Cho'lpon

Tushlarimga kiradi Cho'lpon,

Bilmam nening g'amini yeydi?

Diyor Rahmon, uxlama, uyg'on,

Mudroq xalqqa she'rlar yoz, deydi.

 

Ishqalayman ko'zimni mahzun,

Xalqnikidek mudroq ketmaydi.

Men Cho'lpondek yozishim uchun,

Jismimdagi mador yetmaydi.

 

Lek ko'ksimda erk urib tug'yon,

Qo'llarimga qalam tutadi.

Cho'lpon ruhi tegramda giryon,

Mendan ham ko'p alam yutadi.

 

O'tkir qalam, elimday ojiz –

Qog'oz bag'rin tirnab boradi.

Haqiqatni yozmasam xolis,

Dard dilimni tig'lab yoradi.

 

Bir men aytsam og'irlik qilar,

Qora xalqning xomtalash haddi.

Qachonki el o'zligin bilar,

Shundagina yuksalar qaddi.

 

Yozsam, qalam charsillab ketsa,

Nima qilay, ayt, Cho'lpon bobo?

Fig'onlarim Ollohga yetsa,

Qayta tiril, qayt, Cho'lpon bobo!

 

Yuragimda joylashib Cho'lpon,

Bilsam, yurtning g'amini yeydi.

Diyor Rahmon, sergak bo'l, o'g'lon,

Men tirildim, men senman, deydi.

 

Jurnalist

 

Jurnalistning yo'lin to'smanglar,

Xalq dardini aritmoqchidir.

Qalam tutsa, qo'lin kesmanglar,

Haqiqatni yoritmoqchidir.

 

Haqiqat yo'q dema, birodar,

U bor, asli majruhdir faqat.

Jurnalistlar uni tuzatar,

O'z vijdonin uyg'otsa, albat.

 

Diyorbek RAHMON,

O'zJOKU 2-bosqich talabasi.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

eleven − six =