O'rgilayin “enam”dan…

1 aprel — Butun jahon kulgi kuni

                                 O'rgilayin “enam”dan…

(Hajviy she'r)

Bir kun ertalab tursam, boshim gir-gir aylandi,

Do'stim do'xtirxonaga yetaklashga shaylandi.

Qon bosimim o'lchadi chiroyli hamshira qiz,

So'ng dedi u yuzlanib: “— Oshibdi davlenangiz.”

Do'xtir yigit qog'ozga qandaydir so'zni yozdi.

Va aytdi: “— Bu doridan ichib tursangiz, sozdir”.

Tabletkaning nomini yozgan ekan “Enam” deb,

Dorixonaga shoshdik “Endi bizda yo'q g'am,” deb.

“Enam bormi?” dedim men oq xalatli ayolga.

Xaridorlar borishdi bilmam, qanday xayolga.

Tabletka tez topildi, qaytdik do'stim ikkovlon,

Har galgidek qo'lladi, azaldan u mehribon.

Subhidamda va shomda ichib turdim doridan,

Baraka topsin hamma doim kasbu koridan.

Qon bosimim joyida, balo ekan u do'xtir.

O'rgilayin “Enam”dan, endi muammom yo'qdir…

                                                                               Hasan ABDUVOHIDOV.

                                                                                Sirdaryo viloyati