Gazeta muharriri hokimlikdan norozi
Qashqadaryo viloyatining G'uzor tumanida O'zbekiston Jurnalistlari ijodiy uyushmasi tomonidan ushbu viloyat hokimligi, uyushmaning mazkur va Surxondaryo viloyatlari bo'limlari hamkorligida “Jamiyat va ommaviy axborot vositalari” mavzusida mintaqaviy seminar o'tkazildi.
Ommaviy axborot vositalari vakillari — gazeta va jurnallar, teleradiokanallar hamda internet nashrlari jurnalistlari, mahalliy hokimliklar, korxona va tashkilotlarning axborot xizmatlari mas'ullari hamda ayrim blogerlar ishtirok etgan seminarda O'zbekiston Jurnalistlari ijodiy uyushmasi raisi o'rinbosari X.Salimov keyingi yillarda davlatimiz rahbari tomonidan matbuot va so'z erkinligini ta'minlash bo'yicha amalga oshirilayotgan faoliyat o'z samarasini berayotgani, joriy yilning 24 oktyabr kuni o'tkaziladigan Prezident saylovi bilan bog'liq tadbirlarni yoritishda jurnalistlarning mas'uliyati, Yangi O'zbekistonni barpo etish yo'lida olib borilayotgan islohotlar jarayonida so'z erkinligi ta'minlanishida sobitlik – mamlakatimizda yuritilayotgan davlat siyosatining ustuvor yo'nalishlaridan biri sifatida davom ettirilayotgani, shuningdek, uyushmaga a'zolarni qabul qilish va bu borada viloyat bo'limlari oldida turgan vazifalarga to'xtalib o'tdi.
— Keyingi paytlarda uyushmaga a'zolik bilan bog'liq masalalar bo'yicha murojaatlar tashkilotimiz yoki uning hududiy bo'limlariga emas, boshqa idoralarga bo'layotgan holatlar ham uchrayotgani tushunarsiz. Murojaatlar boshqa davlat organlari orqali uyushmaga kelib tushmoqda. Vaholanki, har bir viloyatda uyushmamiz bo'limlari faoliyat yuritmoqda, — deya ta'kidladi X.Salimov.
Uyushmaning Qashqadaryo va Surxondaryo viloyatlari bo'limlari raislari G. Yuldashev, M. Abdurahmonov, “Xalq yo'li”, “Yurt tarovati” gazetalari muharrirlari Ch. Jumaqulov, N. Ibragimova va boshqalar soha rivojiga to'sqinlik qilayotgan omillar, jumladan, jurnalistlarni qiynab kelayotgan masalalar, ularning ijtimoiy himoyasi, bosma nashrlarning iqtisodiy ahvolini yaxshilash kabi sohada yuzaga kelgan muammo va kamchiliklar, ularni bartaraf etish yo'llari xususida so'z yuritdi.
Chiroqchi tumani hokimligining “Chiroqchi” gazetasi muharriri Hazrat Egamberdiyev esa ayni kunda ushbu nashr yopilish arafasida ekani, jamoaning to'rt nafar xodimi bir necha oylardan beri maoshsiz ishlayotgani, tahririyat moddiy-texnik bazasi nochor ahvoldaligi va boshqa muammolar haqida so'z yuritib, tuman hokimligidan noroziligini bildirdi.
Seminarda ayni paytda tuman hokimliklari ixtiyorida tegishli tartibda mablag' qolayotgani, ular o'z nashrlarini (agar xohish bo'lsa) har jihatdan qo'llab-quvvatlashi mumkinligini aytib o'tishdi.
Qizg'in bahs-munozara tarzida o'tgan tadbirda voha jurnalistlari Uyushma har ikki viloyat bo'limlari faoliyatini jonlantirish, endi eskicha uslubida ishlab bo'lmasligi, jurnalistlar nafaqat zamon bilan hamnafas bo'lishi, balki bir qadam oldinda yurishi, zamonaviy axborot texnologiyalarini yaxshi o'zlashtirishi zarurligi, bu borada tajriba almashish, o'zaro hamkorlik munosabatlarini rivojlantirishga oid taklif-tavsiyalarini bildirdilar.
Seminar ishtirokchilari G'uzor tumanida, jumladan, “Mirijanda ota” ziyoratgohida amalga oshirilgan obodonchilik va bunyodkorlik ishlari bilan yaqindan tanishdi.
— Bugungi seminar har jihatdan foydali bo'ldi, — dedi Termiz tumani hokimligining “Janub quyoshi” gazetasi muharriri Do'stmurod Normurodov. — Tajriba almashish, sohamizga, gezetachilikka oid muammolar yechimi bo'yicha muloqotdan tashqari, bir-birimiz bilan diydorlashdik, yaqindan tanishdik. Hamkasblar yig'ilishi, o'zaro suhbatlashishi, birlashishi – koni foyda. G'uzor shahriga kelmaganimga ancha bo'lgandi. Tadbir bahona shaharda olib borilayotgan qurilish-ta'mirlash ishlari, bu yerda yashovchi aholi uchun yaratilgan qulayligu shart-sharoitlarni o'z ko'zim bilan ko'rish imkoniyatiga ega bo'lganimdan xursandman. Tashkilotchilarga rahmat.
Tuman hokimi Bekzod Suyunovning aytishicha, ayni kunda tumanda O'zbekiston Respublikasi Vazirlar Mahkamasining tegishli qarori ijrosi doirasida aholini toza ichimlik suvi, tabiiy gaz va elektr energiya bilan ta'minlanishini yanada yaxshilash, ichki yo'llarni asfaltlash bo'yicha keng ko'lamli, jumladan, yuzdan ortiq ob'yektda qurilish-ta'mirlash ishlari amalga oshirilmoqda. Tumandagi “Obod”, “Navro'z”, “Mustaqillik” va boshqa mahallalardagi ko'p qavatli uylar, aholi xonadonlariga gaz tarmog'i tortish shular jumlasidan.
Tadbir yakunida bir guruh jurnalistlarga a'zolik guvohnomalari va ko'krak nishonlari, seminar qatnashchilariga O'zbekiston Jurnalistlari ijodiy uyushmasi va G'uzor tumani hokimligining sovg'alari topshirildi.
Zafar Nazarov,
O'zbekiston Jurnalistlari ijodiy uyushmasi mutaxassisi.