Qachondir tantana qiladi ko'ngil
Javohir OSMON
Muallif haqida:
Javohir (OSMON) Boqijonov — 1993 yili Quvasoy shahrida tug'ilgan. Tarjima kitoblari nashrdan chiqqan. Bugungi kunda Farg'ona politexnika institutining 4-bosqich talabasi.
SEN
Rangsiz tushlarimga kirib kelding sen,
Yana qaytib keldi gul, bahorlarim.
Binafsha labida handa, tabassum,
Dilimdan to'kildi dilg'uborlarim.
Rangsiz tushlarimga kirib kelding sen,
Osmonim bezatdi rangin kamalak.
Iztirob sop bo'ldi g'amday ezilib,
Qo'shig'in boshladi oshiq kapalak.
Men yana she'r bitdim nomingga talay,
Ishona boshladim kunlar tongiga.
Daqiqalar sayin gullaydi umrim,
Qulog'im tutaman hayot bongiga!
Rangsiz tushlarimga kirib kelding sen!
O'zgara boshladi butun koinot.
Ko'ngil kishanlardan qutilar, endi
Jonsiz tuyg'ularim qaddin tutar shod!
Rangsiz tushlarimga kirib kelding sen!
KAPALAKLAR YIG'LAYDI…
Vujud qaynab, ruh tortinib bormoqda,
G'alat hislar qon dilimni tig'laydi.
O'lsam kerak, bu dardimga yo'q davo,
Men o'lganda kapalaklar yig'laydi.
O'ksib-o'ksib ko'z yosh to'kar gulbahor,
Jazirama yoz o'zini qiynaydi.
Bog'lar xazon to'shab, bemor bo'lgaydir,
Men o'lganda kapalaklar yig'laydi.
Kun qisqarar: yil o'tadi lahzaday,
Oy osmonda yulduzlarin izlaydi.
Tomir yoyib, qish qishlaydi ayvonda,
Men o'lganda kapalaklar yig'laydi.
Qaldirg'ochlar qo'shiq aytar ezilib,
Hijron esa visollarni sizlaydi.
Nur toliqar bu dunyoni kezinib,
Men o'lganda kapalaklar yig'laydi…
* * *
It topmas yo'llarda izg'iydi umrim,
Kun qaro, tun qaro, navolar qaro.
Bir chimdim nur izlab tentiydi ko'nglim,
Zulumot dunyoda ruhimdir yaro.
Qachondir tantana qiladi ko'ngil,
Qachondir oshiyon topar o'ziga.
Bulutday oqarar kunlarim bir kun,
Tik boqib yashayman taqdir ko'ziga.
Ammo har tarafda kezinar xatar,
O'zimni cho'chitar o'zimning soyam.
Bir najot o'tingan devona kabi,
O'rtaga chiqadi qalb degan qoyam.
Do'st dedim, do'st bo'ldi ahli iztirob,
Tun kabi ko'zimga cho'kdi zalvori.
Ishonib yashayman, qarshimda bir kun,
Qulaydi bu metin g'amlar devori!
KEChIRGIL…
Kechib ketolmadim muhabbatingdan,
Nohaq kamsitishlar uchun kechirgil.
Seni farishta deb, shayton men bo'ldim,
Yo ishqi halolim, baxtni ichirgil.
Ko'zingga termulib hadiksiradim,
O'ksigan dilingga nur bo'lolmadim.
Xasta yuragingga kirgan onimda,
Sening kulging uchun biiir o'lolmadim…
Kechirgil, kechirgil, kechirib qo'ygil,
Gunohga botgan ul iztiroblarni.
Aslida dard uchun tug'ilgan yurak,
Hali ko'p yozamiz baxtkitoblarni.
Kechib ketolmadim muhabbatingdan,
Ranjitgan esam-da, yo'llarim to'sding.
Barini unutib yashamoq uchun,
Yuragim to'rida gul bo'lib o'sding!
SEN KUZNI SEVASAN…
D.ga
Sen kuzni sevasan, men esa seni,
Kuz kabi orzular dilimda mahzun.
Bunchalar rutubat bo'lmasa dunyo,
Bunchalar ranglarin yo'qotmoqda kun…?
Zirqirab og'riydi qovurg'alarim,
Sen ham o'sha yerda. Bo'lgin ehtiyot.
Dunyoda bormikan mendayin seni,
Avaylab, asrovchi, yozguvchi bayot…?
Sen kuzni sevasan, men esa seni,
Izhorga so'z ochsam, kelar quyilib.
Ozgina tinglagil, ozgina, xolos.
Qoshlaring ketmasin sira uyilib.
Sen kuzga oshiqsan, sevasan uni,
Men esa kuz kabi sarg'aygan oshiq.
Faqat farqimiz bor: kuz tabiatga,
Men esa sen uchun jon etgum tortiq.
Sen kuzni sevasan…
ZERIKISh…
Bilaman, yuraging sog'inayotir,
Ichikib boryapsan, xuddi meningdek.
Ko'ksingga qo'rg'oshin quyilayotir,
Tomchilab boryapman men ham seningdek.
Xotirang dilimda qolgan asotir,
Ruhimni kemirib boradi tinmay,
Yurakni g'ijimlab o'tar yillarim,
Siniqib boradi hislarim sinmay.
Negadir sarosar tentiyman tunlar,
Kezaman xayolning jin ko'chalarin.
Hijron quyoshida qovjiragan qalb,
Unuta olmaydi baxt kechalarin.
Oh. Yana o'smoqlab ketayotir dard,
Tig'siz tilkalaydi bag'rin visolning.
Men kabi ishq deya o'ksigan behol,
Ko'ngli ham, bag'ri ham yarim hilolning.
Bilaman, yuraging sog'inayotir…