiya bo'yicha g'oliblarga esdalik sovg'alari, pul mukofotlari topshirildi.

“Kino besh kunda” tanlovi bo'yicha germaniyalik yosh kinoijodkorlar suratga olgan “Qirg'oq” badiiy filmi “Ekologik muammolarning yorqin ifodasi uchun” nominatsiyasida g'olib deb topildi.

Estoniyalik rejissyor Nadiya Tushka “Oilaviy qadriyatlar ifodasi uchun” nominatsiyasida mukofotlandi. “Ma'rifat va taraqqiyot” nominatsiyasida Ozarbayjon rejissyori Murod Husainov taqdirlandi.

Janubiy koreyalik rejissyor Pak Su Min “Tak­ror xotiralar” filmi uchun “Festival kashfiyoti” nominatsiyasi bo'yicha g'olib deb topildi. Hay'at a'zolarining maxsus sovrini o'zbekis­tonlik Saida'lo Ma'sudxonovning “Ob'yektiv” filmi uchun berildi. “Eng yaxshi erkak roli” uchun yana bir hamyurtimiz Tursunboy Pirjonov, “Eng yaxshi ayol roli” uchun ham o'zbekistonlik Madina Mahmudova taqdirlandi.   Nihoyat gran-pri “Ipak yo'lida” filmi uchun hamyurtimiz, yosh rejisssyor Sherzod Nazarovga nasib etdi.

“Yangi avlod kinosi” tanlovida esa, “Eng yaxshi erkak roli” uchun tojikistonlik Abdukarim Mashrab, “Eng yaxshi ayol roli uchun” “Franka” filmi bosh rol ijrochisi Mariya Poddubna loyiq ko'rildi. Mazkur filming rejissyori Dmitriy Semyonov “Eng yaxshi rejissyorlik ishi uchun” mukofotini qo'lga kiritdi. Tojikistonlik Manzarali Sherali tomonidan suratga olingan “Yuk” badiiy filmi tanlovning eng yaxshi filmi deb topildi. Mukofotlarni fransiyalik mashhur aktyor Jerar Depardye, mashhur kinorejissyorlar Lyuk Besson, Timur Bekmambetov, Qozog'iston Respublikasi Madaniyat vaziri Aqtoti Rayimqulova va boshqalar tantanali ravishda topshirishdi. Shundan so'ng delegatsiyalar vakillari tomonidan kinofestival bayrog'i tushirildi.

Taqdirlash marosimidan so'ng maxsus konsert dasturi namoyish etildi.

Hikmatullox QODIROV,

“Hurriyat” muxbiri.