Ҳаётий ҳақиқатларга бир назар

Бугун дунёда кечаётган талатўплар ҳар қандай кишини ўйлантириши табиий. Инсон нима учун яшаяпти, зўравонлик, буз­ғунчиликдан топилган фойда қанчалик татийди, кимга татийди, деган саволларга жавоб йўқ.

Айрим минтақаларда адоғи кўринмаётган можароларнинг яхшиликка олиб келмаслиги шундоқ ҳам маълум. Гап нима ҳақида кетаётганини англаб турибмиз. Демак, энг тўғри йўл маърифат йўли, бағрикенглик, тинчлик ва тенг ҳуқуқли ҳамкорлик тамойилларидир.

Яратганга шукрки, юртимиз тинч, халқимиз хавотирсиз яшамоқда. Аслида ана шунинг ўзи катта бахт!

Маълумотларга қараганда мамлакатимизда аҳоли нуфузи 36 миллиондан ошибди. Олижанобликда, маърифатпарварликда бошқалардан кам бўлмаган халқимиз дунёи-дунда фаровон турмуш кечириш, бахтли, саодатли яшаш ҳуқуқига эга. Давлатимиз сиёсатининг мазмун-моҳиятида ана шу эзгу ният ўз мужассамини топган.

Ўтган йиллар давомида   изчил амалга оширилган “Обод маҳалла”, “Обод қишлоқ” дас­турлари, маҳаллабай, хонадонбай ишлаш тизимининг йўлга қўйилгани, турли тоифали “дафтарлар” ташкил этилиб, турмуш тарзимиздаги барча муаммолар юзага олиб чиқилгани бор гап. Ҳаётга борича муносабатда бўлиш, муаммолар моҳиятини чуқур ўрганиш жамоатчиликни очиқлик сари етаклади. “Халқ давлат идораларига эмас, давлат идоралари халқимизга хизмат қилиши керак” деган тамойил сиёсатга, ҳаёт ҳақиқатига айланди. Пировардида инсон манфаатига эътибор устуворликка эришди.

Давлат кафиллигимизни олгандан кейин ҳамма нарсани қилиб бериши керак-да, деган қарашлар қолипи ҳар бир инсонда кечаётган воқеа-ҳодисаларга дахлдорлик ҳисси уйғонмагунича парчаланмаслиги мумкин. Эътибор берайлик, матонатли қурувчилар, йўлсозлар, маҳоратли меъморлар томонидан чўллар бағрида узоқни яқин қиладиган равон магис­траллар, ҳудудларни боғловчи кўприклар, кўп қаватли биноларда истиқомат қиладиган аҳоли эҳтиёжи учун зарур бўлган коммунал иншоотлар барпо этилмоқда. Бугун мамлакатимизнинг энг чекка ҳудудларидаги қишлоқлар ҳам чоғроқ шаҳарчани эслатади. Бу ишлар ким учун, нима учун амалга оширилмоқда, деган саволга жавоб топсак, юртимизда амалга оширилаётган ишларнинг мазмун-моҳиятини чуқур англаб етамиз. Турмуш тарзимиздаги бундай ўзгаришларни кўриш, ҳис этишнинг ўзи озлик қилади. Бунинг учун унинг бунёдкорларидан миннатдор бўлишимиз керак, албатта.

Яқинда ўзим туғилиб ўсган Нарпай туманида бўлдим. Очиғи, кеч бўлгани боис ҳар доим юрадиган йўлимни тусмоллаб топдим. Мирбозор қўрғони чорраҳасидан чапга бурилганда кўз ўнгингизда Қоратоғ бағрига сингиб кетадиган йўлнинг икки томонида ястаниб ётган чароғон маскан хаёлимни ўғирлади. Яқин-яқинда ҳам тор, ўйдим-чуқур бўлган йўллар таъмирланибди, кенгайтирилибди.

