“Oq qarg'alar” — ularga yo'l ochilgani chin bo'lsin!

“Hurriyat”, “Ma'rifat”, “Ishonch” — har hafta orziqib kutib o'qiydigan nashrlarim. Bu nashrlarda mulohaza etishga undaydigan maqolalar, sevimli ijodkorlarimizning ijodidan namunalar beriladi, dolzarb mavzulardagi muammoli materiallar jasorat bilan yoritiladi.

“Hurriyat” gazetasining shu yil 31 may sonidagi jurnalist, yurist Habibulla Olimjonovning “Oq qarg'alar yoxud general Abdug'aniyevning kundaliklar kitobini o'qib” maqolasini qayta-qayta o'qib chiqdim.

Yuqori mansablarda ishlagan generalning xalq hayotini o'rganish uchun eski chopon kiyib “bechora dehqon” qiyo­fasida kartoshka sotgani, korjoma kiyib eski “Jiguli”da taksichilik qilishi, “o'g'irlangan” mashinasida shahar kezib, davlat avtomobil ins­peksiyasining faoliyatini o'rganishi, bojxona qo'mitasi binosini ta'mirlash, obodonlashtirish ishlarini yuzga yaqin xodimlar bilan bo'sh vaqtlarda bajarganlari — bari uning vijdonli, jasoratli inson ekaniga yaqqol misol. Ayniqsa, 130 ta temir pannolarga mumtoz shoir, allomalarning she'r va hikmatlarini bojxona qo'mitasi binosi kiraverishiga yozdirib qo'ygani esa generalning yuksak ma'naviyat egasi bo'lganini ko'rsatib turibdi.

Maqolani mutolaa qilish jarayonida ko'z oldimga akademik, Qo'lyozmalar institutining rahbari, rahmatli Aziz Qayumov xonadonlari keldi. Hurmatli olimimiz xonadonlarida bir necha bor bo'lganmiz va hayratga tushgandik. Kichkinagina hovlida uchta xona: kutubxona, yotoqxona va oshxona bo'lib, biror yaltiroq buyumga ko'zim tushmagan. Uy devoriga ham Hazrat Navoiy va Abdurahmon Jomiy surati tikilgan gilamcha ilingan, javonda esa qator kitoblar taxlangan edi. Shunday taniqli akademik nihoyatda sodda, kamtarona yashab o'tganlari hammamizga ibrat emasmi? Yoki generalning qadim zamonlardagi kabi hukmdorlarning oddiy kiyimda yurib “xalqim nima deyapti, qanday yashayapti” deb kechalari aylanib yurishlaridan o'rnak olgani hozirgi ayrim rahbarlarga namuna bo'la olmaydimi?

Muallif to'g'ri ta'kidlagan: hozirgi kunda oliy o'quv yurtlariga kirish shaffoflashyapti. Birgina misol. Yaqinda nevaram Aslzoda Bahodirova fransuz tilidan fan olimpiadasining respublika bosqichida birinchi o'rinni egallab oliy o'quv yurtiga imtihonlarsiz byudjet asosida o'qishga kirdi. Hech kim orqasidan yugurmadi. Bundan o'n-o'n besh yillar avval olimpiadalarda g'oliblik uchun ehh-e, tanish-bilishlik avj olgan edi. Hatto, olimpiada g'olibi bo'lish uchun to'rt yillik o'qishning shartnoma puli miqdorida pora so'ralishlari ham haqiqat edi. Mana, shunday kunlar keldiki, o'qigan qoqilmaydi, niyatiga yetadi.

Burgut yelkasiga minib olib bo'ynini cho'qilayotgan qora qarg'a o'rnini burgut atrofidagi oq qarg'alar egallasin.

Bu maqolani har bir rahbar, hokim va gazetxonlar o'qib, xulosa chiqarishini xohlardim.

Mahmuda VALIYEVA,

Yunusobod tumanidagi 274-maktabning

ijodiy-madaniy masalalar bo'yicha targ'ibotchisi