Navoiy viloyati teleradiokompaniyasi faoliyati haqida ochiq muloqot

Bugungi kunda hokimliklar va korxona-tashkilotlar tizimida matbuot xizmatlari faoliyati tizimli yo'lga qo'yilgan. Bunda esa avvalo, joylarda amalga oshirilayotgan islohotlarni keng yoritib borish hamda aholini yangiliklardan izchil ravishda xabardor qilish ko'zda tutilgan. Navoiy viloyatining matbuot xizmatlari tizimida ayni paytda 50 nafarga yaqin xodim ish olib bormoqda.

OAV hamda matbuot kotiblari hamkorligini samarali yo'lga qo'yish hamda viloyatda yuritilayotgan axborot siyosati sifatini oshirish, shuningdek, O'zbekiston Milliy teleradiokompaniyasi tizimidagi kanallarda viloyatda amalga oshirilayotgan loyihalar ijrosini keng yoritish maqsadida yaqinda Navoiy viloyati teleradiokompaniyasi hamda O'zbekiston Jurnalistlari ijodiy uyushmasi viloyat bo'limi tomonidan matbuot anjumani tashkil etildi.

Navoiy shahridagi “Yoshlar media markazi”da o'tkazilgan mazkur muloqotda matbuot kotiblari 2022 yilda yoritiladigan tadbirlar rejasi bilan ishtirok etdi.

Dastlab, viloyat teleradiokompaniyasi bosh direktori G'ulom Sultonov televidenieda amalga oshirilayotgan yangi loyihalar, matbuot xizmatlari va televidenie o'rtasidagi o'zaro hamkorlik borasidagi muammolar hamda ularning yechimlari xususida batafsil to'xtalib, tizimda moddiy-texnik imkoniyatlar oshirilayotganiga e'tibor qaratdi.   Shuningdek, 2021 yilda amalga oshirilgan ishlar hamda 2022 yil rejalari borasida ham atroflicha to'xtalib o'tdi.

— Bugunning o'zida Qiziltepada 5 ga yaqin yangi bog'cha ochilmoqda, Nurotada esa zamonaviy “Madaniyat uyi” foydalanishga topshirilyapti, — dedi televidenie rahbari. — Bu aslida viloyatimizdagi barcha yangilikning o'zigina emas. Chekka hududlarimizda ayniqsa, yanada ko'proq yangiliklar bo'lmoqda. Albatta, bularning barchasini televidenieda yoritishga harakat qilmoqdamiz. Biroq, ayrim hollarda muhim jarayonlar xususida aholini shu kunning o'zida xabardor qilish borasida kamchiliklarimiz bor. Sababi matbuot kotiblari o'z hududlari yoki tegishli tizimda o'tkaziladigan yirik tadbirlar xususida yillik yo choraklik reja tuzib, viloyat televideniesiga taqdim etishsa, biz shunga qarab ijodiy guruhni taqsimlar edik va viloyatdagi barcha jarayonlarni qamrab olish imkoniyati tug'ilardi. Bugungi tadbirdan maqsad ham matbuot xizmatlari bilan ana shunday kelishuvga erishishdan iborat.

Qayd etish lozim, viloyat televideniesi efirlari mazmun-mohiyati ijobiy jihatdan tubdan o'zgarib bormoqda. Bunga esa yosh, iqtidorli, kreativ fikrlovchi yigit-qizlarni ijodiy jarayonga jalb etish orqali erishilmoqda. Yaqinda televidenie tomonidan kasting e'lon qilinib, jurnalistikaga qiziquvchi 80 nafardan ziyod o'g'il-qizlarning mahorati ko'zdan kechirildi. Bugungi kunda yoshlarbop, shuningdek, o'zbek, rus, ingliz va qozoq tillarida ko'rsatuvlar tayyorlashga kirishilgan. Bu borada Navoiy davlat pedagogika instituti bilan samarali hamkorlik yo'lga qo'yilgan.

Ochiq muloqot jarayonida bir qator ishtirokchilar ham so'zga chiqib, o'z mulohaza va fikrlarini bildirdi.

— Matbuot xizmatlari vakillarining, xususan, teleoperatorlarining viloyat teleradiokompa­niyasida malakasini oshirish taklifini bildirdik, — deydi Konimex tumani hokimligi Axborot xizmati rahbari Otabek Jangirov. — Bu alohida inobatga olinib, 2022 yildan tegishli o'quvlar tashkil etilishiga kelishib olindi. Bu albatta, bevosita matbuot xizmatlari tomonidan tayyorlangan materiallar ham viloyat televideniesi orqali efirga berilishi, ko'rsatuvlar xilma-xilligi oshishiga xizmat qiladi.

— E'tirof etish joizki, viloyat televide­niesi va matbuot kotiblari o'rtasidagi bunday ochiq muloqot Navoiyda ilk bor o'tkazilmoqda, — dedi O'zbekiston Jurnalistlari ijodiy uyushmasi viloyat bo'limi raisi Otabek Aslonov. —Anjuman davomida matbuot kotiblari tomonidan bir qator takliflar o'rtaga tashlanib, ularning tashabbuslari inobatga olindi. Endilikda viloyat televideniesi, jurnalistlar uyushmasi va hokimlik hamda korxona-tashkilotlar tomonidan memorandumlar imzolanib, 2022 yilda tegishli vazifalar amalga oshiriladi.

Matbuot anjumani so'ngida ishtirokchilar “Yoshlar media markazi”ning zamonaviy studiyasini ko'zdan kechirib, bu maskandagi mavjud imkoniyatlar bilan yaqindan tanishdilar.

Ozod MUSTAFOYEV,

O'zJIU Navoiy viloyati

bo'limi mutaxassisi

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

19 − 12 =