Туманнинг умумий майдони 441 квадрат километр. Бу ҳудудда транспорт инфратузилмасини янада ривожлантириш имконияти мавжуд. 37 километр узунликдаги М-37 халқаро автомобиль йўли, 38 километрли Тошкент-Бухоро-Хоразм-Қўнғирот, ундан яқин хорижий мамлакатлар билан боғлайдиган темир йўлнинг ушбу ҳудуддан ўтганлиги иқтисодий ривож­ланишнинг асосий омилидир. Шунинг­дек, туманда электр энергия, табиий газ тармоқлар шаклланган. Аҳолиси 214,7 минг кишидан зиёд. Эндиликда ҳар бир хонадонга ичимлик суви келтирилибди, кўчалар асфальт­ланган.

Йўл-йўлакай Оқдарё, Иштихон, Каттақўрғон туманларидаги ўзгаришларга эътибор бериб келаётгандим. Туманимиздаги бу ёрқинликни, юртдошларим юз-кўзидаги мамнуниятни кўриб қувондим. Юртим ҳашамлиги кўнглимга кўчди.

Туманнинг “Навқирон Нарпай” газетаси бош муҳаррири устоз журналист Тошпўлат Тошмуродов билан ана шу ўзгаришлар ҳақида суҳбатлашдик.

— Кўрганларингиз ҳақиқат, туманда иқтисодий юксалиш имкониятлари катта. Яқинда ҳудудимизда чиқинди қоғозларни қайта ишлаб, гипсакартон қоғози чиқарадиган корхона иш бошлади, юзлаб ёшларимиз ишли бўлди, ҳадемай қурилишда ишлатиладиган гипсакартоннинг ўзи ҳам шу ерда ишлаб чиқарилса ажаб эмас, — деди устоз. — Буларнинг бари қўшимча иш ўринлари дегани-да, ҳали ўз ҳаё­тингиздаги ўзгаришлар ҳақида гапиринг, дегандингиз. Пенсионерман, менга ўхшаган юзлаб, минглаб қариялар ҳам ишлаб, ҳам пенсия пулини тўлиқ оляпти, аввал шундай эмасди-да, тўғрими? Уч-тўрт сўмлик қалам ҳақи ёзсак, пенсионер журналистлар: “Нега менга қалам ҳақи ёздинглар, пенсиямдан белгиланганидан икки баробар қайтариб қолади”, деб додлаб келарди. Ҳозир марҳамат, эпласанг бир эмас, икки жойда ишла! Турмушимизда моддий манфаатдорлик ўзгардими, ўзгарди, буни эътироф этишимиз керак.

Ҳа, Тошпўлат ака ҳақ. Ажойиб замонда яшаяпмиз. Жамиятдаги ўзгаришлар фақат моддий, мулкий жиҳатдан эмас. Очиқлик, ошкоралик нуқсон ва камчиликларни очиқ айтишга ҳам йўл очди. Тўғри, ҳар қандай ўзгаришга осонлик билан эришиб бўлмайди. Камчилик ҳам нуқсонлар ҳам топилади. Ҳаёт курашдан иборат. Асосийси мақсад эзгу, ниятлар холис бўлсин.

Ўзбекистон Республикаси Президентининг 2022 йил 28 январдаги “2022 — 2026 йилларга мўлжалланган Янги Ўзбекистоннинг тараққиёт стратегияси тўғрисида”ги Фармонида жойларда инсон ҳуқуқларини таъминлаш, давлат органларининг ҳисобдорлиги ва очиқлиги, иқтисодиётни ислоҳ қилиш, тадбиркорликни қўллаб-қувватлаш, қишлоқ хўжалиги маҳсулотларини чуқур қайта ишлашни ташкил этиш ҳамда ҳудудларни жадал ривожлантиришни таъминлаш бўйича аниқ мезонлар белгилаб берилган.

Мамлакатимизда “Инсон қадри учун” деган эзгу ғоя асосида ҳар бир фуқаро эркин ва фаровон яшайдиган Янги Ўзбекистонни барпо этиш мақсади халқимизнинг азалий орзу-интилишларига ҳамоҳанг ва уйғун ҳолда кенг кўламли ислоҳотлар кўринишида амалга оширилмоқда.

