Najot ta'limda…

O'zbekiston Respublikasi Prezidenti Sh.M.Mirziyoyevning Oliy Majlisga va O'zbekiston xalqiga yo'llagan navbatdagi Murojaatnomasi xalqimiz qalbidan chuqur joy egalladi. Shaxsan men o'zim mana bir necha kundirki, ana shu Murojaatnomaning ta'siri va taassuroti, unda ilgari surilgan g'oyalar, mamlakatimiz hayotining barcha jabhalarini qamragan fikr-mulohazalar, taklif va tashabbuslar ta'sirida yashayapman, desam xato bo'lmaydi. Chunki Murojaatda davlatimiz rahbari tomonidan zikr etilgan har bir g'oya va mulohazada mamlakatimizning iqtisodiy qudratini mustahkamlash, xalqimizning turmush farovonligini oshirish, boshlangan islohotlar ko'lamini kengaytirishdek ezgu maqsad singdirilganligi yaqqol namoyon bo'lib turibdi.

Men uzoq yillardan beri ta'lim sohasida faoliyat ko'rsatib kel­yapman. Sohaning qiyinchiliklarini ham, mavjud muammolarni ham chuqur his qilaman. Shuning uchun Prezidentimizning har bir anjumanda ta'lim-tarbiya sohasiga alohida to'xtalib, uni yana rivojlantirish bo'yicha bildirgan qimmatli mulohazalarini quvonch bilan qarshi olaman, butun vujudim bilan tinglayman.

Prezidentimiz bu yil ham har galgidek Murojaatnomada ham ta'lim-tarbiya ishiga to'xtalib, sohadagi mavjud muammolarning yechimiga qaratilgan istiqbolli loyihalar xususida ham so'z yuritdilar:

“Najot — ta'limda, najot — tarbiyada, najot — bilimda, chunki barcha ezgu maqsadlarga bilim va tarbiya tufayli erishiladi”, dedi Yurtboshimiz. Haq gap! Zero, qay bir rivoj­langan mamlakat tajribasiga nazar tashlamaylik, ta'lim-tarbiya ishiga jiddiy e'tibor qaratilganligi tufayli muvaffaqiyatlarga erishilganiga guvoh bo'lamiz. Ota-bobolarimiz o'gitlari orqali el-ulusni ilm olishga chorlanganidan ham yutuqlar kaliti ta'lim va tarbiya ekanligini anglash mumkin.

Mamlakatimizda ta'lim-tarbiya sohasini jahon standartlari darajasiga yetkazish borasida keng ko'lamli ishlar olib borilyapti. Davlatimiz rahbari o'z Murojaatnomasida ta'kidlaganidek: “So'nggi yillarda oliygohlarimiz 2,5 barobar ko'payib, 198 taga yetdi, qamrov darajasi 9 foizdan 38 foizga oshdi.

41 ta oliygohga akademik va moliyaviy mustaqillik berildi, ularda transformatsiya ofislari ochildi”.

Shu o'rinda bugungi kunda Qoraqalpog'iston Respublikasida 10 ta oliy ta'lim muassasasi faoliyat olib borayotganligini alohida ta'kidlab o'tish lozim.

2022-2023 o'quv yilida Qoraqalpog'iston Respublikasida umumiy o'rta, o'rta maxsus va professional ta'lim muassasalarini tamomlagan 500 nafar, keyingi o'quv yillari uchun esa har yili birinchi sentyabrga qadar 6500 nafar yoshning viloyatlardagi davlat oliy ta'lim muassasalariga qo'shimcha qabul parametrlari asosida qabul qilinishi belgilangan. Shuning­dek, Qoraqalpog'iston Respublikasidagi oliy ta'lim muassasalarini malakali kadrlar, professor-o'qituvchilar bilan ta'minlash maqsadida 2023 yildan boshlab mamlakatimizning yetakchi oliy ta'lim muassasalaridagi tayanch doktoranturalarda maqsadli tayyorlashni izchil yo'lga qo'yish ko'zda tutilmoqda.

Mamlakatimiz miqyosida gapiradigan bo'lsak, Murojaatnomada ta'kidlanganidek, kelgusi yilda oliygoh talabalari uchun imtiyozli ta'lim kreditlariga resurslar 2 barobar ko'paytirilib, 1,7 trillion so'm ajratiladi, innovatsiyalar uchun esa 1,5 trillion yo'naltiriladi. Bu 2017 yilga nisbatan 6 barobar ko'p degani. Olimlarning ish haqi ham 4,5 barobar oshiriladi. Bularning barchasi hisobidan nano va biotexnologiyalar, raqamli geologiya kabi 18 ta yangi ilmiy yo'nalish tashkil etiladi.

Shuningdek, Murojaatnomada kelgusi yili ilm-fan va innovatsiyalarga 1,8 trillion ajratilishi, oliy ta'lim bilan bir qatorda har bir viloyatda bittadan texnikumda yevropa kasbiy ta'lim sifatlari joriy etilishi, shuningdek, besh yilda barcha kollej va texnikumlar ushbu tizim bilan qamrab olinishi Prezidentimiz tomonidan alohida ta'kidlandi. Bu islohotlar, albatta, yurtimiz taraqqiyotiga munosib hissa qo'sha oladigan yetuk kadrlar tayyorlash uchun zamin yaratadi.

Muxtasar qilib aytganda, ta'limga berilgan e'tibor — mamlakatning ertangi kuniga, porloq kelajagiga bo'lgan e'tibordir. Ana shunday xayrli ishda davlatimiz rahbarining Murojaatnomasi, unda bildirilgan taklif va tashabbuslar dasturil­amal bo'lib xizmat qiladi.

Bayram MAMBETOV,

O'zbekiston davlat jismoniy tarbiya va

sport universiteti Nukus filiali direktori,

tarix fanlari nomzodi, dotsent

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

eighteen − 11 =