Men yoshlikka qaytaman bu kech…

Kunlar xazon – yonmoqda lov-lov,

Ortga qaytmas o'tgan damlar hech.

Yuragimda bir istak – olov,

Men yoshlikka qaytaman bu kech.

Shoshma!

Shoshma, ey vaqt, o'z holimga qo'y,

Sanama bas, sochlarim oqin.

Tuyg'ularim ko'kka cho'zar bo'y,

Hali ham bor ko'zimda yolqin.

Karam qilgin, yosharib qolay,

Ajinlarni arit yuzdagi.

Bog'laringdan bir bahra olay,

Shavqimni ber o'n sakkizdagi.

Qalb qo'rimda quyosh shu'lasi,

Kulgilarim hali jarangdor.

Ufurmoqda bahor nafasi,

Sevilmoqqa hali fursat bor.

Huv, bekatda bir yigit kutar,

Yoshligimni solib yodimga.

Men borsam, u suyunib ketar,

Gul ko'tarib chiqar oldimga.

Shoshma, ey vaqt, o'z holimga qo'y…

                                                              Saodat MUSAYEVA,

                                                            “Chirchiq tongi”

                                                             gazetasi mas'ul kotibi