Шу йил баҳорида Президентимиз томонидан “Янги Тошкент” лойиҳаси қурилишига тамал тоши қўйилгани кўпчиликда қизиқиш уйғотди. Пойтахтимиздаги бунёдкорлик ишлари, кўҳна кентимизнинг виқорига виқор қўшмоқда. Бетакрор меъморий ечимга эга ер ости ва устки метро йўллари, беминнат хизмат кўрсатаётган замонавий транспорт воситаларининг турфалиги кўзни қувонтиради. Энди эса   таъкидлаганимиздек яна бир улкан – “Янги Тошкент” лойиҳаси амалга оширилмоқда. Мутахассисларнинг эътирофича, бўлажак маскан учун танланган ҳудуд денгиз сатҳидан 500 метр баланд бўлиб, шаҳарга яқинлиги, ўз иқлими, баҳаволиги ва икки дарё ўртасида жойлашгани билан алоҳида аҳамиятга эга. Маълумотларга кўра, Тошкентнинг ҳозирги ҳудудий ўрами 43 минг гектардан иборат. Лойиҳага кўра, “Янги Тошкент” 20 минг гектарли кенгликда барпо этилади. Унда бир миллион аҳоли яшаши учун қулай шароитлар яратилади.

Кўриниб турибдики, миллий ривожланишнинг янги даврига дадил қадам қўйган Ватанимизнинг тенглар ичра тенг бўлиши, аввало, турмуш тарзимизда фаровонликка эришиш, белгиланган барча дастур ва лойиҳаларни ҳамжиҳатликда амалга оширишга боғлиқ экан.

Кишилик тараққиётининг ҳар бир жабҳасида ўзаро манфаатли ҳамкорлик қилиш, обрў-­эътибор қозониш ҳаётий заруратга айланмоқда.

Эътибор берайлик, халқаро муносабатларда қарама-қаршилик ва можароларнинг ортиши барқарорлик ва ривожланишга жиддий хавф солиб турган ҳозирги пайтда Ўзбекистоннинг жаҳон сиёсати марказларидан бирига айланаётгани диққатга сазовордир. Бунга Самарқанд шаҳрида ШҲТга аъзо мамлакатлар – Покистон, Россия, Тожикистон, Хитой, Ўзбекистон, Қирғизистон, Қозоғистон, Ҳиндистон, шунингдек, ташкилот ҳузуридаги кузатувчи давлатлар – Беларусь, Мўғулистон ва Эрон етакчилари, фахрий меҳмон сифатида Туркия, Озарбайжон, Туркманистон, Арманистон ҳамда бошқа нуфузли халқаро ва минтақавий ташкилот вакиллари фаол иштирок этган халқаро миқёсга молик нуфузли анжуманларнинг, Туркий давлатлар ташкилоти саммитларининг юртимизда ўтказилаётгани мисолдир.

Ўзаро тенг ва манфаатли ҳамкорлик деганда, давлатимиз раҳбари саъй-ҳаракати билан Ўрта Осиё давлатлари хусусан, Тожикистон, Қирғизистон, Туркманистон, Қозоғис­тонда яшайдиган дини, маданияти, урф-одатлари бир бўлган фуқаролар ўртасидаги яқин қон-қариндошчилик ришталари қайта боғлангани, уларнинг ўзаро борди-келди қилишлари учун барча шарт-шароитлар яратилгани, 130 дан зиёд миллат ва элатларнинг ҳузур-ҳаловатини ўйлаб амалга оширилаётган сиёсат   тинч­ликпарварлик, инсонпарварлик нуқтаи-назаридан айрим можароли давлатларга ибратдир. Ўзбекистоннинг ички ва ташқи сиёсати ана шу эзгу мақсадлар   изчиллигида намоёндир.

Минтақамизда тинчликни сақлаш, қўшни давлатлар билан ҳамкорлик муносабатларини очиқлик ва ўзаро ишонч асосига қуриш йўлидаги барча саъй-ҳаракатлар, хусусан, Президентимизнинг Бирлашган Миллатлар Ташкилотининг юксак минбаридан жаҳон аҳлига Ўзбекистон Марказий Осиёдаги қўшни мамлакатлар, хусусан, Афғонистоннинг иқтисодий тикланишига, унинг транспорт ва энергетика инфратузилмасини ривожлантиришга, миллий кадрларини тайёрлашга катта ҳисса қўшаётгани, бундан кейин ҳам Афғонистон масаласи глобал миқёсдаги масалалар марказида бўлиши ва Халқаро ҳамжамиятнинг саъй-ҳаракатлари, биринчи навбатда, ҳудуддаги ўткир ижтимоий-иқтисодий муаммоларни ҳал қилишга қаратилиши кераклиги ҳақида дадил фикр ва мулоҳазалар билдириб келаётгани Ватанимизнинг дунёда тинчлик ва барқарорликни сақлаш сиёсати устуворлигни англатади.

Жорий йил май ойида Пекинда бўлиб ўтган “Марказий Осиё – Хитой” биринчи саммитида тинч ва адолатли сиёсатга катта эътибор қаратган мамлакатлар билан ҳамкорлик қилиш ҳар қандай муносабатларга файз ва барака ато этиши иштирокчи давлат раҳбарлари томонидан эътироф этилди.

Ҳақиқатан ҳам тинчликсевар давлатлар билан ўзаро манфаатли алоқаларни йўлга қўйиш ҳар жиҳатдан   фойдалидир.

Мамлакатимизда   эришилаётган ютуқлар шулардангина иборат эмас. Саноат, қурилиш, маданият, санъат, адабиёт, таълим, соғлиқни сақлаш каби соҳаларда амалга оширилаётган ислоҳотларнинг барчаси халқимиз ман­фаатини кўзлаб амалга оширилаётгани бор гап. Буларнинг ҳаммасини биргина мақолада ҳатто санаб ўтишнинг ўзи осон эмас.

Ўзбекистоннинг дунё миқёсида ўз ўрни ва обрўси Президент Шавкат Мирзиёевнинг ўтган ҳафта Италияда расмий ташриф билан бўлишида яна бир бор намоён бўлди.

Ўзбекистон тўқимачилик саноатида ўзига хос тажрибага эга мамлакат. Шу боис Европада ўз мавқега эга бўлган Италия билан бу соҳани ривожлантириш бўйича қўшма дастурларни йўлга қўйиш, янги кооперация лойиҳаларини амалга ошириш, тўқув ускуналари ва уларнинг эҳтиёт қисмларини маҳаллийлаштириш, компанияларнинг ваколатхоналари ва дастгоҳларга хизмат кўрсатиш марказларини очиш, технологларни тайёрлаш дастурини ишлаб чиқиш, фан ва замонавий технологиялар борасида ҳамкорлик ўрнатиш ҳар жиҳатдан мамлакатимиз, халқимиз учун манфаатлидир. Милан шаҳрида бўлиб ўтган “ITMA 2023”   тўқимачилик машинасозлиги халқаро кўргазмасида давлатимиз раҳбарининг иштирок этиши, анжуманда иштирокчи   компаниялар раҳбарлари билан мулоқот қилгани, янги технологик ечимларнинг тақдимотлари билан танишганида ҳам   халқимиз фаровонлигни оширишга қаратилган эзгу мақсадлар мужассамдир.

Сўзимиз аввалида муаммоли минтақалардаги вазиятлар ҳақида икки оғиз тўхталдик. Ахир уйсиз-жойсиз, оддийгина инсоний ҳаловатдан маҳрум бўлган одамлар, етим қолаётган болалар…, қаровсиз қариялар… улар ҳам қайсидир мамлакатнинг фуқаролари ахир! Улар ҳам тинч ва фаровон яшашга ҳақли эмасми? Албатта, ҳақлидир. Аммо мақсаднинг   нохолислиги, бузуқ ниятлар касрига қолганларнинг, бу инсонларнинг оҳу зорига ким қулоқ солаяпти?

Жавоб ва хулоса   ўзингиздан. Энг муҳими, биз тинч ва фаровон турмушимиз қадрига етайлик, фарзандлар камоли, ҳаёт лаззатидан баҳраманд бўлиш бахти халқимизни ҳеч қачон тарк этмасин!

Ўктам МИРЗАЁРОВ